O 2.6.2022, o Consello da Xunta de Galicia aprobou o Plan especial de seca da demarcación hidrográfica de Galicia Costa, que foi publicado no Diario Oficial de Galicia o 1 de xullo.
O dito plan dispón que a escaseza se produce ante unha situación de redución temporal da auga dispoñible que pode pór en risco a atención das demandas asociadas aos diferentes usos socioeconómicos.
O Plan especial de seca citado divide o territorio da demarcación hidrográfica de Galicia Costa en unidades territoriais de escaseza (UTE) (punto 2 do plan), establece os indicadores hidrolóxicos de escaseza en cada unha destas UTE (punto 6.2 do plan) e fixa os limiares para a activación e desactivación dos diferentes escenarios de escaseza (punto 7.2.2 do plan).
O punto 10.4.2 do Plan especial de seca indicado determina que se debe elaborar un informe mensual no cal se analice a situación e evolución dos indicadores hidrolóxicos de escaseza previstos.
O 27.9.2023 activouse o escenario de alerta ou escaseza severa na unidade territorial de escaseza número 11, correspondente ao sistema de explotación número 11 río Mero, Arteixo e ría da Coruña.
O informe de seguimento da seca do 9.11.2023 analiza a situación dos indicadores de seca o 1.11.2023 e constata unha melloría considerable dos indicadores de escaseza na UTE 11 río Mero, Arteixo e ría da Coruña que, desde finais do mes de outubro, presentan valores correspondentes a un escenario de normalidade.
O 10.11.2023 reuniuse a Oficina Técnica da Seca e propuxo a desactivación do escenario de alerta ou escaseza severa na UTE 11 río Mero, Arteixo e ría da Coruña.
O punto 10.4.2 do Plan especial de seca citado dispón que a Presidencia de Augas de Galicia é o órgano competente para a desactivación do escenario de alerta ou escaseza severa.
De acordo co anterior, esta Presidencia
RESOLVE:
Desactivar o escenario de alerta ou escaseza severa na unidade territorial de escaseza número 11, correspondente ao sistema de explotación número 11 río Mero, Arteixo e ría da Coruña.
Santiago de Compostela, 10 de novembro de 2023
Ethel María Vázquez Mourelle
Presidenta de Augas de Galicia