Visto o expediente para outorgamento das autorizacións administrativas previa e de construción da instalación eléctrica que a seguir se describe, tal e como se recolle no proxecto asinado en Ourense polo enxeñeiro industrial David Núñez Fernández, colexiado núm. 1534 do ICOIIG, o día 1.6.2022, quen acredita a súa habilitación e competencia mediante declaración responsable asinada o 17.6.2022.

Solicitante: UFD Distribución Electricidad, S.A.; CIF: A63222533.

Domicilio: A Batundeira, núm. 2, Velle, 32960 Ourense.

Denominación: substitución do CT 32CG80-Portela de Home.

Situación: concello de Lobios (Ourense).

Orzamento: 28.655,06 €.

Características técnicas:

– Instalación de novo apoio de tipo C-12-2000-H35-CA en fin de liña, sobre o que irá instalado o CTI proxectado. Cambio de condutor LA-30 a LA-56 no cantón afectado, así como do elemento SXS por XS en apoio anterior a CT. A reforma ten orixe no apoio núm. 28-101 existente, de tipo C 12/2000 da LMTA CCH807 (expediente 3412 AT), e final no apoio núm. 28-102-CT proxectado da LMTA CCH807.

– Substitución do CT de 30 kVA Portela de Home 32CG80 en caseta (expediente IN407A 2016-175-3), que pasa a CT a intemperie sobre o citado apoio proxectado, de 50 kVA e RT 20.000/400-230, illante en aceite mineral.

Cumpridos os trámites ordenados na Lei 24/2013, do 26 de decembro, do sector eléctrico, e no capítulo II, título VII, do Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica, e na Resolución da Consellería de Economía e Industria, do 19 de febreiro de 2014, pola que se aproba o procedemento de autorización administrativa de construción (DOG núm. 54, do 19 de marzo), así como na Lei 9/2021, do 25 de febreiro, de simplificación administrativa e de apoio á reactivación económica de Galicia (DOG núm. 39, do 26 de febreiro), esta xefatura territorial resolve:

Conceder as autorizacións administrativas previa e de construción ás ditas instalacións, cuxas características se axustarán en todas as súas partes ao proxecto arriba sinalado e ás condicións técnicas e de seguridade establecidas nos regulamentos de aplicación.

Esta autorización outórgase sen prexuízo das concesións e autorizacións que sexan necesarias, de acordo con outras disposicións que resulten de aplicación e en especial as relativas á ordenación do territorio e ao ambiente.

O prazo de posta en marcha das instalacións que se autorizan será seis meses, contado a partir da data da última autorización administrativa necesaria para a súa execución.

Contra esta resolución, que non é definitiva na vía administrativa, cabe interpor recurso de alzada ante o vicepresidente primeiro e conselleiro de Economía, Industria e Innovación no prazo dun mes, contado a partir do día seguinte ao da notificación ou publicación desta resolución, conforme o establecido no artigo 122 da Lei 39/2015, do 1 de outubro, do procedemento administrativo común das administracións públicas, sen prexuízo de que os interesados poidan interpoñer calquera outro recurso que xulguen pertinente.

Ourense, 7 de novembro de 2022

Alicia María López Míguez
Xefa territorial de Ourense