Na súa condición de propietaria única dos terreos que integran a área de repartición AR-10 do PXOM de Ponteareas, o 11.8.2023 o representante legal da sociedade Bienes Inmuebles Corporativos Atlánticos 2008, S.L.U., con CIF B70193271, logo de informe favorable emitido polo Concello de Ponteareas (Decreto da Alcaldía 2023-1666, do 1 de agosto de 2023), aprobou inicialmente o proxecto de equidistribución do polígono único da área de repartición AR-10 do PXOM de Ponteareas, datado en maio de 2023, redactado polo avogado Jorge Pérez Maldonado e o arquitecto Leopoldo Ivorra Sáez-Díez, incluíndo valoracións de aproveitamento realizadas polo arquitecto Francisco Javier Alonso Dávila, e o convenio urbanístico proposto para a monetización do deber legal de cesión do aproveitamento urbanístico correspondente ao Concello, asinado polo representante legal de Bienes Inmuebles Corporativos Atlánticos 2008, S.L.U. e pola alcaldesa do Concello.
En cumprimento do establecido nos artigos 120 e 121 da Lei 2/2016, do 10 de febreiro, do solo de Galicia, así como o previsto no artigo 270 do Decreto 143/2016, do 22 de setembro, polo que se aproba o Regulamento da Lei 2/2016, do 10 de febreiro, do solo de Galicia, no BOP de Pontevedra do 17 de agosto de 2023 publicouse anuncio de aprobación inicial e abriuse prazo de exposición pública para formular alegacións, que rematou o 18 de setembro de 2023. Dentro do prazo de información pública só presentou alegacións Esteban Soto Martínez, en representación da entidade Distribuciones Soto Cañiza, S.L. Por Decreto da Alcaldía 2159-2023, do 25 de setembro, inadmitíronse as alegacións presentadas e aprobouse definitivamente o proxecto de equidistribución do polígono único da área de repartición AR-10 do PXOM de Ponteareas e o convenio urbanístico para a monetización do deber legal de cesión do aproveitamento urbanístico correspondente ao Concello.
O proxecto de equidistribución e o convenio urbanístico para a monetización do deber legal de cesión do aproveitamento urbanístico correspondente ao Concello, asinado polo representante legal de Bienes Inmuebles Corporativos Atlánticos 2008, S.L.U. e pola alcaldesa do Concello, o 16 de outubro de 2023, poden consultarse electronicamente a través do Portal de transparencia do Concello de Ponteareas, na seguinte ligazón: https://ponteareas.sedelectronica.gal/transparency, premendo na pestana 7. URBANISMO, OBRAS PÚBLICAS E AMBIENTE.
O decreto da Alcaldía que aproba definitivamente o proxecto de equidistribución e o convenio urbanístico para a monetización pon fin á vía administrativa e contra o decreto poderase interpoñer ben recurso potestativo de reposición perante o mesmo órgano que o ditou e no prazo dun mes contado desde o día seguinte ao da súa notificación, ao abeiro do establecido nos artigos 112.1 e 123 da Lei 39/2015, do procedemento administrativo común das administracións públicas, ou ben directamente recurso contencioso-administrativo perante o Xulgado do Contencioso-Administrativo de Pontevedra no prazo de dous meses computados a partir do día seguinte ao da recepción da notificación, consonte o establecido nos artigos 8.1 e 46.1 da Lei 29/1998, do 13 de xullo, reguladora da xurisdición contencioso-administrativa.
Ponteareas, 21 de decembro de 2023
María Nava Castro Domínguez
Alcaldesa