Na sesión que tivo lugar o día 20.12.2021, o Xurado Provincial de Clasificación de Montes Veciñais en Man Común de Lugo, por unanimidade, acordou aprobar os seguintes deslindamentos entre montes veciñais, e proceder ás oportunas modificacións nos expedientes correspondentes:
– Monte Piñeira (exp. 122/76), pertencente aos veciños de Piñeira de Abaixo e Piñeira de Arriba, da parroquia de Piñeira, e monte Moredo (exp. 129/76), pertencentes aos veciños de Aldea, Moredo e Souto da parroquia de Soutordei, ambos os dous no concello de Ribas de Sil.
O 2.8.2021 foi presentada unha solicitude relativa ao acordo de deslindamento levado a cabo por avinza entre as citadas comunidades, en canto á liña divisoria que separa os seus montes veciñais. Achegan acta de deslindamento, planos topográficos, acta de conciliación ante o Xulgado de Paz de Ribas de Sil e certificacións de aprobación por parte das comunidades implicadas.
O 14.12.2021 o Servizo de Montes emite un informe (2021_30) en que se especifican as modificacións que se producen nos montes, como consecuencia do deslindamento acordado, e cuxas superficies pasan a ser: MVMC Piñeira, 289 hectáreas e MVMC Moredo, 348 hectáreas.
Examinada a documentación presentada, o xurado, por unanimidade, acorda aprobar o deslindamento practicado e proceder ás oportunas modificacións nos respectivos expedientes.
Este deslindamento correspóndese co plano do anexo I, ao final deste anuncio.
– Monte Merlán (exp. 91/76), pertencente aos veciños da parroquia de Merlán, agás Hospital, e monte Norte Arroio Raposeiras (exp. 73/76), pertencente aos veciños do norte da parroquia de Augas Santas, ambos os dous no concello de Palas de Rei.
O 23.9.2021 foi presentada unha solicitude relativa ao acordo de deslindamento levado a cabo por avinza entre as citadas comunidades, en canto á liña divisoria que separa os seus montes. Aportan acta de deslindamento, planos topográficos, acta de conciliación ante o Xulgado de Paz de Palas de Rei e certificacións de aprobación por parte das comunidades implicadas.
O 5.11.2021 o Servizo de Montes emite un informe (2021_35) no que se especifican as modificacións que se producen nos montes como consecuencia do deslindamento acordado, e cuxas superficies resultantes pasa a ser: MVMC Merlán, 468 hectáreas e MVMC Norte Arroio Raposeiras, 154 hectáreas.
Examinada a documentación presentada, o xurado, por unanimidade, acorda aprobar o deslindamento practicado e proceder ás oportunas modificacións nos respectivos expedientes.
Este deslindamento correspóndese co plano do anexo II, ao final deste anuncio.
– Monte Rogueira e Cabana (exp. 78/75), pertencente aos veciños de Moreda, na parroquia de Seoane, e monte Visuña (exp. 15/77), pertencente aos veciños de Visuña e Céramo, na parroquia de Visuña, ambos os dous no concello de Folgoso do Courel.
O 29.7.2021 foi presentada unha solicitude (mellorada o 8.11.2021), relativa ao acordo de deslindamento levado a cabo por avinza entre as citadas comunidades, en canto á liña divisoria que separa os seus montes. Achegan acta de deslindamento, planos topográficos, acta de conciliación ante o Xulgado de Paz de Folgoso do Courel e certificacións de aprobación por parte das comunidades implicadas.
O 14.12.2021 o Servizo de Montes emite un informe (2021_29) en que se especifican as modificacións que se producen nos montes como consecuencia do deslindamento acordado, e cuxas superficies resultantes pasa a ser: MVMC Rogueira e Cabana, 553 hectáreas e MVMC Visuña, 1.118 hectáreas.
Examinada a documentación presentada, o xurado, por unanimidade, acorda aprobar o deslindamento practicado e proceder ás oportunas modificacións nos respectivos expedientes.
Este deslindamento correspóndese co plano do anexo III, ao final deste anuncio.
Contra estes acordos, desde o día seguinte ao da súa publicación no Diario Oficial de Galicia, poderá interpoñerse recurso potestativo de reposición ante o Xurado Provincial de Clasificación de Montes Veciñais en Man Común de Lugo no prazo dun mes, ou ben directamente recurso contencioso-administrativo ante o Xulgado do Contencioso-Administrativo de Lugo no prazo de dous meses, de acordo co establecido nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e no artigo 46 da Lei 29/1998, do 13 de xullo, da xurisdición contencioso-administrativa.
Lugo, 17 de xaneiro de 2022
María Olga Iglesias Fontal
Presidenta do Xurado Provincial de Clasificación de Montes Veciñais
en Man Común de Lugo
ANEXO I
Deslinde MVMC Piñeira con MVMC Moredo. Ribas de Sil
ANEXO II
Deslinde MVMC Merlán con MVMC Norte Arroio Raposeiras. Palas de Rei
ANEXO III
Deslinde MVMC Rogueira con MVMC Cabana e Visuña. Folgoso do Courel
