A Axencia Galega para a Xestión do Coñecemento en Saúde (Acis), creada polo Decreto 112/2015, do 31 de xullo, ten como un dos seus fins xerais e obxectivos básicos a xestión da formación no Sistema público de saúde de Galicia.

A Dirección Xeral de Recursos Humanos do Servizo Galego de Saúde ten atribuídas as súas funcións polo Decreto 137/2019, do 10 de outubro, polo que se establece a estrutura orgánica do Servizo Galego de Saúde, entre elas o deseño e a execución das políticas de persoal do organismo autónomo e a colaboración no plan anual de formación do persoal do organismo.

Por outra banda, correspóndelle á Dirección Xeral de Recursos Humanos do Servizo Galego de Saúde a negociación do contido do plan coas organizacións sindicais, así como a negociación e a aprobación dos criterios de selección dos participantes nas distintas actividades formativas.

Este plan foi realizado pola Acis, en colaboración coa Dirección Xeral de Recursos Humanos do Servizo Galego de Saúde, e aprobado no Consello de Formación Continua, composto por representantes do Servizo Galego de Saúde, da Acis e das organizacións sindicais CIG, CC.OO., UGT e CSIF, asinantes do acordo de formación continuada.

Como resultado da especial situación derivada da pandemia provocada pola COVID-19, no seo do Consello de Formación Continua do Servizo Galego de Saúde apróbase o Plan de formación para o ano 2021, composto por actividades formativas nas modalidades de autoformación, teleformación e telepresenza, e a súa convocatoria publícase coa Resolución do 21 de xaneiro de 2021, conxunta da Dirección Xeral de Recursos Humanos e da Axencia Galega para a Xestión do Coñecemento en Saúde (DOG núm. 20, do luns 1 de febreiro).

Así mesmo, e en previsión de que as circunstancias e as restricións derivadas da pandemia puideren mellorar, acordouse a convocatoria de actividades presenciais para o último trimestre do ano.

Por todo iso, e coa finalidade de lle dar á formación a continuidade adecuada que a faga realmente efectiva, a Dirección Xeral de Recursos Humanos do Servizo Galego de Saúde, tras o informe favorable das centrais sindicais CIG, CC.OO., UGT e CSIF, xunto coa Xerencia da Acis, resolve facer pública a convocatoria para participar nas actividades formativas do Plan de formación continua do persoal do Servizo Galego de Saúde para o último trimestre do ano 2021, elaborado no marco do Acordo de formación para o emprego das administracións públicas (Plan AFEDAP), que se deberá resolver de acordo coas bases publicadas na Resolución do 21 de xaneiro de 2021, conxunta da Dirección Xeral de Recursos Humanos e da Axencia Galega para a Xestión do Coñecemento en Saúde (DOG núm. 20, do luns 1 de febreiro).

Na páxina web da Acis publicaranse todos os datos precisos das accións formativas que se convocan nesta resolución.

Santiago de Compostela, 6 de outubro de 2021

Antonio Fernández-Campa García-Bernardo Xerente da Axencia Galega para a Xestión do Coñecemento en Saúde

Ana María Comesaña Álvarez Directora xeral de Recursos Humanos do Servizo Galego de Saúde

ANEXO

Listaxe de actividades formativas

Título	Horas
Soporte vital básico	4
Soporte vital cardiovascular avanzado	20
Reanimación neonatal e pediátrica	20
Obradoiro de suturas e cirurxía menor	8
Manexo práctico do paciente asmático	4
Soporte respiratorio invasivo e non invasivo	12
Actualización en estomas e sondas para gastrostomía endoscópica percutánea	8
Actualización en coidados de enfermaría nos diferentes accesos vasculares	8
Coidados de enfermaría en traumatoloxía	12
Posturas facilitadoras do parto	12
Coidados e mobilización de pacientes con prótese	8
Terapia orofacial	8
Obradoiro sobre administración de enemas	4
Coidados posturais ao paciente encamado	4
Limpeza, desinfección e esterilización de material	12
Análises e citoloxías de secrecións e líquidos corporais	12
A espectrometría de masas maldi-tof no laboratorio de microbioloxía clínica	12
Introdución ás técnicas de bioloxía molecular aplicada	8
Técnicas diagnósticas na patoloxía do aparello dixestivo	8
Introdución ao tallado de biopsias en anatomía patolóxica	4
Actualización na parasitoloxía	4
Comunicación e traballo nun equipo multidisciplinar	12
Habilidades de comunicación cos pacientes e familiares para persoal sanitario	12
Situacións de emerxencias provocadas por doentes con condutas violentas	8
Atención plena no contorno sanitario (mindfulness)	12
O/a celador/a no bloque cirúrxico	8
Seguridade alimentaria	8
Coñecementos básicos de almacenaxe na hostalaría hospitalaria	4
Seguridade e operación nas instalacións eléctricas	12
Xestión enerxética en edificios de uso sanitario	20
Instalacións eléctricas hospitalarias e mellora da seguridade de funcionamento	12
Prevención da lexionela e control da calidade da auga en edificios sanitarios	12
Soporte vital básico	4
Habilidades de comunicación para persoal de xestión e servizos	12
Punción seca na síndrome de dor miofascial	20
Uso seguro do medicamento e atención ao paciente na farmacia	12
Calidade na atención telefónica	8
Prevención de riscos na condución de turismos e industriais lixeiros	8