A Consellería do Medio Rural, a través da Dirección Xeral de Defensa do Monte, é beneficiaria principal do proxecto Interlumes, dentro do Programa de cooperación Interreg V-A España-Portugal (POCTEP) 2014-2020.
O obxectivo do proxecto Interlumes é reforzar a capacidade operativa de resposta á extinción de incendios forestais na fronteira hispano-lusa, fundamentalmente a través da construción da primeira base de medios aéreos transfronteirizos, que permitirá dar unha resposta máis áxil e eficaz na loita contra o lume.
Mediante a Resolución da Dirección Xeral de Defensa do Monte, do 20 de setembro de 2022, aprobouse provisionalmente o proxecto de construción acompañado da relación de parcelas necesarias para a súa construción.
O día 4 de novembro de 2022 publicouse no Diario Oficial de Galicia, número 210, o Anuncio do 26 de outubro de 2022 polo que se somete a información pública o proxecto de construción da base aérea, así como a relación individual de bens, dereitos e persoas propietarias afectados polo referido proxecto.
Esta base aérea proxéctase nos concellos de Verín e Oímbra e prevé a construción dun aeródromo cunha pista de 1.220 m de lonxitude e 80 m de largo, con aparcadoiro para seis aeronaves de carga en terra e preparada para operar avións tipo Canadair 215; un heliporto con estacionamento para catro helicópteros; instalacións de carga de combustible e auga; torre de control; edificacións para as tripulacións e as brigadas helitransportadas; servizos xerais (accesos, aparcamentos, abastecemento, saneamento, enerxía eléctrica) e cerramento.
Na Comunidade Autónoma de Galicia, a competencia para a declaración de urxente ocupación para os efectos da construción de infraestruturas preventivas para a defensa contra os incendios forestais está regulada pola Lei 3/2007, do 9 de abril, de prevención e defensa contra os incendios forestais de Galicia, que establece no artigo 18.5 que se declaran de utilidade pública as infraestruturas e os equipamentos preventivos vinculados á defensa e loita contra os incendios forestais, para os efectos da expropiación forzosa dos bens e dereitos necesarios para a súa construción e instalación. Indica, así mesmo, que será a dirección xeral competente por razón da materia quen elaborará o proxecto, acompañado da relación individualizada de bens e dereitos que se consideren de necesaria expropiación; que se solicitarán os informes sectoriais afectados e se someterá a información pública, e que, concluída esta tramitación, a persoa titular da consellería competente acordará a declaración de utilidade pública, sen prexuízo da competencia do Consello da Xunta en caso de oposición por parte doutros organismos sectoriais.
A declaración de utilidade pública comportará a necesidade de ocupación dos bens e adquisición dos dereitos afectados e a imposición de servidumes de paso de enerxía e outras necesarias para a execución do proxecto, o que permitirá iniciar o procedemento para a súa urxente ocupación para os efectos do previsto na lexislación de expropiación forzosa.
De acordo co exposto, por proposta do director xeral de Defensa do Monte e facendo uso das atribucións que me confire a Lei 3/2007, do 9 de abril, de prevención e defensa contra os incendios forestais de Galicia,
DISPOÑO:
Artigo 1. Aprobación do proxecto de construción
Aprobar, con carácter definitivo, o trámite de información pública e o proxecto de construción da base aérea transfronteiriza nos concellos de Verín e Oímbra.
Artigo 2. Declaración de utilidade pública
Declarar, en concreto, a utilidade pública e a urxente ocupación, para os efectos de expropiación forzosa, dos bens e dereitos que se concreten no expediente administrativo instruído, así como en calquera das modificacións que sexa necesario efectuar para a execución do proxecto de construción dunha base de medios aéreos transfronteiriza, no marco do proxecto Interlumes, nos concellos de Verín e Oímbra.
Disposición derradeira primeira. Habilitación
A persoa titular da Dirección Xeral de Defensa do Monte ditará as resolucións precisas e promoverá os trámites administrativos necesarios para a execución do expediente de expropiación forzosa.
Disposición derradeira segunda. Entrada en vigor
Esta orde entra en vigor o día da súa publicación no Diario Oficial de Galicia.
Santiago de Compostela, 20 de marzo de 2023
José González Vázquez
Conselleiro do Medio Rural