Na sesión celebrada, o día 16 de novembro de 2023, polo Xurado Provincial de Clasificación de Montes Veciñais en Man Común da Coruña figura o seguinte acordo:
Antecedentes:
Con data do 26.2.2019, a comunidade de montes interesada solicita a inscrición do monte veciñal Areosa e Arxomil no Rexistro de MVMC.
Este monte foi obxecto do expediente de clasificación 272, que foi denegado por Resolución do Xurado do 18.5.1993. Esta resolución impugnouse ante a xurisdición contencioso-administrativa e o procedemento concluíu coa declaración de que se trataba dunha cuestión de competencia exclusiva dos tribunais da xurisdición civil.
En relación con aqueles pronunciamentos, a comunidade promoveu o preito civil resolto pola Sentenza 60/2017, do 19 de maio de 2017, do Xulgado de Primeira Instancia e Instrución número 1 de Corcubión, confirmada pola Sentenza da Audiencia Provincial, Sección 5ª, do 16 de xullo de 2018.
Nesta sentenza decláranse como monte veciñal en man común de Areosa e Arxomil dúas parcelas:
Parcela I: parcela Arriba do Prado do Enroque, correspóndese coas parcelas número 488 e 491 do polígono 58 do catastro actual do Concello de Vimianzo (parcela catastral número 2 do polígono 25 do polígono 110 do catastro do ano 1956).
Parcela II: parcela Enriba do Prado do Fero, agrupa as parcelas número un 633, 634, 684, 580, 581, e 582 do polígono 43 e parcelas número 483 e 486 do polígono 58 do catastro actual do Concello de Vimianzo (parcelas número 116 a 237 do polígono 105 e as parcelas 390 e 464 do polígono 110 do catastro de 1956).
O monte inscribiuse provisionalmente en execución de sentenza co número Id 4235 (expediente 440) e data de declaración do 19.5.2017.
No informe do xefe da Sección de MVMC sobre a cartografía presentada conclúese que o monte:
1. Ocupa unha superficie de 44,38 ha.
2. Os lindes quedan descritos do seguinte xeito:
Norte: propiedades particulares.
Leste: propiedades particulares.
Sur: propiedades particulares.
Oeste: propiedades particulares.
3. Consta dun enclavado cunha superficie de 2,55 ha.
Unha vez examinada a dita sentenza, o xurado, por unanimidade, acorda dar cumprimento ao establecido nela, de xeito que se proceda á súa inscrición na sección provincial do Rexistro de Montes Veciñais en Man Común (expediente 430), coa planimetría e lindeiros que constan na carpeta elaborada polo Servizo de Montes.
Ao descoñecerse o nome e enderezo dos posibles titulares de dereitos e intereses sobre o referido monte, por medio deste anuncio, de conformidade co disposto no artigo 44 da Lei 39/2015, do 1 de outubro, do procedemento administrativo común das administracións públicas, comunícase o dito acordo. Así mesmo, faise constar que a eficacia da notificación quedará supeditada á súa publicación no taboleiro de edictos único (TEU) do Boletín Oficial del Estado (BOE).
A Coruña, 29 de decembro de 2023
O presidente do Xurado Provincial de Clasificación de Montes
Veciñais en Man Común da Coruña
P.S. (Resolución do 7. 7.2022)
Ofelia Rivas Vázquez
Xefa do Servizo Xurídico-Administrativo