Examinada a solicitude de deslindamento formulada polos representantes do monte veciñal en man común (MVMC) Regás, pertencente á Comunidade de Montes Veciñais en Man Común (CMVMC) dos Pereiros, e mais o MVMC Regás e Serra de Palmeiro, pertencente á CMVMC da Armada, no concello de Cartelle, resultan os seguintes

Feitos:

Primeiro. O 30.9.2022 a CMVMC dos Pereiros presentou un escrito (Rexel 2022/2410147) en que solicita a aprobación dun deslindamento coa CMVMC da Armada.

Coa solicitude achegou a seguinte documentación:

– Acta de deslindamento.

– Certificacións dos acordos das respectivas asembleas xerais.

– Memoria e planos.

– Acta de conciliación levantada no Xulgado de Paz de Cartelle.

Segundo. O informe do Servizo de Montes da Xefatura Territorial de Ourense do 20 de abril de 2023 fai constar que a documentación achegada corresponde ao deslindamento do perímetro estremeiro entre o MVMC Regás, pertencente á CMVMC dos Pereiros, e o MVMC Regás e Serra de Palmeiro, pertencente á CMVMC da Armada, desde o vértice 0 (o situado máis ao norte) ata o vértice 8 (o situado máis ao sur).

Logo de analizar os puntos e a súa localización, obsérvase que o deslindamento propiamente dito comeza no punto 1, e o vértice 0 ten a condición de punto auxiliar que permitiría pechar o esbozo real do MVMC Regás, tal e como se recoñece na propia acta da avinza. Porén, cómpre aclarar que o esbozo do dito monte non está sendo obxecto actualmente de proceso de revisión ningún que o modifique nestes termos, polo que se considera que a finalidade técnica do punto auxiliar, tendo en conta os actuais esbozos, é a de definir a dirección da liña no tramo anterior ao punto 1.

De xeito análogo, o punto 8 tamén debera ter a consideración de punto auxiliar na medida en que está situado fóra dos esbozos dixitalizados de ambos os montes.

O citado informe considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia, polo que propón ao Xurado Provincial a súa aprobación entre os vértices 1 e 7 indicados na acta de conciliación, e os vértices 0 e 8 teñen a condición de puntos auxiliares que definen a dirección da liña nos tramos inicial e final.

Consideracións legais e técnicas:

Primeiro. A presente resolución dítase ao abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.

Segundo. O artigo 53 da Lei 7/2012, do 28 de xuño, de montes de Galicia, recolle o procedemento que se seguirá no deslindamento entre montes veciñais en man común e establece que o xurado provincial de montes veciñais en man común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.

De acordo cos feitos e fundamentos de dereito expostos, e tendo en conta o informe favorable do Servizo de Montes do día 20 de abril de 2023, o Xurado Provincial de Montes Veciñais en Man Común acordou, por unanimidade, o día 11 de decembro de 2023:

Aprobar o acto de conciliación acadado polas xuntas reitoras do MVMC Regás, pertencente á CMVMC dos Pereiros, e do MVMC Regás e Serra de Palmeiro, pertencente á CMVMC da Armada, no concello de Cartelle.

Contra esta resolución, que pon fin a vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Ourense, 16 de xaneiro de 2024

Luis Jorge Álvarez Ferro
Presidente do Xurado Provincial de Clasificación
de Montes Veciñais en Man Común de Ourense