De conformidade co disposto nos artigos 44, 45 e 46 da Lei 39/2015 (BOE núm. 236, do 2 de outubro), do procedemento administrativo común das administracións públicas, e por motivos de interese público que o fan aconsellable, faise pública mediante a publicación no Boletín Oficial del Estado a resolución emitida pola Presidencia de Portos de Galicia o 12 de setembro de 2022 que declara en situación de abandono a embarcación Centro Vicente Gradaille con folio 6ª-LU-3-3-10, depositada no Departamento D-01 do porto de Celeiro, embarcación da cal segundo os datos do Rexistro Marítimo Español é propietaria a empresa Mantenimientos Integrales Navales, S.L., empresa que rexeitou todas as notificacións efectuadas no procedemento a través do sistema notifica.gal
Así mesmo, este anuncio publicarase no Diario Oficial de Galicia, ben que a eficacia do acto notificado quedará supeditada á súa publicación no Boletín Oficial del Estado.
A resolución emítese por atoparse a embarcación depositada sen actividade e sen ningún mantemento polo menos desde agosto de 2020, con base no establecido no artigo 128 da Lei 6/2017, do 12 de decembro (DOG núm. 236, do 14 de decembro), de portos de Galicia, e unha vez que non existe constancia da presentación de alegacións contra o acordo de iniciación do procedemento.
A resolución xa emitida pola Presidencia faise pública para que calquera persoa física ou xurídica que acredite dereitos e/ou intereses lexítimos sobre a embarcación poida comparecer se así o desexa no procedemento durante o prazo previsto para a interposición de recurso, caso en que se lle daría a oportuna audiencia no procedemento, procedéndose noutro caso da maneira exposta nos seguintes parágrafos.
De acordo coa normativa que se cita, e a través dos medios previstos na Lei 5/2011, (DOG núm. 203, do 24 de outubro), do patrimonio da Comunidade Autónoma de Galicia, Portos de Galicia vai proceder á venda do buque, e de resultar esta falida, ao seu despezamento e traslado a vertedoiro autorizado.
Todos os custos de tramitación ou que xeren as actuacións que se van realizar sobre o buque en función do que resulte do exame sobre o seu estado e da súa peritación serán por conta do propietario.
O presidente de Portos de Galicia emite esta resolución, en virtude das competencias conferidas polo artigo 12.3, alíneas a) e l), da Lei 6/2017, de portos de Galicia.
Contra esta resolución que pon fin á vía administrativa e é executiva, poderase interpor recurso contencioso-administrativo nun prazo de dous meses contado desde o día seguinte ao da publicación deste anuncio, ante o xulgado do contencioso-administrativo de Santiago de Compostela que corresponda.
Santiago de Compostela, 27 de setembro de 2022
Susana Lenguas Gil
Presidenta de Portos de Galicia
