Expediente: IN407A 2023/091-1.

Promotor: UFD Distribución Electricidad, S.A.

Instalación: renovación LMTS POT809 entre CT 15XTK7 e CT 15X944.

Concello: Cee.

Feitos:

1. O día 2.3.2023, a empresa promotora solicitou a autorización administrativa previa, a autorización administrativa de construción e a declaración de utilidade pública da dita instalación de distribución eléctrica. Co obxecto de mellorar a calidade da subministración, así como de incrementar a capacidade de transporte das liñas existentes para atender os aumentos de demanda de enerxía na contorna da avenida de Fisterra (concello de Cee), proxéctase substituír dous tramos soterrados da liña de distribución de media tensión LMT POT809, procedente da subestación Pontella, e instalar un novo condutor nos ditos tramos nunha nova canalización paralela á existente.

Ao abeiro do artigo 123 do Real decreto 1955/2000, achegan o proxecto denominado Renovación LMTS POT809 entre CT 15XTK7 e CT 15X944, que inclúe memoria, planos e orzamento. O documento foi asinado o día 30.11.2022 por Tito Arias Santos, enxeñeiro técnico industrial eléctrico con número de colexiado LE-1010.

2. O proxecto non se someteu ao trámite de información pública, segundo o artigo 50 da Lei 9/2021, do 25 de febreiro, de simplificación administrativa e de apoio á reactivación económica de Galicia (DOG núm. 39, do 26 de febreiro).

3. Consonte o artigo 127 do Real decreto 1955/2000, do 1 de decembro, trasladóuselles unha separata do proxecto ás entidades afectadas, na parte en que a instalación puider afectar bens e dereitos ao seu cargo. A separata contén as características da instalación e a documentación cartográfica correspondente. Así, solicitouse o informe preceptivo ao Concello de Cee, a Augas de Galicia, ao Servizo Provincial da Coruña da Axencia Galega de Infraestruturas e ao Servizo de Patrimonio Cultural da Xefatura Territorial da Coruña da Consellería de Cultura. A empresa promotora manifestou a súa conformidade cos informes que foron emitidos no prazo outorgado para ese efecto: os da Axencia Galega de Infraestruturas e do Servizo de Patrimonio Cultural. No día desta resolución, non consta no expediente resposta á solicitude de informe por parte do resto das entidades consultadas.

4. O día 20.7.2023 emitiuse un informe técnico.

Consideracións legais e técnicas:

1. O xefe territorial é competente para resolver este expediente segundo o Decreto 9/2017, do 12 de xaneiro, polo que se establecen os órganos competentes para a resolución dos procedementos de autorización de instalacións eléctricas que sexan competencia da Comunidade Autónoma de Galicia; o Decreto 59/2023, do 14 de xuño, polo que se establece a estrutura orgánica da Xunta de Galicia; o Decreto 79/2023, do 22 de xuño, polo que se fixa a estrutura orgánica das vicepresidencias e das consellerías da Xunta de Galicia; e no Decreto 116/2022, do 23 de xuño, polo que se establece a estrutura orgánica da Vicepresidencia Primeira e Consellería de Economía, Industria e Innovación, modificado polo Decreto 49/2023, do 19 de maio (DOG núm. 98, do 25 de maio).

2. Lexislación de aplicación:

– Lei 24/2013, do 26 de decembro, do sector eléctrico.

– Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica.

– Real decreto 223/2008, do 15 de febreiro, polo que se aproban o Regulamento sobre condicións técnicas e garantías de seguridade en liñas eléctricas de alta tensión e as súas instrucións técnicas complementarias ITC-LAT 01 a 09.

– Real decreto 337/2014, do 9 de maio, polo que se aproban o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias ITC-RAT 01 a 23.

– Real decreto 842/2002, do 2 de agosto, polo que se aproba o Regulamento electrotécnico para baixa tensión.

– Lei 9/2021, do 25 de febreiro, de simplificación administrativa e de apoio á reactivación económica de Galicia (DOG núm. 39, do 26 de febreiro).

3. Características técnicas:

As instalacións atópanse na avenida de Fisterra, no concello de Cee, e as súas características técnicas son:

– Actuación 1: LMTS a 20 kV, de 428 m, condutor tipo RHZ1-2OL 12/20 kV 3×(1×240) mm² Al, con orixe no CT Doca (15X944) existente e remate no CT Perdigones (15X943) existente. Posta fóra de servizo do tramo POT8090499 con condutor existente tipo UNI-AL-70 -RHV/DHV (IN407A 2016/2304-1) da LMT POT809, procedente da subestación Pontella.

– Actuación 2: LMTS a 20 kV, de 275 m, condutor tipo RHZ1-2OL 12/20 kV 3×(1×240) mm² Al, con orixe no CT Perdigones (15X943) existente e remate no CT Vila de Cee (15XGMY) existente. Posta fóra de servizo do tramo POT8090512 con condutor existente tipo UNI-AL-150-RHV (IN407A 2016/2304-1) da LMT POT809.

– Actuación 3: LMTS a 20 kV, de 81 m, condutor tipo RHZ1-2OL 12/20 kV 3×(1×240) mm² Al, con orixe no CT Vila de Cee (15XGMY) existente e remate nos empalmes que se realizarán na LMT POT809. Posta fóra de servizo do tramo POT8090490 con condutor existente tipo UNI-AL-150-RHV (expediente 380/97) da LMT POT809.

– As liñas proxectadas discorrerán nunha canalización paralela á existente no interior dun tubo de polipropileno de 160 mm de diámetro en gabia de dimensións de 0,40 m de largo e de entre 0,80 e 1,20 m de profundidade (dependendo do número de tubos e do terreo). Instalaranse entre dous e catro tubos de idénticas características, cunha lonxitude total de canalización proxectada de 769 m.

4. No expediente consta un informe favorable dos servizos técnicos desta xefatura territorial.

De acordo con todo o exposto,

RESOLVO:

1. Conceder a autorización administrativa previa e a autorización administrativa de construción para a dita instalación de distribución eléctrica.

2. A instalación executarase no prazo dun ano, contado a partir do día seguinte ao da publicación desta resolución no Diario Oficial de Galicia.

3. Para a posta en funcionamento da instalación autorizada, deberá achegar ante esta xefatura territorial unha solicitude coa cal xuntará a seguinte documentación:

– As declaracións de conformidade relativas ao material ou equipamento, e as certificacións ou homologacións, se procede.

– Un certificado do/a director/a da montaxe en que se garantirá o cumprimento das especificacións do proxecto e das prescricións complementarias, se as houber, así como das regulamentacións e normas oportunas na montaxe da instalación e posta a punto.

– Planimetría as built da instalación eléctrica en formato shape.

4. Esta aprobación outórgase sen prexuízo doutras que sexan de aplicación segundo a lexislación vixente, en especial no relativo á ordenación do territorio e ao ambiente.

Contra esta resolución, que non é definitiva en vía administrativa, poderase interpor recurso de alzada perante a conselleira de Economía, Industria e Innovación no prazo dun mes contado a partir do día seguinte ao da notificación ou publicación, segundo o disposto nos artigos 121 e 122 da Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro), sen prexuízo de que as persoas interesadas poidan interpor calquera outro recurso que consideren pertinente.

Mediante este documento notifícaselles aos interesados esta resolución, segundo o exixido no artigo 40.1 da dita Lei 39/2015.

A Coruña, 21 de xullo de 2023

Isidoro Martínez Arca
Xefe territorial da Coruña