Examinada a solicitude de deslindamento formulada polos representantes do MVMC Uzal e Outeiro Recarei, pertencente á CMMVVMC de Recarei; e do MVMC Lamas de Mourijo e Portela, pertencente á CMMVVMC de Seoane, no concello de Bande, resultan os seguintes
Feitos:
Primeiro. O 13.9.2021 a CMMVVMC de Recarei presentou un escrito (REXEL 2021/2147188) no que solicitan a aprobación dun deslindamento coa CMMVVMC de Seoane.
Coa solicitude achegou a seguinte documentación:
– Acta de recoñecemento do lindeiro.
– Acto de avinza.
– Acta de conciliación levantada no Xulgado de Primeira Instancia de Bande.
– Certificacións de aprobación das respectivas asembleas xerais.
– Arquivos gráficos.
Segundo. O informe do Servizo de Montes da Xefatura Territorial de Ourense con data do 4 de novembro de 2022 fai constar que dos 9 puntos (numerados de 0 a 8) marcados no campo para deslindar os montes Outeiro Recarei e Lamas de Mourijos e Portela non se poden ter en conta na súa totalidade, pois non todos forman parte da liña de deslindamento pretendida. É preciso desbotar o punto número 0, que define ata o punto número 1 o tramo de deslindamento entre a comunidade de Seoane e parcelas particulares, e o punto número 8 no que conflúen tres montes veciñais, titularidade doutras tantas comunidades (Seoane, Recarei e Sarreaus); para a aceptación deste punto, nº 8, é necesario a conformidade da comunidade de Sarreaus.
Na acta de conciliación das comunidades de Seoane e Recarei reflíctese a observación citada anteriormente e aínda que se nomean os nove puntos, queda claro que a liña de deslindamento entre os MMVVMC Lamas de Mourijos e Portela e Uzal e Outeiro Recarei vai desde o punto 1 ata o 7.
O citado informe considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia, polo que propón ao Xurado Provincial a súa aprobación.
Consideracións legais e técnicas:
Primeiro. A presente resolución dítase o abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.
Segundo. O artigo 53 da Lei 7/2012, do 28 de xuño, de montes de Galicia recolle o procedemento a seguir no deslindamento entre montes veciñais en man común e establece que o xurado provincial de montes veciñais en man común, logo do exame da documentación presentada, ditara resolución que será publicada no Diario Oficial de Galicia e notificada ás comunidades interesadas.
De acordo cos feitos e fundamentos de dereito expostos, e tendo en conta o informe favorable do Servizo de Montes do día 4 de novembro de 2022, o Xurado Provincial de Montes Veciñais en Man Común acordou por unanimidade o día 27 de febreiro de 2023:
Aprobar o acto de conciliación acadado polas xuntas reitoras dos MVMC Uzal e Outeiro Recarei, pertencente á CMMVVMC de Recarei; e do MVMC Lamas de Mourijo e Portela, pertencente á CMMVVMC de Seoane, no concello de Bande.
Contra esta resolución, que pon fin á vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.
Ourense, 21 de marzo de 2023
Luis Jorge Álvarez Ferro
Presidente do Xurado Provincial de Clasificación de Montes
Veciñais en Man Común de Ourense