Examinado o expediente de declaración de interese galego e inscrición no Rexistro de Fundacións de Interese Galego da Fundación Nueva Pescanova, dítase a presente resolución baseada nos feitos e fundamentos que se expoñen a continuación:
Feitos:
1. O 4 de outubro de 2022, José Rodríguez González, na súa condición de secretario do padroado da Fundación, presentou solicitude de clasificación, declaración de interese galego e a súa correspondente inscrición no Rexistro de Fundacións de Interese Galego.
2. A Fundación Nueva Pescanova constituíuna a entidade Nueva Pescanova, S.L., representada por José Rodríguez González, mediante escritura pública outorgada o 1 de setembro de 2022, en Vigo (Pontevedra), ante o notario José Luis Espinosa de Soto, co número de protocolo 2.192.
3. A Fundación, segundo consta no artigo 5 dos seus estatutos, ten como fins o fomento, o financiamento, o desenvolvemento e a execución de todo tipo de actividades que, en relación coas actividades pesqueiras, acuícolas, de elaboración e comercialización dos produtos do mar contribúan:
a) Ao desenvolvemento sustentable nas súas vertentes social, ambiental e económica.
b) Á súa investigación, desenvolvemento e innovación e á divulgación dos seus aspectos técnicos, científicos, nutricionais, sociais e culturais.
4. Na escritura de constitución constan os aspectos relativos á personalidade do fundador Nueva Pescanova, S.L. á súa capacidade e vontade de constituír a Fundación conforme os preceptos da Lei 12/2006, do 1 de decembro, de fundacións de interese galego.
5. Nos estatutos da Fundación consta a súa denominación e natureza; o seu domicilio, obxecto e finalidade; as regras para a aplicación das súas rendas aos fins fundacionais e para a determinación dos seus beneficiarios, e a designación do padroado inicial.
6. O padroado inicial da Fundación está formado pola entidade Nueva Pescanova, S.L., representada por José María Benavent Valero, como presidente; José Rodríguez González, como secretario; Alfonso María Gordón García, Ángel Matamoro Irago e Javier Carral Martínez, como vogais.
7. A Comisión integrada polos secretarios xerais técnicos de todas as consellerías elevoulle ao vicepresidente segundo e conselleiro de Presidencia, Xustiza e Deportes proposta de clasificación como de interese para o fomento da economía social e o desenvolvemento da economía produtiva de Galicia da Fundación Nueva Pescanova, con base nas materias que constitúen o seu obxecto fundacional, polo que, cumpríndose os requisitos exixidos na lei e de conformidade co establecido nos artigos 51 do Decreto 14/2009, do 21 de xaneiro, polo que se aproba o regulamento de fundacións de interese galego; e 7 do Decreto 15/2009, do 21 de xaneiro, polo que se aproba o regulamento no Rexistro de Fundacións de Interese Galego, o protectorado será exercido pola Consellería do Mar.
8. Por Orde da Vicepresidencia Segunda e Consellería de Presidencia, Xustiza e Deportes do 9 de decembro de 2022 (DOG Núm. 242, do 22 de decembro), a Fundación Nueva Pescanova clasificouse de interese para o fomento da economía social e o desenvolvemento da economía produtiva de Galicia e adscribiuse ao protectorado da Consellería do Mar.
Fundamentos de dereito:
Primeiro. O artigo 34 da Constitución española recoñece o dereito de fundación para fins de interese xeral, e o artigo 27.26 do Estatuto de autonomía de Galicia establece que é competencia exclusiva da Comunidade Autónoma galega o réxime das fundacións de interese galego.
Segundo. De acordo co disposto no artigo 7.2 do Decreto 15/2009, do 21 de xaneiro, polo que se aproba o Regulamento de fundacións de interese galego, en relación co Decreto 50/2021, do 11 de marzo, polo que se aproba a estrutura orgánica da Consellería do Mar, correspóndelle a esta consellería a declaración de interese galego mediante resolución publicada no Diario Oficial de Galicia e a inscrición no Rexistro de Fundacións de Interese Galego da Fundación Nueva Pescanova, así como o exercicio das funcións de protectorado e as demais que correspondan á Xunta de Galicia de conformidade co indicado no dito regulamento.
Terceiro. Á vista do disposto na Lei 12/2006, do 1 de decembro, de fundacións de interese galego, no Decreto 14/2009, do 21 de xaneiro, polo que se aproba o Regulamento de fundacións de interese galego e no Decreto 15/2009, do 21 de xaneiro, polo que se aproba o Regulamento do rexistro de fundacións de interese galego, resultan cumpridos os requisitos establecidos pola normativa vixente para a declaración de interese galego da Fundación Nueva Pescanova, polo que á vista da proposta de resolución formulada polo Servizo Técnico Xurídico do 24 de xaneiro de 2023,
Resolvo:
1. Declarar de interese galego a Fundación Nueva Pescanova.
2. Ordenar a súa inscrición no Rexistro de Fundacións de Interese Galego, sección da Consellería do Mar.
3. Esta fundación queda sometida ao disposto na Lei 12/2006, do 1 de decembro, de fundacións de interese galego, ao Decreto 14/2009, do 21 de xaneiro, polo que se aproba o regulamento de fundacións de interese galego; e ao Decreto 15/2009, do 21 de xaneiro, polo que se aproba o Regulamento do rexistro de fundacións de interese galego, así como a demais normativa que resulte de aplicación, onde se establecen especialmente as obrigas de dar publicidade suficiente do seu obxecto de actividades, a ausencia de ánimo de lucro na prestación dos seus servizos, así como a presentación anual da documentación contable e plan de actuación ante o protectorado, que será exercido pola Consellería do Mar.
Contra esta resolución, que non pon fin á vía administrativa, pódese interpoñer recurso de alzada ante a conselleira do Mar no prazo dun mes contado desde o día seguinte ao da súa publicación, segundo os artigos 121 e 122 da Lei 39/2015, do 1 de outubro, do procedemento administrativo común das administracións públicas.
Santiago de Compostela, 24 de xaneiro de 2023
Silvia Cortiñas Fernández
Secretaria Xeral técnica da Consellería do Mar