Examinada a solicitude de deslindamento formulada polos representantes do monte veciñal en man común (MVMC) Veiga, Gralleiro e Fachado, pertencente á Comunidade de Montes Veciñais en Man Común (CMVMC) de Pintás, e mais o MVMC Veiga de Silvoso e Gralleira, pertencente á CMVMC do Silvoso, no concello de Calvos de Randín, resultan os seguintes
Feitos:
Primeiro. O 14.12.2022, a CMVMC de Pintás, por medio do seu presidente José Antonio Araújo Méndez, presentou un escrito no Rexistro da Oficina Agraria Comarcal de Xinzo de Limia (núm. 1657/RX 3073436), no cal solicita a aprobación dun deslindamento coa CMVMC do Silvoso.
Coa solicitude achegou a seguinte documentación:
– Acta de deslindamento.
– Certificación de aprobación da asemblea xeral da CMVMC de Pintás.
– Acordo de autorización do deslindamento.
– Plano do deslindamento.
– Acta de conciliación levantada no Xulgado de Paz de Calvos de Randín.
Segundo. O informe do Servizo de Montes da Xefatura Territorial de Ourense do 17 de marzo de 2023 fai constar que a documentación achegada corresponde ao deslindamento do perímetro estremeiro entre o MVMC Veiga, Gralleira e Fachado, pertencente á CMVMC de Pintás, e o MVMC Veiga de Silvoso e Gralleira, pertencente á CMVMC do Silvoso, desde o vértice 1 (o situado máis ao L) ata o vértice 8 (o situado máis ao O).
O citado informe considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia, polo que propón ao Xurado Provincial a súa aprobación.
Consideracións legais e técnicas:
Primeira. A presente resolución dítase ao abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.
Segunda. O artigo 53 da Lei 7/2012, do 28 de xuño, de montes de Galicia, recolle o procedemento que se debe seguir no deslindamento entre montes veciñais en man común e establece que o Xurado Provincial de Clasificación de Montes Veciñais en Man Común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.
De acordo cos feitos e fundamentos de dereito expostos, e tendo en conta o informe favorable do Servizo de Montes do día 17 de marzo de 2023, o Xurado Provincial de Clasificación de Montes Veciñais en Man Común acordou por unanimidade o día 23 de outubro de 2023:
Aprobar o acto de conciliación acadado polas xuntas reitoras dos MVMC Veiga, Gralleiro e Fachado, pertencente á CMVMC de Pintás, e mais o MVMC Veiga de Silvoso e Gralleira, pertencente á CMVMC do Silvoso, no concello de Calvos de Randín.
Contra esta resolución, que pon fin á vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense, no prazo dun mes, ou ben directamente recurso contencioso-administrativo perante o Xulgado do Contencioso Administrativo de Ourense, no prazo de dous meses, contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.
Ourense, 17 de novembro de 2023
Luis Jorge Álvarez Ferro
Presidente do Xurado Provincial de Clasificación
de Montes Veciñais en Man Común de Ourense