Para os efectos de establecer en Galicia o procedemento de solicitude para a asignación de dereitos de pagamento básico procedentes da reserva nacional da campaña de 2022, no marco establecido polo Real decreto 1076/2014, do 19 de decembro, sobre asignación de dereitos do réxime de pagamento básico da política agraria común, publicouse a Orde da Consellería do Medio Rural do 21 de xaneiro de 2022 pola que se regula a aplicación dos pagamentos directos á agricultura e á gandaría e das axudas ao desenvolvemento rural suxeitas ao sistema integrado de xestión e control.
O Fondo Galego de Garantía Agraria (Fogga), con base no disposto nos artigos 23 a 27 do Real decreto 1076/2014, tramitou e emitiu informe sobre as solicitudes de acceso á reserva nacional, e deulle traslado dos expedientes á persoa titular da presidencia do Fondo Español de Garantía Agraria (FEGA) para a súa resolución.
De acordo co disposto no artigo 27.1 do devandito Real decreto 1076/2014, a persoa titular da presidencia do FEGA comunicou ao Fogga, para a súa notificación ás persoas solicitantes, a resolución sobre a asignación de solicitudes de dereitos de pagamento básico da reserva nacional.
Así mesmo, logo da análise das diferentes casuísticas na asignación de dereitos non resoltas ata a data, notifícanse as resolucións de asignación de dereitos da reserva nacional pendentes das campañas reguladas nas ordes da Consellería do Medio Rural do 29 de xaneiro de 2016, do 6 de febreiro de 2018, do 22 de xaneiro de 2019, do 12 de febreiro de 2020 e do 15 de xaneiro de 2021, polas que se regula a aplicación dos pagamentos directos á agricultura e á gandaría e das axudas ao desenvolvemento rural suxeitas ao sistema integrado de xestión e control.
Conforme co anterior, esta dirección
RESOLVE:
Primeiro. Facer pública e notificar na páxina web do Fogga (https://fogga.xunta.gal/gl/pac/consultas_pac/dereitos_de_pagamento_basico) as resolucións do FEGA relativas á asignación complementaria de dereitos de pagamento básico da reserva nacional da campaña de 2022, os casos pendentes das campañas de 2018, 2019, 2020 e 2021 e a denegación das solicitudes de dereitos de pagamento básico da campaña de 2022 e dos casos pendentes das campañas de 2016 e 2019.
Segundo. Contra a resolución da persoa titular da presidencia do FEGA, as persoas interesadas poderán interpoñer recurso de alzada ante a persoa titular do Ministerio de Agricultura, Pesca e Alimentación, no prazo dun mes contado desde o día seguinte á publicación desta notificación no Diario Oficial de Galicia.
Santiago de Compostela, 18 de xullo de 2023
Silvestre José Balseiros Guinarte
Director do Fondo Galego de Garantía Agraria