O Decreto 25/2001, do 18 de xaneiro, polo que se regulan a organización e o funcionamento do Consello Galego de Cooperativas, en desenvolvemento das previsións contidas na súa norma de creación, a Lei 5/1998, do 18 de decembro, de cooperativas de Galicia, regula no seu artigo 4 a composición do Consello, no artigo 5, o procedemento de nomeamento e cesamento dos seus membros, e no artigo 6, a duración do mandato e substitucións.

Os actuais membros do Consello Galego de Cooperativas foron nomeados pola Orde do 16 de outubro de 2017 pola que se procede ao nomeamento de membros do Consello Galego de Cooperativas, e polas ordes do 27 de xuño de 2018, do 4 de setembro de 2018, do 7 de novembro de 2019, do 2 de marzo de 2020, do 16 de novembro de 2020, do 3 de xuño de 2021, do 9 de agosto de 2021 e do 1 de febreiro de 2022, polas que se procedeu ao cesamento e nomeamento de membros do Consello Galego de Cooperativas.

Consonte os artigos 4.1 e 5.2 do Decreto 25/2001, representan as cooperativas de Galicia sete membros que son nomeados e cesados pola presidencia do Consello por proposta das unións, federacións e confederacións en que aquelas se integran.

Segundo o artigo 6 da dita norma regulamentaria, os representantes do cooperativismo serán nomeados por un período máximo de 4 anos, sen prexuízo da súa reelección e da posibilidade de substitución dos titulares ou suplentes durante o mencionado período, por iniciativa da entidade que os propuxo.

O 26 de decembro de 2022, a Unión de Cooperativas Galegas de Transporte (Ucogatra) comunicou que o seu Consello Reitor acordara por unanimidade designar representante titular da entidade no Consello Galego de Cooperativas a Juan López Varela, en substitución do actual.

En consecuencia, en virtude das facultades que me confire o artigo 38 da Lei 1/1983, do 22 de febreiro, reguladora da Xunta de Galicia e da súa Presidencia, e o artigo 5 do Decreto 25/2001, do 18 de xaneiro, polo que se regulan a organización e o funcionamento do Consello Galego de Cooperativas, na calidade de presidenta do Consello Galego de Cooperativas,

RESOLVO:

Primeiro. Cesar a Carlos Laya Vía como vogal titular do Consello Galego de Cooperativas, en representación da Unión de Cooperativas Galegas de Transporte.

Segundo. Nomear a Juan López Varela como vogal titular do Consello Galego de Cooperativas, en representación da Unión de Cooperativas Galegas de Transporte.

Contra esta orde poderase interpoñer, potestativamente, recurso de reposición ante a conselleira de Promoción do Emprego e Igualdade no prazo dun mes contado desde o día seguinte ao da súa publicación, de conformidade co establecido no artigo 123 da Lei 39/2015, do 1 de outubro, do procedemento administrativo común das administracións públicas, ou interpoñer directamente recurso contencioso-administrativo ante o Tribunal Superior de Xustiza de Galicia, no prazo de dous meses contados desde o día seguinte ao da súa publicación, de conformidade co establecido no artigo 46 da Lei 29/1998, do 13 de xullo, reguladora da xurisdición contencioso-administrativa.

Santiago de Compostela, 7 de febreiro de 2023

Mª Jesús Lorenzana Somoza
Conselleira de Promoción do Emprego e Igualdade