En sesión que tivo lugar o 30 de xuño de 2022, o tribunal nomeado mediante a Resolución do 11 de abril de 2022 (DOG núm. 73, do 18 de abril) modificada pola Resolución do 10 de maio de 2022 (DOG núm. 94, do 16 de maio) para cualificar o proceso selectivo para o ingreso no corpo superior da Administración xeral da Comunidade Autónoma de Galicia, subgrupo A1, escala superior de seguridade e saúde no traballo, especialidades de seguridade no traballo, de hixiene industrial e de ergonomía e psicosocioloxía aplicada, convocado por Orde do 28 de febreiro de 2019 (DOG núm. 44, do 4 de marzo),

ACORDOU:

Primeiro. Ao abeiro do previsto na base II.1.2.7 da convocatoria modificar os seguintes modelos de corrección de respostas:

– Na especialidade de seguridade no traballo, acceso libre, ante as alegacións feitas polos aspirantes, modificar o modelo de corrección de respostas na pregunta 113, relativa a parte específica, sendo correcta a alternativa b). Desestímanse na súa totalidade o resto de alegacións.

– Dado que a pregunta modificada no punto anterior se corresponde exactamente coa pregunta 98 do exame de especialidade de seguridade acceso promoción interna, o tribunal acorda modificar tamén o modelo de corrección de respostas de promoción interna na pregunta 98, relativa a parte específica, sendo correcta a alternativa b).

– Nas especialidades de hixiene industrial e ergonomía e psicosocioloxía aplicada desestímanse na súa totalidade as alegacións presentadas.

Segundo. De conformidade co disposto na base II.1.1.1 da convocatoria, superarán o primeiro exercicio do proceso selectivo as persoas aspirantes que obtivesen unha puntuación mínima de vinte puntos (20 puntos). Para estes efectos, de conformidade coas bases da convocatoria, por Resolución deste tribunal, do 8 de xuño de 2022, pola que se dá publicidade aos parámetros para a cualificación do primeiro exercicio, estableceuse que superarán o primeiro exercicio as persoas aspirantes que obtivesen un mínimo de:

– Na quenda de acceso libre: as persoas aspirantes presentadas que obteñan un mínimo de 72 respostas correctas, unha vez feitos os descontos correspondentes, para o cal se terá en conta que cada resposta incorrecta descontará un cuarto de una pregunta correcta. As preguntas non contestadas non penalizan ni reciben puntuación.

– Na quenda de promoción interna: as persoas aspirantes presentadas que obteñan un mínimo de 66 respostas correctas, unha vez feitos os descontos correspondentes. para o cal se terá en conta que cada resposta incorrecta descontará un cuarto de una pregunta correcta. As preguntas non contestadas non penalizan ni reciben puntuación.

Asignarase a valoración de vinte (20) puntos no exercicio ás persoas aspirantes que obteñan unha nota equivalente á nota de corte fixada. O resto das persoas declaradas aptas terán unha cualificación distribuída entre os 20 e os 40 puntos proporcional ao número de respostas correctas. Do mesmo xeito asignarase a puntuación proporcional que corresponda as persoas aspirantes declaradas non aptas.

Feita a corrección en sesión do 29 de xuño de 2022, acadaron a puntuación mínima de 20 puntos un total de:

– Especialidade de seguridade no traballo:

Acceso libre: 19 aspirantes.

Promoción interna: 4 aspirantes.

– Especialidade de hixiene industrial, acceso libre: 22 aspirantes.

– Especialidade e ergonomía e psicosocioloxía aplicada, acceso libre: 9 aspirantes.

Terceiro. Publicar as puntuacións obtidas polas persoas aspirantes que superaron o primeiro exercicio do proceso selectivo para o ingreso no corpo superior da Administración xeral da Comunidade Autónoma de Galicia, subgrupo A1 escala superior de seguridade e saúde no traballo, especialidades de seguridade no traballo, de hixiene industrial e de ergonomía e psicosocioloxía aplicada no portal web corporativo funcionpublica.xunta.gal, así como a relación das que non acadaron os mínimos establecidos na base II.1.1.1 da convocatoria.

Cuarto. De acordo co disposto na base II.1.2.8 da convocatoria, as persoas aspirantes poderán presentar as alegacións que consideren oportunas con relación ás puntuacións, no prazo de dez (10) días hábiles contados desde o seguinte ao de publicación desta resolución no Diario Oficial de Galicia.

Quinto. De acordo co disposto na base II.1.1.3 da convocatoria, as persoas aspirantes que superaron o primeiro exercicio disporán dun prazo de dez (10) días hábiles contados desde o día seguinte ao da publicación desta resolución no Diario Oficial de Galicia, para presentar a documentación xustificativa de estar en posesión do Celga 4 ou o equivalente debidamente homologado polo órgano competente en materia de política lingüística da Xunta de Galicia de acordo coa disposición adicional segunda da Orde do 16 de xullo de 2007, pola que se regulan os certificados oficiais acreditativos dos niveis de coñecemento da lingua galega (DOG núm. 146, do 30 de xullo), modificada pola Orde do 10 de febreiro de 2014 (DOG núm. 34, do 19 de febreiro).

Sexto. De conformidade co disposto na base III.13 da orde de convocatoria, contra este acordo poderase interpoñer recurso de alzada ante o conselleiro de Facenda e Administración Pública, nos termos previstos nos artigos 121 e 122 da Lei 39/2015, do 1 de outubro, do procedemento administrativo común das administracións públicas.

Santiago de Compostela, 30 de xuño de 2022

Ángel López Álvarez
Presidente do tribunal