Expediente: IN407A 2023/312-4.

Promotora: Electra Alto Miño Distribuidora de Energía, S.L.U.

Denominación: ampliación punto fronteira CPM Oleiros (2ª alimentación SET Salvaterra).

Concello: Salvaterra de Miño.

Feitos:

Primeiro. O 31 de maio de 2023, Electra Alto Miño Distribuidora de Energía S.L.U. solicitou a autorización administrativa previa e a autorización administrativa de construción do proxecto de execución da instalación eléctrica ampliación punto fronteira CPM Oleiros (2ª alimentación SET Salvaterra).

Examinado o proxecto de execución, conclúese que consiste na instalación dunha caseta prefabricada que realizará a función de centro de protección e medida (CPM) para unha segunda alimentación desde a subestación Salvaterra de UFD Distribución Eletricidad, S.A. Preténdese garantir a seguridade da subministración eléctrica mediante a instalación dunha segunda acometida, así como a interconexión entre os CPM. As actuacións están previstas nas Antas, na parroquia de Oleiros, no concello de Salvaterra de Miño (Pontevedra).

Segundo. Esta xefatura territorial solicitou o preceptivo informe ás distintas administracións, organismos ou, de ser o caso, empresas de servizos de interese xeral afectadas, isto é, o Concello de Salvaterra de Miño, Red Eléctrica de España, S.A.U. e UFD Distribución Electricidad, S.A. A empresa promotora manifestou a súa conformidade cos condicionados emitidos por Red Eléctrica de España, S.A.U. e UFD Distribución Electricidad, S.A.

O Concello de Salvaterra de Miño non emitiu o condicionado técnico, polo que se entende a súa conformidade coa autorización de construción da dita infraestrutura eléctrica, conforme o disposto no artigo 131 do Real decreto 1955/2000, do 1 de decembro, sen prexuízo da autorización que lle corresponda outorgar.

Consideracións legais e técnicas.

Primeiro. A Xefatura Territorial de Pontevedra é competente para resolver este expediente con fundamento no Decreto 116/2022, do 23 de xuño, polo que se establece a estrutura orgánica da Vicepresidencia Primeira e Consellería de Economía, Industria e Innovación (DOG núm. 126, do 4 de xullo) e no Decreto 9/2017, do 12 de xaneiro, polo que se establecen os órganos competentes para a resolución dos procedementos de autorización de instalacións eléctricas que sexan competencia da Comunidade Autónoma de Galicia (DOG núm. 22, do 1 de febreiro).

Segundo. A lexislación de aplicación a este expediente é:

– Lei 24/2013, do 26 de decembro, do sector eléctrico.

– Lei 39/2015, do 1 de outubro, do procedemento administrativo común das administracións públicas.

– Lei 40/2015, do 1 de outubro, de réxime xurídico do sector público.

– Lei 9/2021, do 25 de febreiro, de simplificación administrativa e de apoio á reactivación económica de Galicia.

– Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica.

– Real decreto 223/2008, do 15 de febreiro, polo que se aproban o Regulamento sobre condicións técnicas e garantías de seguridade en liñas eléctricas de alta tensión e as súas instrucións técnicas complementarias ITC-LAT 01 a 09.

– Real decreto 337/2014, do 9 de maio, polo que se aproban o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias ITC-RAT 01 a 23.

– Lei 5/2017, do 19 de outubro, de fomento da implantación de iniciativas empresariais en Galicia (DOG núm. 203, do 25 de outubro).

Terceiro. As características técnicas da instalación son as que a seguir se describen:

Centro de protección e medida Oleiros, punto fronteira (CPM-2 Oleiros) en caseta prefabricada, composto por unha cela de entrada con transformadores de medida intensidade e tensión, unha cela de liña con seccionador SF6 e unha cela de protección xeral con interruptor automático.

Liña de media tensión subterránea (LMTS) con condutor RHZ1, de 25 metros de lonxitude, de interconexión do centro de protección de medida Oleiros, punto fronteira (CPM-1 Oleiros) existente co CPM-2 Oleiros proxectado.

A instalación está situada nas Antas, Oleiros, no municipio de Salvaterra de Miño (Pontevedra).

Conforme o indicado,

Resolvo:

Primeiro. Outorgar a Electra Alto Miño Distribuidora de Energía, S.L.U. as autorizacións administrativas previa e de construción da instalación de distribución de enerxía eléctrica denominada ampliación punto fronteira CPM Oleiros (2ª alimentación SET Salvaterra), expediente IN407A 2023/312-4, cuxas características se axustarán en todas as súas partes ás que figuran no proxecto de execución, ás condicións técnicas e de seguridade establecidas nos regulamentos de aplicación e ás condicións establecidas nos condicionados dos organismos que constan no expediente.

Segundo. Electra Alto Miño Distribuidora de Energía, S.L.U. asegurará o mantemento e a vixilancia correcta das instalacións durante a construción e despois da súa posta en servizo, co fin de garantir que en todo momento se manterán as condicións regulamentarias de seguridade. Deberanse cumprir en todo momento as normas e directrices vixentes que resulten de aplicación, en particular canto establecen o Real decreto 223/2008, do 15 de febreiro, polo que se aproban o Regulamento sobre condicións técnicas e garantías de seguridade en liñas eléctricas de alta tensión e as súas instrucións técnicas complementarias ITC-LAT 01 a 09, e o Real decreto 337/2014, do 9 de maio, polo que se aproban o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias ITC-RAT 01 a 23.

Terceiro. Esta autorización outórgase sen prexuízo de terceiros e independentemente das autorizacións, licenzas ou permisos de competencia municipal, provincial ou outros necesarios para a realización das obras da instalación autorizada.

Contra esta resolución, que non é definitiva en vía administrativa, poderase interpoñer recurso de alzada, ante a conselleira de Economía, Industria e Innovación da Xunta de Galicia, no prazo dun mes contado a partir do día seguinte ao da súa notificación ou publicación, de acordo co disposto nos artigos 121 e 122 da Lei 39/2015, do 1 de outubro, do procedemento administrativo común das administracións públicas, sen prexuízo de que os interesados poidan interpoñer calquera outro recurso que consideren pertinente.

Pontevedra, 19 de setembro de 2023

Beatriz López del Olmo
Xefa territorial de Pontevedra