Antecedentes:
Primeiro. Con data do 20 de setembro de 2021 publicouse no Diario Oficial de Galicia núm. 181 o anuncio do 31 de agosto de 2021 polo que se somete ao trámite de información pública o proxecto de construción da primeira fase do acondicionamento da estrada PO-546, entre os p.q. 4+400 e o 4+890, de clave PO/21/120.10, así como a relación individual de bens, dereitos e propietarios afectados polo referido proxecto.
Segundo. Logo da análise dos informes e certificados presentados, o 22 de abril de 2022 aprobouse o expediente de información pública e o proxecto de construción da primeira fase do acondicionamento da estrada PO-546, entre os p.q. 4+400 e 4+890, de clave PO/21/120.10.
O obxecto do proxecto é o acondicionamento da estrada PO-546, entre os p.q. 4+400 e 4+890, que consistirá na realización das seguintes actuacións: remodelación da sección transversal da estrada, ampliando o largo das actuais beirarrúas, fresadura e reposición do firme e execución de pasos de peóns sobreelevados, mellora da iluminación do treito, substitución de refuxios nas paradas do autobús, reposición dos elementos de drenaxe e servizos afectados e reposición da sinalización, tanto das marcas viais como da sinalización vertical.
A competencia para a execución da expropiación forzosa, no ámbito das estradas non incorporadas á rede do Estado, con itinerarios que se desenvolvan integramente no seu territorio, corresponde á Comunidade Autónoma de Galicia, ao abeiro do punto dous do artigo 28 do Estatuto de autonomía de Galicia, aprobado pola Lei orgánica 1/1981, do 6 de abril.
Corresponde ao Consello da Xunta de Galicia, como órgano equivalente ao Consello de Ministros, no ámbito da Administración autonómica, o recoñecemento concreto da utilidade pública e a declaración da urxente ocupación dos bens afectados pola expropiación a que dá lugar a realización da obra, segundo o previsto nos artigos 10 e 52 da Lei do 16 de decembro de 1954, de expropiación forzosa.
Na súa virtude, por proposta da conselleira de Infraestruturas e Mobilidade en funcións e logo da deliberación do Consello da Xunta de Galicia na súa reunión do día cinco de maio de dous mil vinte e dous,
DISPOÑO:
Artigo único
Declarar, en concreto, a utilidade pública e a necesidade de urxente ocupación, para os efectos de expropiación forzosa, dos bens e dereitos que se concretan no expediente administrativo instruído, así como en calquera das modificacións que sexa necesario realizar para a execución do proxecto de construción da primeira fase do acondicionamento da estrada PO-546, entre os p.q. 4+400 e 4+890, de clave PO/21/120.10.
Santiago de Compostela, cinco de maio de dous mil vinte e dous
Alberto Núñez Feijóo
Presidente en funcións
Ethel María Vázquez Mourelle
Conselleira de Infraestruturas e Mobilidade en funcións