En cumprimento do disposto no artigo 28 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto no artigo 45 da Lei 39/2015, do 1 de outubro, do procedemento administrativo común das administracións públicas, faise público que o Xurado Provincial de Clasificación de Montes Veciñais en Man Común de Ourense, en sesión que tivo lugar con data do 22 de setembro de 2021, adoptou a seguinte resolución:

Examinado o expediente de clasificación como veciñal en man común do monte denominado de Guimarás, a favor dos veciños/as de Guimarás, na parroquia de Santa Olaia de Esgos, no concello de Esgos (Ourense), resultan os seguintes feitos:

Primeiro. Con data do 31 de maio de 2019, tivo entrada no rexistro da Xefatura Territorial da Consellería do Medio Rural un escrito dirixido ao Xurado Provincial de Clasificación de Montes Veciñais en Man Común de David Martínez Martínez, no cal solicitaba a clasificación como veciñal en man común de varias parcelas denominadas de Guimarás.

Segundo. Con data do 25 de novembro de 2020, o Xurado Provincial acorda iniciar o expediente de clasificación como veciñal en man común do referido monte, designando instrutor e realizando as comunicacións e publicacións a que fan referencia os artigos 20, 21 e 23 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e abriu un período dun mes para a práctica de alegacións.

Terceiro. No prazo concedido para a práctica de alegacións non consta que se presentase ningunha.

Cuarto. O monte obxecto de clasificación, de acordo coa documentación que consta no expediente, descríbese así:

Nome do monte: de Guimarás.

Superficie: 24,97 ha.

Pertenza: veciños/as de Guimarás.

Parroquia: Santa Olaia de Esgos.

Concello: Esgos.

Descrición dos predios que constitúen o monte:

Os terreos incluídos na solicitude constitúen un único couto redondo, segundo a definición que figura no artigo 8 da Lei 7/2012, do 28 de xuño, de montes de Galicia, aínda que está atravesado por un camiño correspondente á parcela coa referencia catastral 32032A00209014.

Parcelas obxecto de clasificación	Parcelas estremeiras
Referencias catastrais	Estremas	Referencias catastrais
32032A002004910000JQ 32032A002007350000JH	Norte	32032A00200700 32032A00200699 32032A00200698 32032A00200697 32032A00200695 32032A00200696 32032A00209003 32032A00209001 32032A00200751 32032A00200752 32032A00200753 32032A00200679 32032A00200715 32032A00200681 32032A00200684 32032A00200685 32032A00200686 32032A00200716 32032A00200683 32032A00200687 32032A00200688 32032A00200689 32032A00200690
		32032A00209014 32032A00200734 32032A00200733 32032A00200732 32032A00200731 32032A00200729 32032A00200727 32032A00200726 32032A00200725 32032A00200718
	Leste	32038A04300038 32038A04300042 32038A04300055 32038A04300056 32038A04300057 32038A04300058 32038A04309005 32038A04300115 32038A04300116 32038A04360001 32038A04309005
	Sur	32032A00200622 32032A00200595 32032A00200589 32032A00200590 32032A00200498 32032A00200497 32032A00200496 32032A00200495 32032A00200494 32032A00200477 32032A00200485
	Oeste	32032A00200492 32032A00200222

Fundamentos de dereito:

Primeiro. O Xurado Provincial de Clasificación de Montes Veciñais en Man Común é o órgano competente para coñecer os expedientes de clasificación dos montes que teñan tal carácter, de acordo co establecido no artigo 9 da Lei 13/1989, do 10 de outubro, de montes veciñais en man común.

Segundo. De conformidade co disposto no artigo 1 da devandita lei «son montes veciñais en man común... os que, con independencia da súa orixe, as súas posibilidades produtivas, o seu aproveitamento actual e a súa vocación agraria, pertenzan a agrupacións veciñais na súa calidade de grupos sociais e non como entidades administrativas, e se veñan aproveitando consuetudinariamente en réxime de comunidade sen asignación de cotas polos membros daquelas na súa condición de veciños».

Terceiro. É reiterada doutrina da Sala Contencioso-Administrativo do Tribunal Supremo que son dúas as notas características dos montes veciñais en man común: unha, o aproveitamento consuetudinario en man común, e outra, a atribución da titularidade dese aproveitamento aos veciños integrantes dun grupo social determinado, independentemente da súa cualificación ou non como entidade administrativa, e corresponde constatar o aproveitamento e atribuír a titularidade a favor do grupo social que o veña gozando ao Xurado Provincial de Clasificación de Montes Veciñais en Man Común de Ourense.

Cuarto. O carácter de monte veciñal en man común tense acreditado mediante as testemuñas dos veciños solicitantes, as actuacións realizadas polo Servizo de Montes e a documentación que consta no expediente.

En consecuencia co que antecede, examinada a Lei 13/1989, do 10 de outubro, de montes veciñais en man común, o seu regulamento, aprobado polo Decreto 260/1992, do 4 de setembro, o Decreto 149/2018, do 5 de decembro, polo que se establece a estrutura orgánica da Consellería do Medio Rural, e demais normativa legal e regulamentaria, o Xurado Provincial por unanimidade dos seus membros,

RESOLVE:

Clasificar como monte veciñal en man común o monte denominado de Guimarás, a favor dos veciños/as de Guimarás, na parroquia de Santa Olaia de Esgos, no concello de Esgos (Ourense), de acordo coa descrición realizada no feito cuarto.

Contra esta resolución, que pon fin á vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto no artigo 12 da citada Lei 13/1989, nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Ourense, 22 de outubro de 2021

Luis Jorge Álvarez Ferro
Presidente do Xurado Provincial de Clasificación
de Montes Veciñais en Man Común de Ourense