A Axencia Galega das Industrias Culturais (Agadic) publicou no Diario Oficial de Galicia do día 4 de novembro de 2022 a Resolución do 20 de outubro de 2022, pola que se establecen as bases reguladoras, en réxime de concorrencia competitiva, para a concesión de subvencións á modernización e xestión sustentable das infraestruturas das artes escénicas e musicais, ao abeiro dos fondos NextGenerationEU e o Mecanismo de recuperación e resiliencia do Regulamento UE 2021/241, e se convocan para o ano 2023 (código de procedemento CT404E).
O artigo 4.7 das bases reguladoras establece que nestas subvencións se admitirán aqueles gastos que fosen realizados e pagados desde o 1 de xaneiro ata o 30 de xuño de 2023, e o artigo 6.1 das bases reguladoras establece que son gastos subvencionables os que resulten estritamente necesarios para o desenvolvemento do proxecto presentado e fosen realizados e pagados desde o 1 de xaneiro ao 30 de xuño de 2023, ambos incluídos, polo que o período subvencionable abrangue desde o 1 de xaneiro ao 30 de xuño de 2023, ambos incluídos.
O artigo 24.1 das bases reguladoras establece que para ter dereito ao pagamento da axuda deberá presentarse electronicamente, accedendo á Carpeta cidadá dispoñible na sede electrónica da Xunta de Galicia, a documentación xustificativa da subvención, ademais dos formularios establecidos para o efecto, antes do 31 de xullo de 2023.
A través da Resolución do 29 de novembro do 2022, publicada no DOG núm. 230, do venres 2 de decembro do 2022, amplíanse os prazos de solicitude, de remate do período subvencionable e de xustificación. Deste xeito, o punto segundo desta resolución determina «Modificar a data de remate do período subvencionable e a data límite de xustificación establecida nos artigos 4.7, 6.1 e 24.1, respectivamente, da Resolución do 20 de outubro de 2022, ampliando ambos os prazos ao 20 de setembro de 2023».
Esta liña de axudas está financiada a través dos fondos do Plan de recuperación, transformación e resiliencia, que exixe que as administracións públicas beneficiarias dela teñan que validar a operación obxecto da subvención a través das plataformas habilitadas para o efecto, concretamente Coffee e Minerva, tal e como se constata na Orde HFP/55/2023, do 24 de xaneiro, relativa á análise sistemática de risco de conflito de intereses nos procedementos que executan o Plan de recuperación, transformación e resiliencia. Este trámite non estaba incluído na convocatoria inicial porque esta orde do Ministerio de Facenda e Función Pública é posterior no tempo.
O procedemento de validación en árbore establecido nestas aplicacións implica a diferentes axentes da Administración autonómica e estatal. Esta circunstancia provoca demoras na execución dos proxectos subvencionados, o que orixina un prexuízo para as persoas beneficiarias, sobre todo as administracións públicas.
O artigo 32 da Lei 39/2015, do 1 de outubro, do procedemento administrativo común das administracións públicas, relativo á ampliación de prazos, establece que a ampliación poderá acordarse de oficio ou por instancia de parte antes do vencemento do prazo de que se trate e se as circunstancias así o aconsellan.
En consecuencia, tendo en conta que é de interese xeral maximizar a eficacia e eficiencia dos recursos públicos e acadar os obxectivos determinados na convocatoria destas axudas, e que a ampliación que se propón non prexudica a concorrencia nin os dereitos de terceiros,
RESOLVO:
Modificar a Resolución do 20 de outubro de 2022 pola que se establecen as bases reguladoras, en réxime de concorrencia competitiva, para a concesión de subvencións á modernización e xestión sustentable das infraestruturas das artes escénicas e musicais, ao abeiro dos fondos NextGenerationEU e do Mecanismo de recuperación e resiliencia do Regulamento UE 2021/241, e se convocan para o ano 2023 (código de procedemento CT404E), nos artigos que se relacionan a continuación:
1. Modificar o artigo 4.7, que queda redactado como segue: «Nestas subvencións admitiranse aqueles gastos que fosen comprometidos entre o 1 de xaneiro e o 20 de setembro de 2023, ambos incluídos».
2. Modificar o artigo 6.1, que queda redactado somo segue: «Serán gastos subvencionables de acordo co establecido no artigo 29 da Lei 9/2007, do 13 de xuño, de subvencións de Galicia, aqueles que de xeito indubidable respondan á natureza da actividade subvencionable, que se realicen nos espazos escénicos e musicais situados en Galicia, resulten estritamente necesarios para o desenvolvemento do proxecto presentado e fosen comprometidos desde o 1 de xaneiro ao 20 de setembro do 2023, ambos incluídos».
3. Modificar o artigo 24.1, que queda redactado como segue: «Para ter dereito ao pagamento da axuda, deberá presentarse electronicamente, accedendo á Carpeta cidadá dispoñible na sede electrónica da Xunta de Galicia, a documentación xustificativa da subvención, ademais dos formularios establecidos para o efecto, antes do 20 de outubro de 2023».
Disposición derradeira
Esta resolución entrará en vigor o día seguinte ao da súa publicación.
Santiago de Compostela, 11 de setembro de 2023
Román Rodríguez González
Presidente do Consello Reitor da Axencia Galega
das Industrias Culturais