Na sesión realizada polo xurado provincial o día 14.6.2023, figura o seguinte acordo:
O monte veciñal en man común (MVMC) Férveda (expediente 16/78), pertencente aos veciños dos lugares de Piñeiro, Coto, Rego da Silva, Reboredo e Vilacorbe, na parroquia de Santo Estevo de Folgosa, no concello do Corgo.
– O 14.7.2020 tivo entrada unha proposta, aprobada pola comunidade propietaria, de deslindamento do monte veciñal con propiedades particulares.
– De acordo co establecido no procedemento regulado polo artigo 54 da Lei 7/2012, de montes de Galicia, o 10.9.2020, logo de informe favorable do Servizo de Montes, publicouse no Diario Oficial de Galicia (DOG) o anuncio polo que se fixo pública a proposta de deslindamento e abriuse o prazo de alegacións para o expediente 2DES_2020. Así mesmo, o anuncio foi publicado no Concello do Corgo e na web da Consellería do Medio Rural.
– O 31.1.2023 a comunidade propietaria do monte, tras a consideración das alegacións recibidas, presentou unha proposta de deslindamento. Sobre ela, o 6.2.2023 o Servizo de Montes emitiu un informe favorable, de acordo co indicado no citado artigo 54.2.
– O 5.5.2023 tivo entrada a proposta definitiva, ratificada pola comunidade na asemblea do 20.10.2021, xunto coa documentación requirida no procedemento.
– O 11.5.2023 o Servizo de Montes elaborou unha memoria en que se especifican as modificacións cartográficas e de medición que se producen como consecuencia do deslindamento. Tras o deslindamento, o MVMC Férveda pasa a ter 200,34 hectáreas.
De conformidade co disposto no artigo 54.3 da Lei 7/2012, no caso de informe favorable, unha vez ratificado o deslindamento provisional pola asemblea xeral, darase traslado ao xurado provincial dos acordos alcanzados [...]. O xurado provincial de montes veciñais en man común ditará resolución aprobatoria do deslindamento [...].
En vista do anterior, o xurado, por unanimidade, acorda aprobar o deslindamento e proceder a realizar as oportunas correccións no expediente, de conformidade co informe elaborado polo Servizo de Montes.
O plano que figura no anexo, ao final deste anuncio, corresponde ao monte veciñal tras o deslindamento aprobado.
Contra este acordo, desde o día seguinte ao da súa publicación no Diario Oficial de Galicia, poderá interpoñerse recurso potestativo de reposición ante o Xurado Provincial de Clasificación de Montes Veciñais en Man Común de Lugo no prazo dun mes, ou ben directamente recurso contencioso-administrativo ante o Xulgado do Contencioso-Administrativo de Lugo no prazo de dous meses, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e no artigo 46 da Lei 29/1998, do 13 de xullo, da xurisdición contencioso-administrativa.
Lugo, 30 de xuño de 2023
Mª Olga Iglesias Fontal
Presidenta do Xurado Provincial de Clasificación
de Montes Veciñais en Man Común de Lugo
ANEXO