O artigo 31 do Estatuto de autonomía de Galicia atribúe competencia plena á Comunidade Autónoma para o regulamento e administración do ensino en toda a súa extensión, niveis e graos, modalidades e especialidades, sen prexuízo das limitacións nos artigos 27 e 149 da Constitución española.
A incidencia da pandemia COVID-19 nos centros educativos o pasado curso 2020/21 fixo preciso realizar adaptacións no profesorado, os espazos e as medidas hixiénicos sanitarias, para cumprir as exixencias do Protocolo de adaptación ao contexto da COVID-19 nos centros de ensino non universitario de Galicia para o curso 2020/21, e así poder desenvolver con garantías a activade lectiva presencial.
A necesidade de dar unha resposta adecuada ás dificultades que xeraría a adopción destas medidas no funcionamento dos centros privados concertados, e a súa excepcionalidade, engadida á necesidade de asegurar a correcta prestación do servizo público educativo, determinou que fose imprescindible e, pola súa vez, xustificou a Orde do 13 de novembro de 2020 (DOG número 233, do 18 de novembro), de concesión directa de subvencións a centros docentes privados concertados e o pagamento anticipado aos beneficiarios da totalidade do importe concedido no respectivo exercicio, sen ningún réxime de garantías.
Para o presente curso 2021/22, encadrado nun escenario de transición, a Orde comunicada do 4 de xuño de 2021 da ministra de Sanidade, resolve declarar como actuacións coordinadas en saúde pública fronte á COVID-19, as acordadas como tales polo Pleno do Consello Interterritorial do Sistema nacional de saúde na súa sesión do 2 de xuño de 2021, que figuran no anexo desta, e que abranguen medidas de distancia interpersoal, de uso de máscara, limpeza, desinfección, ventilación, xestión de residuos..., necesarias para garantir un contorno escolar seguro, de xeito que se poidan desenvolver as actividades minimizando ao máximo os posibles riscos derivados da pandemia.
Neste marco, a Resolución conxunta do 1 de setembro de 2021, das consellerías de Cultura, Educación e Universidade e de Sanidade, aproba o «Protocolo de adaptación ao contexto da COVID-19 nos centros de ensino non universitario de Galicia para o curso 2021-22», que prevé no punto 3, relativo ás «Medidas xerais de protección individual e colectiva», no punto 1, para educación infantil e primaria, a organización do alumnado en grupos de convivencia estable, polo que non se aplicarán os criterios de limitación de distancia; e nos demais casos, a distancia que permita a aula e, cando menos, 1,20 metros; e se o tamaño da aula non permitise as distancias previstas: a retirada de mobiliario, a utilización de espazos alternativos ou instalación de mamparas. Así mesmo, o punto 3.2 prevé o uso obrigatoria de máscara a partir dos 6 anos de idade con independencia do mantemento da distancia interpersoal.
A aplicación das previsións da normativa sanitaria, así como a aplicación das instrucións específicas do ámbito educativo, para favorecer ao máximo a garantía de seguridade e, ao mesmo tempo, a actividade lectiva presencial, obriga os centros docentes privados concertados, polo que tamén este curso exixirá un aumento do número de horas de docencia nalgúns centros en función do alumnado, e un incremento doutros gastos extraordinarios para adquirir material hixiénico-sanitario, no marco da situación excepcional derivada da COVID-19.
O artigo 49 da Lei 3/2021, do 28 de xaneiro, de orzamentos xerais da Comunidade Autónoma de Galicia para o ano 2021, e os artigos 19.4.c) e 26.3 da Lei 9/2007, do 13 de xuño, de subvencións de Galicia, establecen a posibilidade de conceder, con carácter excepcional, subvencións de forma directa, cando se acrediten razóns de interese público, social, económico ou humanitario, ou outras debidamente xustificadas que dificulten a súa convocatoria pública, logo de autorización do Consello da Xunta de Galicia en atención ao seu importe.
Así mesmo, os artigos 31.6 da Lei 9/2007, do 13 de xuño, de subvencións de Galicia e 63.3 do Decreto 11/2009, do 8 de xaneiro, que aproba o seu regulamento, permiten excepcionalmente por razóns debidamente xustificadas, o pagamento anticipado aos beneficiarios do importe total da subvención, sen exixir ningún réxime de garantías, logo de autorización do Consello da Xunta de Galicia.
Na súa virtude, logo da autorización do Consello da Xunta de Galicia por Acordo do 29 de outubro de 2021, por proposta da Dirección Xeral de Centros e Recursos Humanos,
DISPOÑO:
Artigo 1. Obxecto
A presente orde ten por obxecto a concesión directa de subvencións a centros privados concertados, con carácter excepcional, para poder afrontar no curso 2021/22 os gastos derivados das seguintes actuacións motivadas pola pandemia COVID-19:
a) Incremento de horas adicionais do profesorado na educación secundaria obrigatoria no período comprendido entre o 15 de setembro de 2021 e o 30 de xuño de 2022.
b) Outros gastos extraordinarios necesarios para a adquisición de material hixiénico-sanitario.
Artigo 2. Ámbito de aplicación
As subvencións concedidas nesta orde distribuiranse entre os centros privados concertados que impartan o 2º ciclo de educación infantil, educación primaria, educación secundaria obrigatoria, formación profesional básica, de grao medio e superior e educación especial.
Artigo 3. Procedemento de concesión
As subvencións reguladas nesta orde teñen carácter excepcional e están xustificadas por razóns de interese público, social, económico e humanitario que dificultan a súa convocatoria pública, polo que procede aplicar o procedemento de concesión directa, segundo o previsto no artigo 19.4.c) da Lei 9/2007, do 13 de xuño, de subvencións de Galicia.
Artigo 4. Competencia para a xestión do procedemento
A Dirección Xeral de Centros e Recursos Humanos asumirá a competencia para tramitar o procedemento de xestión e xustificación desta subvención; e o Servizo de Centros é a unidade responsable do procedemento.
Artigo 5. Financiamento
A Consellería de Cultura, Educación e Universidade financiará esta subvención con cargo á aplicación orzamentaria 10.31.423A.482.2, por un importe de 2.847.529,68 € no exercicio 2021 e 591.739,72 € no exercicio 2022.
O orzamento para cada unha das actuacións subvencionadas é o seguinte:
1. O incremento para horas adicionais de profesorado de educación secundaria obrigatoria no período comprendido entre o 15 de setembro de 2021 e o 30 de xuño de 2022, por importe de 347.529,68 € para o ano 2021 e na contía de 591.739,72 € para o ano 2022.
2. Outros gastos extraordinarios necesarios para adquirir material hixiénico-sanitario, no período comprendido entre o 1 de setembro e o 31 de decembro de 2021, por importe de 2.500.000,00 € para o ano 2021.
Artigo 6. Actuacións subvencionadas
1. Contratar profesorado para impartir as horas adicionais de docencia derivadas do desdobramento extraordinario de grupos na educación secundaria obrigatoria motivado pola COVID-19, durante o período indicado no artigo 1, resultantes da análise efectuada pola inspección educativa.
2. Adquirir material hixiénico-sanitario (máscaras, hidroxel...), de acordo cos requirimentos mínimos establecidos polas autoridades educativas e sanitarias motivados pola COVID-19, en función das unidades concertadas e do alumnado escolarizado en cada centro.
3. Os centros docentes deberán distribuír máscaras entre o alumnado matriculado en ensino obrigatorio e en educación especial beneficiario da axuda para adquirir material escolar no curso 2021/22.
Artigo 7. Condicións previas ao pagamento
1. O pagamento do importe da subvención concedida nesta orde está suxeito ás seguintes condicións:
a) Que o centro estea ao día no cumprimento de obrigas coa Seguridade Social, coa Axencia Estatal de Administración Tributaria e coa Facenda da Comunidade Autónoma de Galicia.
A unidade de xestión do procedemento consultará os datos de estar ao día no cumprimento de obrigas coa Seguridade Social e coa Facenda da Comunidade Autónoma de Galicia, agás que o titular do centro beneficiario se opoña expresamente á consulta; así mesmo, consultará o dato de estar ao día no cumprimento de obrigas coa Axencia Estatal de Administración Tributaria, cando o titular do centro beneficiario o autorice expresamente.
b) Que o centro beneficiario non renuncie expresamente á subvención.
2. Deberán realizarse nun prazo de 5 días hábiles seguintes á publicación desta orde de concesión no Diario Oficial de Galicia:
a) A oposición á consulta automatizada de estar ao día no cumprimento de obrigas coa Seguridade Social e coa Facenda da Comunidade Autónoma de Galicia e a achega da documentación.
b) A autorización expresa da consulta de estar ao día no cumprimento de obrigas coa Axencia Estatal de Administración Tributaria ou, no seu defecto, a achega da documentación.
c) A renuncia expresa á subvención, se é o caso.
Este trámite farase electronicamente utilizando o modelo PR004A (presentación electrónica de solicitudes, escritos e comunicacións que non conten cun Sistema electrónico específico nin cun modelo electrónico normalizado), dispoñible na sede electrónica da Xunta de Galicia, que irá dirixido ao Servizo de Centros da Dirección Xeral de Centros e Recursos Humanos, e indicará no recadro «Asunto relacionado» o seguinte: «Condicións previas subvencións COVID-19».
3. Cando o resultado da consulta automatizada dos datos indicados poña de manifesto unha situación de non estar ao día nas devanditas obrigas tributarias e coa Seguridade Social, requirirase o afectado para que, no prazo de 5 días hábiles seguintes á notificación do requirimento, achegue o documento que acredite o dato.
4. A titularidade do centro perderá o dereito ao cobramento da subvención:
a) Se se opón de forma expresa ou non autoriza expresamente a comprobación automatizada dos datos indicados e non achega os documentos acreditativos e/ou renuncia expresamente á subvención no prazo do punto 2 deste artigo.
b) Se o resultado da consulta automatizada dos datos pon de manifesto unha situación de incumprimento das obrigas e non achega a documentación que o acredite no prazo do punto 3 deste artigo.
Artigo 8. Pagamento anticipado da subvención
1. De acordo co previsto no artigo 31.6 da Lei 9/2007, do 13 de xuño, de subvencións de Galicia, os beneficiarios recibirán o pagamento anticipado do 100 % do importe subvencionado para poder levar a cabo as actuacións inherentes á subvención, sen exixir ningún tipo de garantías e sen que se supere a contía da anualidade prevista en cada exercicio orzamentario.
2. O dito pagamento anticipado será autorizado polo Consello da Xunta de Galicia nos termos previstos no artigo 63.3 do Decreto 11/2009, do 8 de xaneiro, polo que se aproba o Regulamento da Lei de subvencións de Galicia.
3. As subvencións concedidas nesta orde aboaranse:
a) As destinadas a horas adicionais de profesorado do período comprendido entre o 15 de setembro e o 31 de decembro de 2021, con cargo ao orzamento de 2021, a partir da entrada en vigor da presente orde; e as do período comprendido entre o 1 de xaneiro e o 30 de xuño de 2022, con cargo ao orzamento de 2022, e logo da xustificación de todos os importes recibidos no exercicio 2021.
b) A destinada a outros gastos extraordinarios, integramente con cargo ao orzamento de 2021, a partir da entrada en vigor da presente orde.
Artigo 9. Xustificación da subvención
1. A subvención xustificarase utilizando o modelo PR004A indicando no recadro «Asunto relacionado» o seguinte: «Xustificación subvencións COVID-19».
2. Esta xustificación realizarase:
2.1. No caso de horas adicionais para impartir docencia: achegando a nómina aboada á persoa traballadora e a acreditación do seu ingreso; así mesmo, a liquidación e ingreso das cotizacións á Seguridade Social e o ingreso da retención a conta do imposto sobre a renda das persoas físicas.
2.2. No caso doutros gastos extraordinarios: achegando as facturas expedidas a nome do centro ou outros documentos acreditativos dos gastos derivados da execución das actividades subvencionadas, así como o xustificante de ter aboado efectivamente o seu importe.
3. A anterior xustificación deberá facerse:
3.1. Polas cantidades aboadas ao profesorado e/ou os gastos facturados e pagados ata o 31 de decembro de 2021: antes do 31 de xaneiro de 2022 (este incluído).
3.2. Por cantidades aboadas ao profesorado entre o 1 de xaneiro e o 30 de xuño de 2022: antes do 31 de xullo de 2022 (este incluído).
4. En caso de incumprimento total ou parcial da obriga de xustificar o efectivo emprego da subvención recibida, procederá o reintegro total ou da parte proporcional non xustificada, nos termos previstos nos artigos 33 e seguintes da Lei 9/2007, do 13 de xuño, de subvencións de Galicia.
Artigo 10. Compatibilidades
As subvencións obxecto da presente orde son compatibles con outras subvencións, axudas ou recursos para a mesma finalidade procedentes de calquera Administración pública, entes públicos ou privados, nacionais, da Unión Europea ou de organismos internacionais, tendo en conta que o importe total de todas as subvencións recibidas non poderá superar o custo da actividade subvencionada, procedendo, en caso contrario, o reintegro.
Disposición adicional primeira. Infraccións e sancións
Serán de aplicación as disposicións recollidas no título IV (artigos 50 a 68) da Lei 9/2007, do 13 de xuño, de subvencións de Galicia.
Disposición adicional segunda. Dereito supletorio
En todo o non previsto na presente orde, será de aplicación a Lei 9/2007, do 13 de xuño, de subvencións de Galicia, o Decreto 11/2009, do 8 de xaneiro, polo que se aproba o seu regulamento e, subsidiariamente, a Lei 38/2003, do 17 de novembro, xeral de subvencións, e o Real decreto 887/2006, do 21 de xullo, polo que se aproba o seu regulamento.
Disposición derradeira primeira. Recurso
Contra esta orde, que pon fin á vía administrativa, poderase interpoñer o recurso potestativo de reposición ante o conselleiro de Cultura, Educación e Universidade no prazo dun mes contado a partir do día seguinte ao da súa publicación no Diario Oficial de Galicia (artigos 123 e 124 da Lei 39/2015, do 1 de outubro, do procedemento administrativo común das administracións públicas) ou recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia no prazo de dous meses contados desde a mesma data (artigos 8, 10 e 46.1 da Lei 29/1998, do 13 de xullo, reguladora da xurisdición contencioso-administrativa).
Disposición derradeira segunda. Entrada en vigor
A presente orde entrará en vigor o día seguinte ao da súa publicación no Diario Oficial de Galicia.
Santiago de Compostela, 5 de novembro de 2021
Román Rodríguez González
Conselleiro de Cultura, Educación e Universidade