Na sesión realizada polo xurado provincial o día 14.6.2023, figura o seguinte acordo:
O monte veciñal en man común (MVMC) Panda (expediente 76/80), pertencente aos veciños de Susá, Crende e Milleirós, no concello de Pol.
– O 24.5.2021 tivo entrada unha proposta, aprobada pola comunidade de Susá, Crende e Milleirós, de deslindamento parcial do seu monte con propiedades particulares, concretamente co monte abertal de Milleirós.
– De acordo co establecido no procedemento regulado polo artigo 54 da Lei 7/2012, de montes de Galicia, o 15.7.2021, logo de informe favorable do Servizo de Montes, publicouse no Diario Oficial de Galicia (DOG) o anuncio polo que se fixo pública a proposta de deslindamento e abriuse o prazo de alegacións para o expediente 2021_4DES. Así mesmo, o anuncio foi publicado no Concello de Pol e na web da Consellería do Medio Rural.
– O 28.3.2023 a comunidade propietaria do monte, comunicou que non houbo alegacións e que se ratifican na proposta inicial. Sobre ela, o 12.4.2023 o Servizo de Montes emitiu un informe favorable, de acordo co indicado no citado artigo 54.2.
– O 18.4.2023 tivo entrada a proposta definitiva, presentada pola comunidade do MVMC de Panda, que non varía respecto da proposta inicial.
– O 2.5.2023 o Servizo de Montes elaborou unha memoria na que se especifican as modificacións cartográficas e de medición que se producen como consecuencia do deslindamento. Tras o deslindamento, o MVMC Panda pasa a ter 217,34 hectáreas.
De conformidade co disposto no artigo 54.3 da Lei 7/2012, no caso de informe favorable, unha vez ratificado o deslindamento provisional pola asemblea xeral, darase traslado ao xurado provincial dos acordos alcanzados [...]. O xurado provincial de montes veciñais en man común ditará resolución aprobatoria do deslindamento [...].
En vista do anterior, o xurado, por unanimidade, acorda aprobar o deslindamento e proceder a realizar as oportunas correccións no expediente, de conformidade co informe elaborado polo Servizo de Montes.
O plano que figura no anexo, ao final deste anuncio, corresponde ao monte veciñal tras o deslindamento aprobado.
Contra este acordo, dende o día seguinte ao da súa publicación no Diario Oficial de Galicia, poderá interpoñerse recurso potestativo de reposición ante o Xurado Provincial de Clasificación de Montes Veciñais en Man Común de Lugo no prazo dun mes, ou ben directamente recurso contencioso-administrativo ante o Xulgado do Contencioso-Administrativo de Lugo no prazo de dous meses, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e no artigo 46 da Lei 29/1998, do 13 de xullo, da xurisdición contencioso-administrativa.
Lugo, 30 de xuño de 2023
Mª Olga Iglesias Fontal
Presidenta do Xurado Provincial de Clasificación
de Montes Veciñais en Man Común de Lugo
ANEXO