A Xunta de Goberno Local do Concello de Cangas, en sesión ordinaria do 17 de xaneiro de 2022, acordou:

Primeiro. Aprobar inicialmente o convenio urbanístico para a monetización do aproveitamento de cesión, sita na praza San Xoán, 3, Cangas, de execución de planeamento que se subscribe entre o Concello de Cangas e Juan José Pérez Fernández.

Segundo. Que se notifique o acordo de aprobación inicial aos propietarios e titulares de dereitos que consten no Rexistro da Propiedade para os efectos de audiencia por prazo dun mes. Os propoñentes do convenio deben achegar a relación de afectados precisa para cumprir o dito trámite.

Asinado o convenio, sométese ao trámite de información pública, por un período dun mes, de conformidade co establecido no artigo 168 da Lei do solo de Galicia, contado a partir do día seguinte ao da publicación do anuncio no Diario Oficial de Galicia e nun xornal dos de maior difusión da provincia.

Logo da información pública, de non se presentaren alegacións, o texto inicial aprobado e o documento administrativo asinado entenderase definitivo sen necesidade de nova sinatura nin da súa ratificación pola Xunta de Goberno Local, esta aprobación e a formalización acordada producirán plenos efectos xurídicos. Calquera das partes poderá solicitar a elevación do documento administrativo a escritura pública. O texto íntegro do convenio publicarase no Diario Oficial de Galicia, e anotarase no Rexistro de Convenios e remitirase copia ao arquivo de convenios, de conformidade co previsto no artigo 403 do Regulamento da Lei do solo de Galicia.

Durante o período de información pública, o expediente estará á disposición do público en xeral na páxina web do Concello de Cangas www.concellodecangas.gal e no Departamento de Urbanismo, das 9.00 ás 13.00 horas, para a súa consulta e a presentación de cantos documentos ou escritos de alegacións xulguen convenientes.

Cangas, 3 de febreiro de 2022

María Victoria Portas Mariño
Alcaldesa