O 6 de xuño de 2022 a directora xeral da Axencia Galega de Desenvolvemento Rural resolveu o procedemento para a concesión das axudas tramitado ao abeiro da Resolución do 29 de decembro de 2021 pola que se aproban as bases reguladoras das subvencións para a creación, mellora e ampliación de servizos básicos locais en aldeas modelo e ámbitos territoriais vinculados aos instrumentos de recuperación da terra agraria, cofinanciadas co Fondo Europeo Agrícola de Desenvolvemento Rural no marco do Programa de desenvolvemento rural de Galicia 2014-2020, e se anuncia a convocatoria para o ano 2022 (DOG núm. 16, do 25 de xaneiro de 2022), modificada pola Resolución do 22 de febreiro de 2022 (DOG núm. 39, do 25 de febreiro).

Mediante a Resolución do 13 de xullo de 2022 (DOG núm. 136, do 18 de xullo) modificouse a Resolución do 29 de decembro de 2021 co fin, por unha banda, de prever a posibilidade de tramitar pagamentos anticipados e, por outra, para ampliar o prazo límite de execución dos investimentos subvencionados ata o 10 de decembro de 2022.

Estando os investimentos en fase de execución, e considerando nalgúns casos posibles demoras no ritmo de execución das obras e eventuais atrasos de carácter administrativo derivados da obtención dos permisos e autorizacións legalmente exixibles para a súa execución, cómpre prever unha nova ampliación do prazo de xustificación que permita, en calquera caso, a verificación do cumprimento dos requisitos fixados nas bases reguladoras dentro do exercicio orzamentario correspondente.

Tendo en conta o anterior, a directora xeral da Axencia Galega de Desenvolvemento Rural, no exercicio das competencias delegadas polo Acordo do Consello de Dirección da Axencia, do 11 de xullo de 2013, feito público mediante a Resolución do 24 de xullo de 2013 (DOG núm. 148, do 5 de agosto),

RESOLVO:

Artigo único. Modifícase a Resolución do 29 de decembro de 2021 pola que se aproban as bases reguladoras das subvencións para a creación, mellora e ampliación de servizos básicos locais en aldeas modelo e ámbitos territoriais vinculados aos instrumentos de recuperación da terra agraria, cofinanciadas co Fondo Europeo Agrícola de Desenvolvemento Rural no marco do Programa de desenvolvemento rural de Galicia 2014-2020, e se anuncia a convocatoria para o ano 2022 nos seguintes termos:

Un. Modifícase o artigo 5, que queda redactado como segue:

«O prazo límite para executar e xustificar os investimentos correspondentes á anualidade 2022 será o 15 de decembro de 2022».

Contra esta resolución, que pon fin á vía administrativa, cabe interpor potestativamente recurso de reposición ante o Consello de Dirección da Axencia Galega de Desenvolvemento Rural, no prazo dun mes contado desde o día seguinte ao da publicación desta resolución no DOG, ou recurso contencioso-administrativo ante o Xulgado do Contencioso-Administrativo de Santiago de Compostela, ao abeiro do artigo 10.1.a) da Lei 29/1998, do 13 de xullo, reguladora da xurisdición contencioso-administrativa, no prazo de dous meses contados desde o día seguinte ao da citada publicación no DOG.

Santiago de Compostela, 21 de novembro de 2022

Inés Santé Riveira
Directora xeral da Axencia Galega de Desenvolvemento Rural