Mediante a Resolución do 2 de marzo de 2023, que foi publicada no DOG número 52, do 15 de marzo de 2023, establecéronse as bases reguladoras e anunciouse a convocatoria de subvencións para a planificación enerxética de entidades locais e comunidades enerxéticas.
O artigo 4.1 das bases reguladoras prevé a posibilidade de redistribuír o orzamento se, pasado un mes desde a apertura do prazo de solicitudes, nalgunha das epígrafes non se rexistraron solicitudes suficientes para esgotar os fondos dispoñibles e noutra das epígrafes existe lista de espera. O prazo de presentación de solicitudes comezou o día 28 de marzo. Transcorrido máis dun mes, polo momento non se rexistraron solicitudes suficientes para esgotar os fondos dispoñibles na epígrafe correspondente á planificación enerxética de concellos e, porén, existe lista de espera na epígrafe de planificación enerxética de comunidades enerxéticas.
O artigo 31 do Decreto 11/2009 establece que cando a contía total máxima das subvencións convocadas se distribúa entre distintos créditos orzamentarios, a alteración da dita distribución non precisará de nova convocatoria pero si das modificacións que procedan no expediente de gasto e da publicación nos mesmos medios que a convocatoria.
Por todo o anterior, e dado que nas aplicacións orzamentarias correspondentes existe crédito dispoñible, que as solicitudes de axudas asociadas á liña de planificación enerxética de comunidades enerxéticas superaron o orzamento previsto na convocatoria, e coa finalidade de incrementar a eficacia administrativa e a eficiencia na asignación de recursos públicos,
RESOLVO:
Primeiro. Redistribuír os fondos destinados ás subvencións para planificación enerxética de entidades locais e comunidades enerxéticas en función do volume de solicitudes recibido, modificando a táboa do artigo 4.1 da Resolución do 2 de marzo de 2023 do seguinte xeito:
Dotación orzamentaria inicial:
Distribución por liña de axuda |
Orzamento (€) |
Planificación enerxética de concellos |
500.000,00 |
Planificación enerxética de comunidades enerxéticas |
100.000,00 |
Total |
600.000,00 |
Modificación orzamentaria:
Distribución por liña de axuda |
Orzamento (€) |
Planificación enerxética de concellos |
-150.000,00 |
Planificación enerxética de comunidades enerxéticas |
+150.000,00 |
Total |
0,00 |
Dotación orzamentaria final:
Distribución por liña de axuda |
Orzamento (€) |
Planificación enerxética de concellos |
350.000,00 |
Planificación enerxética de comunidades enerxéticas |
250.000,00 |
Total |
600.000,00 |
Segundo. A presente modificación, unha vez publicada no Diario Oficial de Galicia, non implicará a modificación do prazo establecido para presentar solicitudes.
Santiago de Compostela, 30 de maio de 2023
Pablo Fernández Vila
Director do Instituto Enerxético de Galicia