O Pleno do Concello de Pontevedra, na sesión ordinaria que tivo lugar o 26 de maio de 2022, adoptou, entre outros, o seguinte acordo:

«(...) Primeiro. Desestimar as alegacións formuladas, ao abeiro da acción pública urbanística, por J. Ventura Bueno Julián no correspondente proceso de información pública do expediente 2017/ESTDETALLE/000003, con base no sinalado no informe proposta xurídico que serve de fundamento ao presente acordo, e prestar aprobación, con carácter definitivo, ao estudo de detalle formulado, mediante iniciativa particular, inicialmente polas entidades mercantís Sabadell Real Estate Development, S.L. e Buildingcenter, S.A.U., e nas cales se subrogaron as entidades Greip Activos Inmobiliarios, S.L.U. e Coral Homes, S.L., para o rueiro 46 A da unidade de actuación número 7 do PXOU de Pontevedra, instrumento redactado polos arquitectos Julio Daniel Rodríguez Rodríguez e Daniel Rivoira Zecca, datado en outubro de 2021, con entrada no Rexistro Xeral do Concello o 28 de marzo de 2022, baixo o número 2022013622, adaptado ás normas técnicas de planeamento de Galicia –que substitúe o documento anterior, datado en xaneiro de 2018–, destinado á ordenación de volumes e á determinación das condicións estéticas e compositivas dos edificios que se van construír no rueiro 46 A do polígono 1 do eido da modificación puntual do PXOU na antiga unidade de actuación número 7 (rúa de José Malvar Figueroa e vías de nova apertura), coa finalidade de dar cumprimento ás condicións impostas na licenza de parcelamento do 11 de outubro de 2010 –modificada por acordo posterior do 9 de marzo de 2020–, instrumento urbanístico ao cal se incorpora, ao situarse o seu ámbito nas zonas de servidumes aeronáuticas correspondentes ao aeroporto de Vigo e como parte integrante deste, o informe emitido pola Subdirección Xeral de Aeroportos e Navegación Aérea (csv IWMPQDSDDI9EVG5X), que inclúe, no seu anexo 1, un plano –que se anexa cos planos normativos do estudo de detalle e que será dilixenciado xunto coa restante documentación obxecto de aprobación definitiva– no cal se representan as liñas de nivel das superficies limitadoras das referidas servidumes e que determinan as alturas (respecto do nivel do mar) que non deberá superar ningunha construción, incluídos todos os seus elementos (postes, antenas, carteis, etc.), así como o gálibo de viario ou vía férrea.

Segundo. Dispor a publicación do anuncio do acordo de aprobación definitiva do estudo de detalle no Diario Oficial de Galicia, con indicación expresa de que o seu contido íntegro estará á disposición do público na sede electrónica do Concello de Pontevedra www.sede.pontevedra.gal

Unha vez publicado o anuncio no DOG, o instrumento de planeamento aprobado será inscrito no Rexistro de Planeamento Urbanístico de Galicia por petición deste concello, para o que se remitirá un exemplar en soporte dixital, debidamente dilixenciado pola Secretaría do Pleno.

Ademais de no DOG e na sede electrónica, o acordo será obxecto de publicación, xunto co índice de documentos e planos –incluído o plano das servidumes aeronáuticas–, unha vez recibido o certificado de inscrición no Rexistro do instrumento de planeamento, no Boletín Oficial da provincia de Pontevedra, para lograr a súa eficacia e executividade.

Terceiro. Notificar este acordo individualmente ás entidades promotoras, ás mercantís non promotoras Pontelérez Promociones Inmobiliarias, S.L.U. e BBVA, como propietarias das parcelas 46 A1 e 46 A4, a todas aquelas persoas que figuren como interesadas ou constituídas en parte no expediente, con notificación individual a J. Ventura Bueno Julián, con ofrecemento dos recursos procedentes e con comunicación expresa á Subdirección Xeral de Aeroportos e Navegación Aérea da Dirección Xeral de Aviación Civil do Ministerio de Fomento (…).».

O que se fai público para a súa executividade, e indícase que contra o acto de aprobación definitiva do estudo de detalle, que pon fin á vía administrativa, poderá interpor directamente, quen se considere lexitimado, recurso contencioso-administrativo, ante a Sala do Contencioso-Administrativo do Tribunal Superior de Xustiza de Galicia, no prazo de dous meses, contados a partir do día seguinte ao da publicación deste anuncio no DOG, consonte o establecido nos artigos 10.1 e 46.1 da Lei 29/1998, do 13 de xullo, reguladora da xurisdición contencioso-administrativa. Todo isto sen prexuízo de interpor calquera outro recurso que se entenda máis procedente e sexa conforme dereito.

Así mesmo, infórmase que nestas datas xa está publicado na sede electrónica do Concello de Pontevedra (ligazón exacta no día de hoxe (http://www.pontevedra.gal/areas/urbanismo-e-territorio/planeamentourbanistico/planeamento-de-desenvolvemento/) o contido íntegro do documento aprobado definitivamente polo Pleno do Concello de Pontevedra, en cumprimento do disposto na Lei 19/2013, de transparencia, acceso á información pública e bo goberno.

Pontevedra, 1 de xuño de 2022

Miguel Anxo Fernández Lores
Alcalde