Examinada a solicitude de deslinde formulada polos representantes do monte veciñal en man común (MVMC) Monte Baixo de Lobeira, pertencente á Comunidade de Montes Veciñais en Man Común (CMVMC) da parroquia de Lobeira, e mais O Viso, Santas e Ouzal, pertencente á CMVMC de Gaiás, no concello de Lobeira, resultan os seguintes:

Feitos:

Primeiro. O 29.9.2022 a CMVMC da parroquia de Lobeira presentou un escrito (Rexel 2022/2397132) en que solicita a aprobación dun deslindamento coa CMVMC de Gaiás.

Coa solicitude achegou a seguinte documentación:

– Acta de deslindamento.

– Certificacións dos acordos das respectivas asembleas xerais.

– Memoria e planos.

– Acta de conciliación levantada no Xulgado de Paz de Lobeira.

Segundo. O informe do Servizo de Montes da Xefatura Territorial de Ourense do 12 de abril de 2023 fai constar que a documentación achegada corresponde ao deslindamento do perímetro estremeiro entre o MVMC Monte Baixo de Lobeira, pertencente á CMVMC da parroquia de Lobeira, e o MVMC O Viso, Santas e Ouzal, pertencente á CMVMC de Gaiás, desde o vértice 1 (o situado máis ao leste) ata o vértice 3 (o situado máis ao oeste).

Logo de analizar toda a documentación achegada, obsérvase que o linde, entre os vértices 2 e 3, non é unha liña recta, senón que, tal como se describe na acta do deslindamento (ao describir o vértice 3), discorre en dirección suroeste a uns 750 m do anterior baixando pola devasa, situándose na súa marxe dereita. Considerando ademais que (de novo segundo a descrición contida na acta) o vértice 2 (…) se sitúa na parte dereita da devasa, así como tamén a traza da liña que consta tanto na cartografía da memoria coma nos arquivos shape, cómpre sinalar e aclarar, en prevención de calquera clase de equívocos ou interpretacións, que a dita traza discorre pola beira norte (ou dereita) da devasa entre os vértices 2 e 3.

O citado informe considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia, polo que propón ao Xurado Provincial a súa aprobación, facendo constar que, entre os vértices 2 e 3, a liña discorre pola beira norte da devasa que os une, conforme a cartografía dixital aportada.

Consideracións legais e técnicas:

Primeira. A presente resolución dítase o abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.

Segunda. O artigo 53 da Lei 7/2012, do 28 de xuño, de montes de Galicia recolle o procedemento que hai que seguir no deslindamento entre montes veciñais en man común e establece que o xurado provincial de montes veciñais en man común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.

De acordo cos feitos e fundamentos de dereito expostos, e tendo en conta o informe favorable do Servizo de Montes do día 12 de abril de 2023, o Xurado Provincial de Montes Veciñais en Man Común acordou, por unanimidade, o día 11 de decembro de 2023:

Aprobar o acto de conciliación acadado polas xuntas reitoras dos MVMC Monte Baixo de Lobeira, pertencente á CMVMC da parroquia de Lobeira, e o MVMC O Viso, Santas e Ouzal, pertencente á CMVMC de Gaiás, no concello de Lobeira.

Contra esta resolución, que pon fin a vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Ourense, 26 de decembro de 2023

Luis Jorge Álvarez Ferro
Presidente do Xurado Provincial de Clasificación de Montes Veciñais
en Man Común de Ourense