Mediante a Resolución do 25 de novembro de 2021, publicada o 9 de decembro no Diario Oficial de Galicia (DOG), convocouse un proceso selectivo para ingresar como persoal laboral fixo do grupo II na categoría de técnico/a medio de tecnoloxías da información e comunicacións (TMTIC) polo sistema de promoción interna.
As únicas persoas presentadas e admitidas son José Luis Martínez Pérez e Agustín Outeiral Barbazán, tal e como consta na relación provisional de persoas admitidas e excluídas, publicada no DOG do 19 de abril de 2022. Ambos os candidatos cumprían o requisito de ser persoal laboral fixo de administración e servizos da Universidade de Vigo, encadrados no grupo III, na categoría de técnico especialista de tecnoloxías da información e comunicacións (TETIC).
Por outra parte, estas mesmas persoas participaron e superaron o proceso selectivo para a adquisición da condición de persoal funcionario de carreira, convocado mediante a Resolución do 10 de febreiro de 2022 (DOG do 22 de febreiro), negociado e desenvolvido no marco do Acordo de funcionarización do persoal laboral fixo de administración e servizos da Universidade de Vigo, do 5 de xullo de 2021, o cal establecía no artigo 8.B.1 un proceso específico:
A Universidade de Vigo realizará un proceso específico de funcionarización que permita, sempre que cumpran os requisitos de titulación establecidos no EBEP e na LEPG, promocionar do grupo III ao subgrupo A2 de PAS funcionario ao persoal laboral fixo das categorías de técnico/a especialista de tecnoloxías da información e comunicacións e de técnico/a especialista de laboratorio, de conformidade co previsto na disposición adicional novena do II Convenio colectivo.
Como consecuencia, nun só proceso adquiriron a condición de funcionarios de carreira e promocionaron ao subgrupo de titulación superior, e tomaron posesión con efectos do 1 de novembro de 2022 na escala media de tecnoloxías da información e comunicacións.
Precisamente esta é a escala equivalente á categoría de persoal laboral obxecto da convocatoria en que participaron; noutras palabras, pola vía da funcionarización adquiriron a condición de funcionarios na escala do subgrupo equivalente. Neste sentido, o anexo II do Acordo de funcionarización (Integración en escalas funcionariais das categorías profesionais de persoal laboral) establece que a categoría de técnico/a medio de tecnoloxías da información e comunicacións se integra na escala técnica media de tecnoloxías da información e comunicacións, polo que, de desenvolver o proceso selectivo e de superalo os dous candidatos, accederían ao desempeño como persoal laboral dos mesmos postos en que actualmente desempeñan como persoal funcionario.
Finalmente, o 31 de outubro de 2022 conferíronselle efectos do 1 de novembro de 2022 á relación de postos de traballo do persoal de administración e servizos, polo que os postos de persoal laboral quedan significados pola súa condición de «a extinguir». Por conseguinte, a incorporación dos candidatos que superasen o proceso selectivo de persoal laboral tería que se facer obrigatoriamente como persoal funcionario da escala equivalente, isto é, a que xa posúen ambos os aspirantes.
Considerando o exposto, e consonte as atribucións legalmente conferidas, esta reitoría resolve declarar rematado o proceso selectivo para ingresar como persoal laboral fixo do grupo II na categoría de técnico/a medio de tecnoloxías da información e comunicacións, polo sistema de promoción interna.
Contra esta resolución, que esgota a vía administrativa, poderase interpoñer un recurso perante a xurisdición contencioso-administrativa, no prazo de dous meses contados desde o día seguinte ao da súa publicación, de conformidade co disposto na Lei 29/1998, do 13 de xullo, reguladora da xurisdición contencioso-administrativa.
Non obstante, as persoas interesadas poderán optar por interpoñer contra esta resolución un recurso de reposición, no prazo dun mes contado a partir do día seguinte ao da súa publicación, perante o mesmo órgano que a ditou. Neste caso, non se poderá interpoñer un recurso contencioso-administrativo ata que sexa resolto expresamente ou se produza a desestimación presunta do recurso de reposición interposto, segundo o previsto no artigo 123.2 da Lei 39/2015, do 1 de outubro, do procedemento administrativo común das administracións públicas.
Vigo, 13 de decembro de 2022
Manuel Joaquín Reigosa Roger
Reitor da Universidade de Vigo
