Tras a aprobación do texto inicial, e unha vez finalizado o trámite de información pública (DOG núm. 156, do 11 de agosto de 2022), na sesión ordinaria que tivo lugar o día 28 de novembro de 2022, a Corporación municipal en pleno acordou ratificar o texto definitivo do convenio urbanístico de planeamento para a ordenación urbanística dos sectores de solo urbanizable nº 11, 14 e 27 do PXOM.

En cumprimento do punto terceiro do acordo plenario, procédese á publicación do texto íntegro do convenio.

Sanxenxo, 14 de decembro de 2022

Telmo Martín González
Alcalde

Texto definitivo do convenio urbanístico de planeamento para a ordenación urbanística dos sectores de solo urbanizable nº 11, 14 e 27 do Plan xeral de ordenación municipal de Sanxenxo

Na Casa do Concello de Sanxenxo, o 12 de decembro de 2022.

Reunidos:

Dunha parte, Telmo Martín González, maior de idade, con DNI número * e domicilio para os efectos deste convenio na rúa de Madrid 1, CP 36960, de Sanxenxo.

E doutra parte, Marta de Santos Sánchez, maior de idade, con DNI número * e domicilio para os efectos deste convenio na rúa da Costa Brava, 12, CP 28034, de Madrid.

Interveñen:

O primeiro, na súa condición de alcalde presidente do Concello de Sanxenxo.

A segunda, en nome e representación da mercantil Serviland Gestión Urbanística, S.L., de nacionalidade española, con CIF B-16883282, e con domicilio na avenida de Burgos, nº 12, 28036 Madrid, constituída mediante escritura autorizada polo notario de Barcelona Emilio Roselló Carrión, o día 13 de setembro de 2021, baixo o número 3.043 da súa orde de protocolo, e inscrita no Rexistro Mercantil de Madrid no tomo 42392, folio 151, folla M-750253; actúa esta última por conta da Entidade de nacionalidade española denominada Sociedad de Gestión de Activos Procedentes de la Reestructuración Bancaria, Sociedad Anónima (en diante, Sareb ou Sareb, S.A.), provista de CIF número A-86602158, domiciliada en Madrid, na rúa da Costa Brava, 12, CP 28034.

Actúa na súa calidade de apoderada da referida entidade, cuxas facultades e representación resultan das seguintes escrituras de poder:

1. Escritura de apoderamento do 14 de outubro de 2021, outorgada ante o notario do Ilustre Colexio de Madrid Luis Manuel González Martínez, baixo o número 915 da súa orde de protocolo.

2. Escritura de elevación a público de acordo social de concesión de poder outorgada o 3 de decembro de 2021, ante o notario de Cataluña Emilio Roselló Carrión, baixo o número 4.426 da súa orde de protocolo.

Achégase como anexo 1 a documentación acreditativa das representacións aludidas.

En diante, Sareb será aludida indistintamente como Sareb ou a Propiedade.

Ambas as partes se recoñecen, respectivamente, a capacidade, competencia e representación necesarias para o outorgamento deste convenio urbanístico, e para ese efecto

EXPOÑEN:

I. Oportunidade de modificación do vixente PXOM de Sanxenxo.

O Plan xeral de ordenación municipal de Sanxenxo (en diante, PXOM) foi aprobado definitivamente polo Pleno municipal en sesión ordinaria que tivo lugar o día 27 de febreiro de 2003. Nel delimitáronse trinta sectores de solo urbanizable indicáronse as características, parámetros urbanísticos e condicións de desenvolvemento de cada un deles.

Dos trinta sectores urbanizables delimitados, tan só catro (o SU-3, o SU-7, o SU-15 e o SU-28) concluíron o seu desenvolvemento urbanístico, que acadaron a condición de solo urbano consolidado tras recibirse as obras de urbanización dos respectivos ámbitos.

Con todo, desde a aprobación do vixente PXOM de Sanxenxo (ano 2003) a normativa urbanística e sectorial foi obxecto de non poucas alteracións, co resultado de que o planeamento municipal non se encontra plenamente adaptado a ela.

Neste contexto, é vontade do Concello de Sanxenxo mellorar a ordenación urbanística no seu día aprobada, na procura de estándares urbanísticos e edificatorios sustentables, a creación de espazos públicos de calidade e a mellora da integración ambiental e paisaxística, adaptada á capacidade residencial do concello e ás exixencias normativas actuais, e é necesario evitar e, de ser o caso, reformular, os desenvolvementos urbanísticos con alta incidencia paisaxística.

Entre os sectores de solo urbanizable, o PXOM delimita os ámbitos identificados como SU-11 Altos de Miraflores, SU-14 Monte Faro e SU-27 Altamira-Vilalonga (en diante, SU-11, SU-14 e SU-27), cuxa situación física, xurídica e urbanística xustifica, polas razóns que se desenvolven en detalle ao longo deste convenio, a modificación da ordenación urbanística proxectada:

i. A preservación da paisaxe é un dos aspectos determinantes das propostas de ordenación que se plasmarán na modificación puntual do PXOM de Sanxenxo (en diante, MPPXOM) en relación co SU-14 e o SU-11.

ii. Por outra parte, é interese do Concello de Sanxenxo promover actuacións dirixidas á poboación residente, especialmente á poboación nova e á de maior idade, coa finalidade de facilitar o acceso á vivenda, no primeiro caso, e de promover espazos asistenciais que garantan o coidado das persoas maiores, no segundo; actuacións que se plasmarán na MPPXOM en relación co SU-27.

Neste escenario, as partes intervenientes neste documento consideran oportuno subscribir un convenio de planeamento preparatorio da futura MPPXOM en relación cos sectores de solo urbanizable SU-11, SU-14 e SU-27, debido á complexidade das actuacións proxectadas e a prol do interese xeral do municipio. Todo iso de conformidade co establecido no artigo 83 da Lei 2/2016, do 10 de febreiro, do solo de Galicia, e no artigo 200 do Decreto 143/2016, do 22 de setembro, polo que se aproba o Regulamento da Lei 2/2016, do 10 de febreiro, do solo de Galicia.

II. Antecedentes da situación urbanística destes sectores de solo urbanizable.

Os sectores de solo urbanizable obxecto deste convenio teñen os seguintes antecedentes:

• SU-11 Alto de Miraflores.

O daquela propietario único dos terreos incluídos no ámbito de actuación, Fadesa Inmobiliaria, S.A., promoveu o desenvolvemento urbanístico do ámbito coa formulación e tramitación do Plan Parcial, que foi obxecto de aprobación definitiva pola Xunta de Goberno Local en sesión do 4 de agosto de 2005, ratificado e validado polo Acordo plenario do 23 de decembro de 2005.

Iniciouse a continuación a execución do plan coa formulación e tramitación do proxecto de equidistribución a través do sistema de concerto, formalizado en escritura pública autorizada polo notario de Cambados Francisco M. Botana Torrón, o 14 de novembro de 2005, de conformidade coas determinacións previstas nos artigos 150 a 153 da daquela vixente Lei 9/2002, do 30 de decembro, de ordenación urbanística e protección do medio rural de Galicia.

Formulouse, así mesmo, o proxecto de urbanización, aprobado definitivamente con data do 24 de maio de 2007. No ano 2008, con motivo da crise inmobiliaria, paralizouse o desenvolvemento do ámbito e non se chegou a comezar a execución das obras de urbanización.

A pesar da súa alta incidencia paisaxística, o SU-11 queda fóra do ámbito de aplicación do Plan de ordenación do litoral (en diante, POL), aprobado polo Decreto 20/2011, do 10 de febreiro, da Consellería de Medio Ambiente, Territorio e Infraestruturas da Xunta de Galicia, dado o seu desenvolvemento anterior á aprobación do citado instrumento de ordenación territorial.

• SU-14 O Faro.

Mediante o Acordo plenario do 28 de xullo de 2009 foi aprobado definitivamente o Plan parcial de ordenación do sector SU-14 que, con todo, foi anulado pola Sentenza do Tribunal Superior de Xustiza de Galicia do 5 de febreiro de 2015, ratificada polo Tribunal Supremo o 29 de xullo de 2016.

Os tribunais (TSXG e TS) inciden (ademais de noutros aspectos legais e urbanísticos recollidos na memoria ambiental e analizados nas sentenzas), nos aspectos relativos á protección da paisaxe que, segundo se indicaba, foron determinantes para invalidar o Plan parcial do Monte Faro.

O marco vixente constitúeno as determinacións do PXOM de Sanxenxo que, con todo, se deben adaptar aos criterios e ás normas do POL, que lle outorga un grao 2 de compatibilidade.

• SU-27 Altamira-Vilalonga.

O Plan parcial do sector SU-27, Altamira-Vilalonga, foi aprobado definitivamente polo Pleno da Corporación municipal o 20 de maio de 2006. Posteriormente, tramitáronse e aprobaronse os proxectos de reparcelamento e urbanización do ámbito, e chegou a iniciarse e a executarse unha porcentaxe significativa da obra, superior ao 50 %, momento en que a crise inmobiliaria motivou a súa paralización.

III. A titularidade de Sareb nos sectores de solo urbanizable SU-11, SU-14 e SU-27.

Nos sectores sinalados, SU-11, SU-14 e SU-27, Sareb é titular de terreos nas seguintes porcentaxes de superficie:

1. SU-11 Altos de Miraflores: Sareb é propietaria única de todos os terreos que integran o SU-11.

2. SU-14 O Faro: Sareb é propietaria maioritaria dos terreos (932 predios) que integran o SU-14, que representan unha porcentaxe aproximada do 67 % da superficie do sector.

3. SU-27 Altamira-Vilalonga: Sareb é propietaria maioritaria dos terreos con aproveitamento lucrativo (212 parcelas de resultado) que integran o SU-27, que representan unha porcentaxe aproximada do 98 % da superficie do sector.

IV. Coincidencia da vontade de ambas as partes.

O nivel de participación de Sareb na propiedade dos sectores citados, propietario único do sector SU-11 e propietario maioritario nos sectores SU-27 e SU-14, e a pretensión municipal de mellorar a integración paisaxística da ordenación, así como de potenciar o acceso á vivenda e aos servizos destinados aos mozos e á terceira idade, leva as partes a convir na necesidade de modificar o Plan xeral e a ordenación detallada xa aprobada e a considerar imprescindible a formalización dun convenio urbanístico de planeamento preparatorio debido á súa transcendencia e complexidade, polo que precisa a colaboración e o común acordo que se plasma neste convenio para abordar adecuadamente o proceso de transformación urbanística dos solos que nos ocupan.

V. A motivación deste convenio de planeamiento: o interese xeral inherente ás propostas de ordenación que se recollen.

Este convenio preparatorio da futura MPPXOM ten a súa motivación, tal e como se expuxo no expositivo primeiro, na vontade de ambas as partes de mellorar a ordenación urbanística no seu día aprobada en beneficio do interese paisaxístico, ambiental, social, turístico e económico do concello de Sanxenxo.

Así, sen prexuízo do detalle que se recolle na documentación anexa, con carácter específico para cada sector, o interese xeral xustifícase nos seguintes aspectos:

• SU-11 Altos de Miraflores.

Este sector caracterízase, nas súas cotas máis elevadas, por ser un enclave privilexiado, en que se proxectaban 414 vivendas acaroadas, cun alto grao de ocupación do solo e grande impacto paisaxístico.

A proposta de ordenación prevista para este sector fundaméntase na preservación dos valores naturais coa finalidade primordial de preservar o contorno en que se sitúa, con alta incidencia paisaxística.

Para iso, prevese unha transformación urbanística completa coa clasificación do 70 % a superficie do ámbito como solo rústico de especial protección forestal e a súa cualificación como zona verde, que será cedida ao Concello de Sanxenxo para uso e desfrute da poboación.

A cesión da propiedade formalizarase tras a aprobación definitiva e a entrada en vigor da modificación puntual do planeamento obxecto deste convenio. A restante superficie do actual SU-11, 42.648 m², continuará como solo urbanizable delimitado destinado á implantación de dez (10) vivendas unifamiliares illadas, situadas na cota intermedia do ámbito, procurando a súa integración paisaxística na zona.

• SU-14 O Faro. Integración na ordenación dun campo de golf.

No SU-14 prevese o desenvolvemento dunha ordenación con alta calidade paisaxística e ambiental, coa creación dun campo de golf en torno ao cal se proxectarán vivendas unifamiliares e plurifamiliares de baixa altura, con amplos espazos naturais para o recreo e o lecer que, xunto co campo de golf, supoñerán un valor engadido para o municipio.

A proposta de ordenación deste sector ten dous grandes puntos de interese xeral:

En primeiro lugar, ao reducirse os dereitos edificatorios da propiedade respecto do Plan parcial aprobado no seu día, ao reducirse o coeficiente de edificabilidade (de 0,48 m²/m² a 0,387 m²/m²), a edificabilidade total resultante e o aproveitamento tipo (de 0,136 ua/m² a 0,106 ua/m²).

Por outra parte, a implantación no seu ámbito dun campo de golf, pola súa singularidade en Galicia e relevancia para un municipio coa vocación turística de Sanxenxo, incide no interese xeral da modificación que se expón.

• SU-27 Altamira-Vilalonga.

As bases da futura ordenación detallada do SU-27 oriéntanse á creación de solo destinado a vivendas para mozos, con espazos libres públicos e privados de calidade e prevense, así mesmo, a reserva de solo para a implantación dunha residencia e/ou outros usos asistenciais para a terceira idade, co fin de garantir o benestar das persoas maiores.

Dada a localización deste sector no núcleo de Vilalonga e a súa idoneidade para acoller a demanda de vivenda da poboación residente no municipio, SU-27, compénsase parcialmente a significativa redución de edificabilidade que as partes propoñen para os dous sectores anteriores, cun lixeiro incremento do índice de edificabilidade (de 0,40 m²/m² a 0,438 m²/m²).

Este incremento compatibilízase, con todo, co aumento da superficie destinada a espazos libres públicos, que pasa dos 8.761 m² previstos no Plan parcial do ámbito, xa aprobado, aos 9.755 m² da proposta de ordenación incorporada a este convenio.

O obxectivo desta actuación é xerar un produto inmobiliario alcanzable á poboación nova do municipio, con maior dificultade na actualidade para acceder á primeira vivenda. A proposta de ordenación apunta, pois, a este obxectivo, prioritario na política de vivenda do Concello.

Así mesmo, a tipoloxía edificatoria de vivenda unifamiliar acaroada en ringleira, allea ao medio e á paisaxe de Sanxenxo, con alta ocupación do solo, substitúese por un produto máis sustentable.

En definitiva, as ordenacións detalladas que se propoñen para a futura modificación do PXOM supoñen unha redución substancial do aproveitamento urbanístico da propiedade e un paralelo incremento da superficie destinada a espazos libres de titularidade pública e privada, que se concretan no seguinte resumo:

SU-11
Parámetros	Plan parcial en vigor	Modificación puntual do plan parcial
Ámbito	138.236,00	139.230,00	m²
Superficie do sector unha vez descontado solo rústico adscrito	138.236,00	42.648,00
Edificabilidade	0,35	0,10	m²/m²
Edificabilidade total	48.382,60	4.264,80	m²
Densidade de vivendas	30,00	2,35	viv/ha
Número máximo de vivendas	414	10	vivendas
Espazos libres públicos	14.823,93	100.846,80	m²

SU-14
Parámetros	Plan parcial en vigor	Modificación puntual do plan parcial
Ámbito	1.347.604,00	1.485.705,00	m²
Superficie do sector unha vez descontado solo rústico adscrito	336.901,00	404.969,00
Edificabilidade	0,48	0,387684	m²/m²
Edificabilidade total	161.721,00	157.000,00	m²
Densidade de vivendas	10,00	8,68	viv/ha
Número máximo de vivendas	1.347	1.290	vivendas
Espazos libres públicos + campo de golf	1.073.920,00	1.222.538,00	m²

SU-27
Parámetros	Plan parcial en vigor	Modificación puntual do plan parcial
Ámbito	85.651,00	85.651,00	m²
Superficie do sector unha vez descontado solo rústico adscrito	82.072,00	82.072,00
Edificabilidade	0,40	0,43864	m²/m²
Edificabilidade total	32.828,00	36.000,00	m²
Densidade de vivendas	25,00	37,94	viv/ha
Número máximo de vivendas	214	325	vivendas
Espazos libres públicos	8.761,00	9.755,00	m²

TOTAL SU-11 + SU-14 + SU-27
Parámetros	Plan parcial en vigor	Modificación puntual do plan parcial
Ámbito	1.571.491,00	1.710.586,00	m²
Edificabilidade	Entre 0,35 – 0,48	Entre 0,10 – 0,43864	m²/m²
Edificabilidade total	242.931,60	197.264,80	m²
Densidade de vivendas	Entre 10 – 30	Entre 2,35 – 37,94	viv/ha
Número máximo de vivendas	1.975	1.625	vivendas
Espazos libres públicos + campo de golf	1.097.504,93	1.333.139,80	m²

Logo de recoñeceren as partes comparecentes capacidade para outorgar este documento, conveñen a formalización do convenio urbanístico de planeamento para a ordenación urbanística dos sectores de solo urbanizable SU-11, SU-14 e SU-27, que levan a efecto a teor das seguintes

Estipulacións:

Primeira. Natureza e obxecto do convenio

1. Este documento ten a natureza de convenio urbanístico de planeamento, de conformidade co previsto no artigo 165 e seguintes da Lei 2/2016, do solo de Galicia, e 398 e seguintes do Regulamento que a desenvolve (RLSG), preparatorio e de carácter non vinculante da resolución que se deba adoptar no procedemento de modificación do plan en vigor.

2. O obxecto deste convenio é a preparación da futura MPPXOM para a inclusión nela das propostas de ordenación detallada dos ámbitos SU-11, SU-14 e SU-27, todo iso co obxecto de colaborar no desenvolvemento urbanístico do municipio.

3. Nos ámbitos para os que se propón esta ordenación detallada, e para os efectos do previsto no artigo 398.1.2º do RLSG, Sareb ten unha cota de propiedade de:

i. SU-11 Altos de Miraflores: 100 % da propiedade.

ii. SU-14 O Faro: 67 % aproximadamente da propiedade.

iii. SU-27 Altamira-Vilalonga: 98 % aproximadamente da propiedade privada.

4. Forman parte deste convenio urbanístico e, polo tanto, do réxime de reciprocidade obrigacional convido polas partes, os documentos anexos que conteñen a proposta de ordenación urbanística detallada; en concreto, o anexo 2, que contén a proposta de ordenación detallada do SU-11, o anexo 3, que contén a proposta de ordenación detallada do SU-14, e o anexo 4, que contén a proposta de ordenación detallada do SU-27.

Estas propostas teñen o carácter dunha alternativa que se axusta e responde aos intereses e obxectivos de ambas as partes, aínda que durante a tramitación da modificación puntual do planeamento poderán ser obxecto de adaptacións ou precisións derivadas do maior grao de detalle e de requirimentos ou suxestións das administracións sectoriais.

Segunda. Obrigas das partes

1. Coa sinatura deste convenio urbanístico, o Concello de Sanxenxo manifesta a súa conformidade con que a proposta de ordenación urbanística detallada dos sectores de solo urbanizable SU-11, SU-14 e SU-27, recollida na documentación anexa, se inclúa no documento de modificación puntual do PXOM de Sanxenxo que para o efecto se tramite, sen prexuízo das adaptacións e modificacións que sexa preciso incorporar como consecuencia dos informes sectoriais emitidos durante a tramitación.

Para ese efecto, a Propiedade remitirá ao Concello a documentación técnica necesaria para a tramitación da dita modificación puntual.

O Concello de Sanxenxo comprométese a tramitar a documentación presentada, incluíndo os compromisos e as estipulacións contidas neste convenio, que teñen natureza preparatoria e non vinculan a resolución que se deba adoptar no procedemento de aprobación ou alteración do plan en vigor, e a Administración conserva a plena potestade de planeamento por razóns de interese público.

Para estes efectos, o Concello comprométese a efectuar as tramitacións que dependen del coa mellor dilixencia e celeridade posible; a aprobación provisional da MPPXOM débese acadar nun prazo non superior a vinte e catro (24) meses desde a solicitude de inicio do procedemento de avaliación ambiental estratéxica, prorrogable por períodos de seis (6) meses, por causas alleas e xustificables polo Concello.

Estes fitos que dependen do Concello son, sen ánimo exhaustivo, os seguintes:

1) Remisión á Xunta de Galicia do documento de inicio da avaliación ambiental estratéxica e borrador do plan.

2) Aprobación inicial da MPPXOM.

3) Tras finalizar o período de alegacións, remisión ao órgano ambiental da proposta do plan xunto co expediente de avaliación ambiental estratéxica completo.

4) Tras a incorporación do contido da declaración ambiental estratéxica ao plan, aprobación provisional da MPPXOM e remisión do expediente á Xunta de Galicia para a aprobación definitiva.

2. A Propiedade está obrigada a cooperar co Concello de Sanxenxo e a facilitar a documentación que sexa necesaria para a definición da mellor ordenación posible.

Ademais, está obrigada a achegar a documentación precisa para a tramitación deste expediente e a colaborar co Concello para viabilizar a aprobación do instrumento de planeamento e os ulteriores procedementos de execución xurídica e física dos sectores de referencia. Para ese efecto, manterá os contactos que resulten necesarios cos organismos públicos que interveñen na tramitación destes instrumentos, co resto dos propietarios nos ámbitos de actuación, asociacións, e outros organismos con competencias que incidan no desenvolvemento das respectivas actuacións.

3. A Propiedade está obrigada a ceder ao Concello de Sanxenxo a titularidade dos terreos do actual SU-11 que pasen a ter a clasificación de solo rústico de especial protección forestal, cesión que se formalizará no prazo máximo de dous meses desde a entrada en vigor da modificación puntual da cal é preparatoria este convenio, e o Concello asumirá os gastos que comporte a formalización da transmisión dos terreos de referencia.

Terceira. Formalización e perfeccionamento

A formalización e o perfeccionamento deste convenio urbanístico levarase a cabo de conformidade co previsto nos artigos 401 a 403 do Decreto 143/2016, do 22 de setembro, que aproba o Regulamento da Lei 2/2016, do 10 de febreiro, do solo de Galicia.

Cuarta. Vixencia do convenio

Dada a natureza xurídica deste documento como convenio de planeamento, subordinado e incardinado no procedemento de modificación do vixente Plan xeral de ordenación municipal de Sanxenxo, a súa vixencia queda supeditada á aprobación definitiva deste último, de tal forma que, no caso de que finalmente non se aprobe o instrumento de planeamento, o convenio se entenderá automaticamente resolto, sen que poida comportar enriquecemento inxusto de ningunha das partes.

Quinta. Extinción e resolución do convenio

Será causa de extinción deste convenio o cumprimento das actuacións que constitúen o seu obxecto ou incorrer en causa de resolución deste.

Serán causas da súa resolución, ademais das contidas nas estipulacións anteriores:

a) O non perfeccionamento do convenio coa sinatura polas partes interesadas do texto definitivo aprobado pola Administración municipal no prazo de quince días seguintes ao da notificación da aprobación. Transcorrido este prazo sen que o convenio fose asinado, quedará sen efecto.

b) A non aprobación do instrumento de planeamento.

c) O acordo unánime de todos os asinantes expresado por escrito.

d) O incumprimento das obrigacións e compromisos asumidos por parte dalgún dos asinantes.

Sexta. Efectos da resolución do convenio

No caso de resolución do convenio por calquera das causas recollidas na cláusula quinta, este convenio entenderase automaticamente resolto, sen que poida comportar enriquecemento inxusto de ningunha das partes.

Sétima. Transmisión da propiedade

1. En caso de transmisión parcial ou total pola Sareb dos solos de referencia, o adquirente quedará subrogado na posición xurídica daquela, con asunción da totalidade dos dereitos e obrigacións que derivan deste convenio, o cal deberá formar parte integrante do título de transmisión.

2. Así mesmo, e para este suposto, deberase poñer en coñecemento do Concello de Sanxenxo o feito da transmisión, con presentación de copia autorizada da escritura de transmisión de dominio e subrogación do adquirente nos dereitos e obrigacións derivados deste convenio urbanístico.

3. Non obstante o disposto nos puntos anteriores, dada a común vontade das partes intervenientes neste convenio, baseada no real impulso conxunto dos desenvolvementos urbanísticos dos solos que nos ocupan, a Sareb comprométese a non transmitir estes ata que se produza a aprobación provisional da MPPXOM, ou ben, nun prazo de catro (4) anos desde a formalización deste convenio, primando o citado prazo de catro anos sobre o anterior (aprobación provisional da MPPXOM) no caso de que esta non se produza no prazo indicado.

Lido este documento, xunto cos documentos anexos que forman parte del, en proba de conformidade co seu contido, os comparecentes asínano, por duplicado e para un só efecto, no lugar e na data ao principio expresados; estes someteranse expresamente, para cantas controversias poidan xurdir respecto á interpretación total ou parcial deste contrato, á xurisdición dos xulgados e tribunais do domicilio onde se encontran os inmobles obxecto deste convenio.

Polo Concello de Sanxenxo Asdo.: Telmo Martín González

Pola Sareb Asdo.: Marta de Santos Sánchez

ANEXO 1

Escritura de apoderamento do 14 de outubro de 2021, outorgada ante o notario do Ilustre Colexio de Madrid Luis Manuel González Martínez, baixo o número 915 da súa orde de protocolo.

Escritura de elevación a público de acordo social de concesión de poder outorgada o 3 de decembro de 2021, ante o notario de Cataluña Emilio Roselló Carrión, baixo o número 4.426 da súa orde de protocolo.