O Decreto 118/2016, do 4 de agosto, polo que se crea o Instituto Galego do Consumo e da Competencia e se aproban os seus estatutos, establece no capítulo IV dos seus estatutos o réxime patrimonial e de contratación deste organismo autónomo.
O Instituto Galego do Consumo e da Competencia é un organismo encadrado dentro das entidades públicas instrumentais reguladas no título III da Lei 16/2010, do 17 de decembro, de organización e funcionamento da Administración xeral e do sector público autonómico de Galicia. O dito organismo está adscrito á consellería competente en materia de consumo.
A Lei 5/2011, do 30 de setembro, do patrimonio da Comunidade Autónoma de Galicia, establece, no seu artigo 79.1, que a competencia para o alleamento dos bens mobles do patrimonio da Comunidade Autónoma de Galicia corresponderá ao órgano unipersoal de goberno da entidade pública instrumental a que pertenzan.
O Instituto Galego do Consumo e da Competencia, para o exercicio das súas competencias e o cumprimento dos fins encomendados, conta cunha estrutura organizativa na cal se establecen como órganos de goberno o Consello Reitor e o presidente.
A actividade administrativa do Instituto Galego do Consumo e da Competencia implica unha concentración de funcións arredor do seu presidente que aconsella, dado o seu volume, recorrer á delegación de competencias noutros órganos, sen esquecer o debido respecto aos principios que informan a actividade administrativa e que a nosa Constitución recolle no seu artigo 103.1.
A delegación de competencias permite a axilización administrativa necesaria e redunda en beneficio tanto da Administración como dos administrados, dentro do máis rigoroso respecto ás garantías xurídicas que a tutela dos intereses públicos exixe.
Na súa virtude, facendo uso das facultades que me confire o artigo 43.3 da Lei 1/1983, do 22 de febreiro, de normas reguladoras da Xunta e da súa Presidencia, o artigo 9 da Lei 40/2015, do 1 de outubro, de réxime xurídico do sector público, o artigo 6 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia, e demais disposicións de xeral aplicación,
DISPOÑO:
Artigo 1. Delegación na Dirección
Delégase na persoa titular da Dirección do Instituto Galego do Consumo e da Competencia a seguinte competencia:
– O exercicio das facultades que, para o alleamento dos bens mobles do patrimonio do Instituto Galego do Consumo e da Competencia, a normativa en materia de patrimonio lle atribúe ao seu órgano unipersoal de goberno.
Artigo 2. Réxime xurídico da delegación de competencias
1. Os actos e resolucións administrativas ditados por delegación farán constar esta circunstancia, con referencia ao número e á data da súa publicación no Diario Oficial de Galicia, e consideraranse ditados polo órgano delegante.
2. En calquera momento, a persoa titular da presidencia poderá reclamar o exercicio da competencia delegada por esta resolución.
3. En todo caso, quedan excluídos das delegacións contidas nesta resolución os supostos previstos no artigo 6.4 da Lei 16/2010, do 17 de decembro, de organización e funcionamento da Administración xeral e do sector público de Galicia; no artigo 9.2 da Lei 40/2015, do outubro, de réxime xurídico do sector público, e no artigo 44.2 da Lei 1/1983, do 22 de febreiro, de normas reguladoras da Xunta e da súa Presidencia.
Disposición derradeira única. Entrada en vigor
Esta resolución entrará en vigor o mesmo día da súa publicación no Diario Oficial de Galicia.
Santiago de Compostela, 8 de maio de 2023
Francisco José Conde López
Presidente do Instituto Galego do Consumo
e da Competencia