Mediante o Acordo do Pleno do 3 de xuño de 2022, en sesión extraordinaria urxente, aprobouse definitivamente o Plan especial de infraestruturas e dotacións para acondicionamento da estrada As Quintás-concello de Cervo, o que se publica para os efectos dos artigos 82 e 88 da Lei 2/2016, do 10 de febreiro, do solo de Galicia, e dos artigos 199 e 208 do seu regulamento. O acordo literal é o seguinte:
Acordo:
Primeiro. Desestimar as alegacións presentadas á aprobación inicial no expediente de aprobación do Plan especial de infraestruturas e dotacións de acondicionamento da estrada As Quintás por:
– José Luis Rodríguez Enríquez, con data do 16.9.2021, rexistrada de entrada co número 2021-E-RC-3403.
– José Francisco Valle Rey, con data do 21.9.2021, rexistrada de entrada co número 2021-E-RC-452.
Polos motivos expresados no informe dos servizos técnicos municipais do 6.3.2022 e no documento do plan especial emitido polo equipo redactor.
Segundo. Aprobar definitivamente o Plan especial de infraestruturas e dotacións de acondicionamento da estrada As Quintás no concello de Cervo (Lugo).
Terceiro. Publicar a aprobación definitiva no Diario Oficial de Galicia, para os efectos do establecido no artigo 82 da Lei 2/2016, do 10 de febreiro, do solo de Galicia. Esta publicación deberá realizarse no prazo dun mes desde a adopción da aprobación definitiva.
Cuarto. Comunicar o acordo de aprobación definitiva, en virtude do artigo 88 da Lei 2/2016, do 10 de febreiro, do solo de Galicia, á consellería competente en materia de urbanismo, para a súa inscrición no Rexistro de Planeamento Urbanístico de Galicia, e anéxase un exemplar en soporte dixital, debidamente dilixenciado.
Quinto. Publicar no Boletín Oficial da provincia o documento que conteña a normativa e as ordenanzas.
Sexto. Notificar individualmente este acordo a todas as persoas titulares catastrais dos terreos afectados ás cales xa se lles tivese notificado a aprobación inicial deste plan.
Para os efectos do disposto no punto terceiro da parte dispositiva deste acordo, a ligazón en que se poderá consultar a documentación íntegra aprobada definitivamente é a seguinte: http:/cervo.sedelectronica.es
Extracto ambiental
I. Xustificación da integración no documento de planeamento dos aspectos ambientais.
– Co plan especial preténdese ampliar e mellorar a estrada existente As Quintás. Aumentarase a sección da vía, incorporaranse beirarrúas e prazas de aparcamento e habilitarase o paso sobre o río Xunco para permitir a circulación de vehículos pesados. Con esta actuación preténdese favorecer a mobilidade do ámbito, ao reducir o tráfico no centro urbano de Cervo e ao facilitar o acceso a un futuro centro de discapacitados psíquicos e ao BIC de Sargadelos.
– A vía proxectada transcorre por unha zona de baixa densidade de vivendas e solo agroforestal e triplicará a sección da estrada orixinaria. Ademais, a vía incorpora beirarrúas e aparcamentos que poden resultar discordantes na contorna rural en que se insiren. Por isto, o PEID integra na ordenación e nas correspondentes ordenanzas as medidas de integración paisaxística recollidas nos informes de consultas do Instituto de Estudos do Territorio e da Dirección Xeral do Patrimonio Cultural e realiza un estudo de impacto e integración paisaxística da actuación. A nova vía deséñase evitando modelos urbanos, sen prazas de aparcamento, e execútase a beirarrúa unicamente nunha das beiras da estrada.
– A ampliación da sección de paso sobre o río Xunco pode afectar o ciclo hídrico e o patrimonio natural. Este río ten declarada unha zona de fluxo preferente e inundable e conta cunha galería ribeirega en bo estado de conservación. O PEID integra as medidas establecidas polo organismo de conca e procura a mínima afección sobre a vexetación de ribeira, ao non situar novas pilas ou estribos na canle nin na zona de servidume do río e evitar o arrastre de sólidos en suspensión ou outros posibles contaminantes nas augas.
– Dada a existencia de numerosos elementos de interese patrimonial na contorna, o plan especial identifica correctamente todos os bens e propón medidas para garantir a súa protección.
– A proposta non afecta áreas estratéxicas de conservación polo que non se ven afectadas directa nin indirectamente, non provocando efectos negativos significativos.
– As ordenanzas reguladoras propostas inclúen as medidas necesarias para garantir a integridade do río, da paisaxe e do patrimonio arquitectónico e etnográfico.
– O PEID incorpora nas súas determinacións a lexislación comunitaria, estatal e autonómica de carácter básico e sectorial vixente que, xunto coa progresiva introdución de criterios de sustentabilidade nas diferentes normativas sectoriais de aplicación na ordenación do territorio froito dunha maior preocupación pola tutela ambiental e territorial da sociedade, asegura a adopción de eficaces medidas de prevención dos posibles efectos negativos significativos sobre o ambiente derivados da ampliación da vía proposta.
II. Xustificación de como se tomaron en consideración no documento de planeamento o estudo ambiental estratéxico, os resultados da información pública e das consultas e a declaración ambiental estratéxica, así como, de ser o caso, as discrepancias xurdidas no proceso.
O 21 de novembro de 2019, inicíase o procedemento de avaliación ambiental estratéxica simplificada do PEID. O 26 de novembro de 2019, iniciouse un período de consultas previas á formulación do informe ambiental estratéxico por un prazo de dous meses, facendo públicos os documentos na súa sede electrónica. Asemade, consultouse á Dirección Xeral de Ordenación do Territorio e Urbanismo, entre outras administracións públicas.
O 27 de marzo de 2020, a Dirección Xeral de Calidade Ambiental e Cambio climático emitiu o informe ambiental estratéxico en que propón non someter ao procedemento de avaliación ambiental estratéxica ordinaria o PEID, ao considerar que non se producirán efectos significativos no ambiente.
Todas as observacións contidas nos informes sectoriais recibidos durante as diferentes fases da tramitación e os resultados da información pública foron incorporadas ao documento nos termos que se recollen no punto 3 da memoria xustificativa.
III. Razóns da elección da alternativa seleccionada en relación coas alternativas consideradas.
III.1. Análise das alternativas:
• Alternativa 0:
Vantaxes: –.
Inconvenientes:
– Perda de oportunidade de chegar a completar dun modo racional e sustentable o tecido urbano de Cervo.
– Difícil acceso ao novo equipamento dotacional previsto na súa marxe dereita.
– Diminución no número de visitantes ao BIC de Sargadelos.
– Perda do valor como referente cultural, didáctico e turístico do BIC de Sargadelos.
• Alternativa 1:
Vantaxes:
– Minimizar o tránsito de vehículos polo centro urbano e sobre todo polo casco antigo de Cervo.
– Facilitar o acceso desde o núcleo urbano e desde a N-642 á aldea e ás fábricas de Sargadelos e incrementar o número de visitantes.
– Mellorar a seguridade e a fluidez dos condutores que circulen pola rúa. Facilitar o acceso á futura residencia e centro de día para discapacitados psíquicos adultos prevista nunha parcela situada na súa marxe dereita.
– Resolver o cruzamento sobre o río Xunco garantindo a menor afección ao río e á súa integración na contorna.
– Protexer os elementos do patrimonio cultural.
Inconvenientes:
– Obtención dos terreos.
• Alternativa 2:
Vantaxes:
– Minimizar o tránsito de vehículos polo centro urbano e sobre todo polo casco antigo de Cervo.
– Facilitar o acceso desde o núcleo urbano e desde a N-642 á aldea e ás fábricas de Sargadelos e incrementar o número de visitantes.
– Mellorar a seguridade e a fluidez dos condutores que circulen pola rúa. Facilitar o acceso á futura residencia e centro de día para discapacitados psíquicos adultos prevista nunha parcela situada na súa marxe dereita.
– Resolver o cruzamento sobre o río Xunco garantindo a menor afección ao río e á súa integración na contorna.
– Protexer os elementos do patrimonio cultural.
– Mellor integración na paisaxe e menor consumo do solo.
Inconvenientes:
– Obtención dos terreos.
III.2. Xustificación da elección.
As diferentes alternativas propostas valoráronse segundo a súa adecuación aos obxectivos pretendidos para cada unha das variables de sustentabilidade analizadas (paisaxe, patrimonio natural e cultural, ocupación do territorio, sociedade e mobilidade). Da valoración realizada, a alternativa 2 resultou como seleccionada. Esta alternativa mantén o trazado da vía orixe nunha maior superficie minimizando así os costes de urbanización, os movementos de terras, a ocupación do solo e a integración na contorna en que se atopa.
A alternativa finalmente proposta polo PEID parte da alternativa 2 seleccionada e é resultado da integración das determinacións dos informes e alegacións recibidas durante o período de información pública e consultas.
Medidas adoptadas para o seguimento dos efectos da aplicación
do plan no ambiente
Tendo en conta a natureza e as actuacións recollidas nesta proposta, o seu seguimento ambiental deberá controlar os seguintes aspectos ambientais, coa finalidade de comprobar se o planeamento é coherente cos obxectivos pretendidos.
• Paisaxe:
– Realízase un estudo de impacto e integración paisaxística da actuación.
– A nova vía deseñarase evitando modelos urbanos, eliminará as prazas de aparcamento previstas e executará a beirarrúa unicamente nunha das beiras da estrada.
• Patrimonio: identificar correctamente todos os bens e propoñer medidas para garantir a súa protección.
• Patrimonio natural:
– Procurar a mínima afección sobre a vexetación de ribeira, non situar novas pilas ou estribos na canle nin na zona de servidume do río e evitar o arrastre de sólidos en suspensión ou outros posibles contaminantes nas augas.
– Tense en conta as prescricións recollidas no artigos 126 do RDPH, coas súas modificacións introducidas polo Real decreto 638/2016. Tamén se atende ao establecido nos artigos que se incorporan ao RDPH: 126.ter, relativo a criterios de deseño e conservación para obras de protección, modificacións nas canles e obras de paso.
– Tense en conta a lexislación sectorial vixente, incorpóranse aquelas zonas afectadas por áreas de risco potencial significativo de inundación (ARPSI) e téñense en conta as determinacións do plan hidrolóxico vixente en canto a protección contra as inundacións.
Contra este acordo, como disposición administrativa de carácter xeral, pódese interpoñer directamente recurso contencioso-administrativo, perante a sala correspondente do Tribunal Superior de Xustiza de Galicia (artigo 84.1 da Lei 2/2016, do 10 de febreiro, do solo de Galicia, e artigo 201.1 do seu regulamento), no prazo de dous meses que se contarán a partir do día seguinte ao da publicación deste anuncio, de conformidade co artigo 46 da Lei 29/1998, do 13 de xullo, reguladora da xurisdición contencioso-administrativa, sen prexuízo de interpoñer calquera outro recurso que se xulgue máis procedente e sexa conforme dereito.
Cervo, 7 de xuño de 2022
Alfonso Villares Bermúdez
Alcalde
