De conformidade co previsto no artigo 9 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia, e no artigo 8 da Lei 19/2013, do 9 de decembro, de transparencia, acceso á información pública e bo goberno, dáse publicidade da seguinte encomenda coas seguintes características:

– Resolución do 22 de setembro de 2023, da Consellería de Sanidade, pola que se encomenda á Sociedade Pública de Investimentos de Galicia, S.A. o apoio técnico á xestión da licitación e á execución das obras do contrato de concesión do aparcadoiro do novo Hospital Gran Montecelo.

– Actividade:

A Sociedade Pública de Investimentos de Galicia, S.A. asumirá a realización das tarefas necesarias para prestar o apoio técnico á xestión da licitación e á execución das obras do contrato de concesión do aparcadoiro do novo Hospital Gran Montecelo, e con este fin obrígase a realizar as seguintes actuacións:

1. Elaboración e redacción do prego de prescricións técnicas e do prego de cláusulas administrativas particulares.

2. Realizar os labores de supervisión e implantación, así como a proposta de aprobación do anteproxecto e do proxecto.

3. Elaboración dos informes de carácter técnico que, en relación co procedemento de preparación e adxudicación dos contratos, sexan encomendados polo órgano encomendante.

4. Asumir as funcións de responsable do contrato na súa fase de execución da obra e, de ser o caso, dos contratos de servizo complementarios da execución da obra.

5. Finalizada a fase de construción, asistir ao acto de recepción e comprobación da obra dos contratos obxecto da encomenda e asinar como responsable destes.

6. Asistir ao órgano encomendante en calquera tarefa que lle sexa requirida durante a fase de explotación do contrato.

7. Convocar o Servizo Galego de Saúde para que designe unha persoa representante cando sexa preciso.

O Servizo Galego de Saúde, pola súa banda, obrígase a realizar as seguintes actuacións:

1. Prestar, cando lle sexa requirido polo órgano encomendado, en calquera das fases en que se atope a execución desta encomenda de xestión, a axuda e colaboración técnica necesaria para desenvolvela satisfactoriamente.

2. Asumir, no caso de que así se requirise, a realización das xestións pertinentes ante os organismos que correspondan para a obtención dos permisos, licenzas ou autorizacións regulamentarias, que necesariamente deben ser solicitadas polo Servizo Galego de Saúde.

3. Aprobar o anteproxecto, o proxecto e realizar os actos e negocios xurídicos propios da preparación, selección de contratista e adxudicación do correspondente contrato de concesión de obra e contratos dos servizos complementarios delas.

4. Dar a conformidade, no caso de que exista unha modificación dos contratos vinculados á actuación, tanto de prestación de servizos como de obra.

5. Unha vez finalizada a fase de construción do contrato obxecto da encomenda e recibida a obra, o Servizo Galego de Saúde será o responsable do contrato durante a fase de explotación do aparcadoiro.

– Natureza e alcance das funcións encomendadas: a encarga ten natureza de encomenda intersubxectiva a medio propio, segundo o disposto no artigo 13.1 da Lei 14/2013, do 26 de decembro, de racionalización do sector público autonómico; e nos artigos 9, 47 e seguintes da Lei 16/2010, do 17 de decembro, ao ter a Sociedade Pública de Investimentos de Galicia, S.A. a consideración de medio propio e servizo técnico da Administración da Comunidade Autónoma de Galicia.

– Financiamento: a realización das actividades e/ou dos actos e negocios xurídicos necesarios para a execución desta encomenda efectuarase a título gratuíto, sen que exista retribución ou tarifa.

– Prazo de vixencia: a eficacia da encomenda estenderase desde o día seguinte ao da súa sinatura ata a data de finalización do prazo de garantía dos contratos obxecto desta.

Santiago de Compostela, 11 de outubro de 2023

Julio García Comesaña
Conselleiro de Sanidade e presidente
do Servizo Galego de Saúde