A Resolución do 22 de xaneiro de 2013, da Presidencia da Axencia Estatal de Administración Tributaria (en diante, Axencia Tributaria), sobre organización e atribución de competencias na área de recadación, mediante a modificación do día 13 de xaneiro de 2021, contén explicitamente no punto cuarto.2 a autorización para que os delegados especiais poidan delegar as competencias que teñen atribuídas no punto cuarto.1 nos delegados da Axencia Tributaria, respecto das persoas ou entidades adscritas aos equipos e grupos rexionais de recadación ou asignados a funcionarios con competencias de recadación, calquera que sexa a súa localización na Delegación Especial, con excepción da correspondente ao punto cuarto 1.7.h), e o delegado especial debe proceder á súa comunicación ao Departamento de Recadación con carácter previo.
Por todo iso, de conformidade co establecido no artigo 9 da Lei 40/2015, do 1 de outubro, de réxime xurídico do sector público, e conforme as aprobacións concedidas pola Presidencia da Axencia Estatal de Administración Tributaria,
DISPOÑO:
Primeiro. Delegar as competencias correspondentes ao punto cuarto, número 1.4, de medidas cautelares, letras a) e c), da Resolución do 22 de xaneiro de 2013, da Presidencia da Axencia Estatal da Administración Tributaria, sobre organización e atribución de competencias na área de recadación, no delegado da Axencia Tributaria de Pontevedra, respecto das persoas ou entidades adscritas aos equipos e grupos rexionais de recadación ou asignados a funcionarios con competencias de recadación situados nas sedes de Pontevedra, Vigo, Ourense e Lugo, con excepción das que afecten os seguintes tipos de debedores:
– Os adscritos ao Grupo Rexional de Recadación de débedas de menor contía da Dependencia Rexional de Recadación.
– Aqueles que manteñan un importe total de débeda pendente, en calquera fase, superior a un millón de euros.
– Os incursos en procesos concursais, calquera que sexa a fase do proceso concursal, incluídos os finalizados baixo a competencia supervisora da xefa do Equipo de Procesos Concursais da Dependencia Rexional de Recadación.
– Os implicados nun proceso penal por delito contra a Facenda pública ou de contrabando, respecto dos que adopte o Equipo Rexional de Actuacións Especiais da Dependencia Rexional de Recadación as medidas cautelares previstas nos puntos 7.e) e 9 do artigo 81 ou no punto 7 do artigo 258 da Lei 58/2003, do 17 de decembro, xeral tributaria, ou no punto 3 da disposición adicional cuarta da Lei orgánica 12/1995, de represión do contrabando, aínda que os devanditos obrigados non se atopen adscritos ao devandito equipo.
– Os adscritos ao Equipo Rexional de Grandes Empresas da Dependencia Rexional de Recadación.
Segundo. As delegacións de competencias contidas nesta resolución son revocables en calquera momento polo órgano que as confire, o cal, así mesmo, poderá avocar para si o coñecemento de calquera asunto comprendido nelas, cando as circunstancias de índole técnica, económica, social, xurídica ou territorial o fagan conveniente.
Terceiro
1. O exercicio de competencias delegadas en virtude desta resolución axustarase ao disposto na Lei 40/2015, do 1 de outubro, de réxime xurídico do sector público.
2. Cantas resolucións sexan adoptadas no exercicio das competencias delegadas establecidas nesta resolución deberán facer expresa constancia de tal circunstancia mediante a mención desta resolución e da súa data de publicación no Diario Oficial de Galicia, en cumprimento do previsto no artigo 9.4 da Lei 40/2015, do 1 de outubro.
Cuarto. A presente resolución producirá efectos o día seguinte ao da súa publicación no Diario Oficial de Galicia e será aplicable a todos os procedementos non finalizados na devandita data.
A Coruña, 28 de abril de 2022
Imelda Capote Martín
Delegada especial de Galicia