Con data do 21 de outubro de 2021, a Presidencia de Portos de Galicia, ao abeiro das competencias conferidas polo artigo 12.3.j) da Lei 6/2017, do 12 de decembro, de portos de Galicia, emite resolución que acorda incoar expediente de caducidade da concesión administrativa con destino á construción de muro e recheo para ampliación de industria no porto de Vilaxoán titularidade da empresa Ameixa de Carril, S.L.
A instrución recae en Jesús Javier Fernández Barro, xefe da División Xurídica de Portos de Galicia, con domicilio para os efectos do presente expediente en Área Central, praza de Europa, 5-A, 6º, de Santiago de Compostela; o seu réxime de abstención e recusación é o consignado nos artigos 23 e 24 da Lei 40/2015, do 1 de outubro, de réxime xurídico do sector público.
O acordo de incoación emitido polo instrutor o 27 de outubro de 2021 foi rexeitado no sistema notifica-gal. Malia iso, intentouse a notificación postal no domicilio do administrador único da empresa que consta no expediente, onde tampouco foi posible a notificación polo que, de conformidade co disposto nos artigos 44 e 46 da Lei 39/2015, do procedemento administrativo común das administracións públicas, se notifica mediante a publicación no Boletín Oficial del Estado.
Así mesmo, este anuncio publicarase no Diario Oficial de Galicia, ben que a eficacia do acto notificado quedará supeditada á súa publicación no BOE.
O expediente incóase polo incumprimento das condicións 8ª e 11ª do título da concesión o que por aplicación da condición 12ª é causa imperativa de caducidade da concesión a causa de falla de pagamento das taxas debidas pola concesión e da existencia dunha cesión da instalación non autorizada.
Contra o acordo de incoación poderanse formular alegacións perante o instrutor designado no expediente, outorgándose para estes efectos un prazo máximo de 10 días hábiles contados desde o día seguinte ao da publicación do acordo no Boletín Oficial del Estado.
En aplicación do previsto no artigo 90.1.b) da Lei de portos de Galicia, o aboamento das cantidades debidas por taxas antes de ditarse resolución determinará o arquivamento do expediente no que atinxe a ese motivo en concreto.
Para o seu exame, o expediente atópase nas dependencias dos servizos centrais de Portos de Galicia en Área Central, praza de Europa, 5-A, 6º, Santiago de Compostela.
Santiago de Compostela, 15 de novembro de 2021
Jesús Javier Fernández Barro
Instrutor