O 21 de abril de 2022 publicouse no Diario Oficial de Galicia a Resolución do 5 de abril de 2022 pola que se establecen as bases reguladoras para a concesión, en réxime de concorrencia competitiva, das axudas ao deseño, para a mellora da capacidade de innovación e sustentabilidade das empresas en Galicia, a través do impulso da xestión do deseño estratéxico de produtos, servizos, experiencias e marcas e identidades corporativas, enmarcados en prioridades estratéxicas da RIS3, e se procede á súa convocatoria para o ano 2022 (programa DeseñaPeme) (código de procedemento IN848E).
O artigo 7.2 desta resolución establecía os seguintes prazos de xustificación:
Para a anualidade de 2022 só se admitirán aqueles gastos que fosen realizados dentro do período comprendido entre a data de presentación da solicitude de subvención (prazo máximo: 23 de maio de 2022) e o 30 de setembro 2022. Para a anualidade de 2023 admitiranse os gastos realizados dentro do período comprendido entre o 1 de outubro de 2022 e o 30 de setembro de 2023.
O artigo 26.2 desta resolución establecía os seguintes prazos de xustificación:
O 10 de outubro de 2022, como data límite para a presentación da xustificación dos gastos correspondentes á anualidade de 2022 (realizados entre a data de presentación da solicitude e o 30 de setembro de 2022).
Tendo en conta a demora na resolución das devanditas axudas, motivada pola complexidade do proceso de avaliación destas, e dado que non causa prexuízo a terceiros, considérase necesario ampliar o prazo de xustificación para o ano 2022 establecido no artigo 26.2 da Resolución do 5 de abril de 2022.
Ademais, atendendo ao prazo máximo de presentación de solicitudes, que foi o 23 de maio de 2022 segundo o descrito no artigo 10.2 da convocatoria, e que a modificación de ampliación de prazo para a presentación da xustificación de gastos da anualidade 2022 vai desde o 10 de outubro ata o 31 de outubro de 2022, conclúese que esta modificación non excede a metade do prazo orixinal, segundo dispón o artigo 32 da Lei 39/2015, do 1 de outubro, do procedemento administrativo común das administracións públicas.
En consecuencia, no exercicio das facultades que me confire o artigo 17.3 do Decreto 50/2012, do 12 de xaneiro, polo que se crea a Axencia Galega de Innovación, e coa habilitación outorgada pola disposición derradeira primeira da resolución da convocatoria,
RESOLVO:
Artigo único. Modificación do artigo 26.2 da Resolución do 5 de abril de 2022 pola que se establecen as bases reguladoras para a concesión, en réxime de concorrencia competitiva, das axudas ao deseño, para a mellora da capacidade de innovación e sustentabilidade das empresas en Galicia, a través do impulso da xestión do deseño estratéxico de produtos, servizos, experiencias e marcas e identidades corporativas, enmarcados en prioridades estratéxicas da RIS3, e se procede á súa convocatoria para o ano 2022 (programa DeseñaPeme) (código do procedemento IN848E)
O artigo 26.2 queda redactado do seguinte xeito:
«Artigo 26.2. Prazos de xustificación
Períodos de emisión das facturas (realización de gastos) e realización de pagamentos dos gastos executados:
Primeira anualidade:
– Desde a data de presentación da solicitude, ata o 30 de setembro de 2022.
– Presentación da documentación xustificativa, ata o 31 de outubro de 2022.
Segunda anualidade:
– Desde o 1 de outubro de 2022 ata o 30 de setembro de 2023.
– Presentación da documentación xustificativa, ata o 31 de outubro de 2023.
Disposición derradeira única. Entrada en vigor
Esta resolución entrará en vigor o día seguinte ao da súa publicación no Diario Oficial de Galicia.
Santiago de Compostela, 27 de setembro de 2022
Patricia Argerey Vilar
Directora da Axencia Galega de Innovación