No Diario Oficial de Galicia núm. 61, do 31 de marzo de 2021, publicouse a Orde do 22 de marzo de 2021 pola que se regulan as bases que rexerán o procedemento de concesión de axudas para a posta en marcha de casas do maior e se procede á súa convocatoria, en réxime de concorrencia competitiva, para os anos 2021, 2022 e 2023 (código de procedemento BS212A).
No artigo 3 da orde establecíase un crédito dispoñible de 5.271.000,21 euros, distribuído en tres anualidades con cargo a dúas aplicacións orzamentarias: no ano 2021 2.026.500,21 euros, dos cales 1.081.500,21 euros se financiarían con cargo á aplicación orzamentaria 13.04.312E.470.0 e 945.000,00 euros se financiarían con cargo á aplicación 13.04.312E.770.0; en 2022 un crédito de 1.622.250,00 euros con cargo á aplicación orzamentaria 13.04.312E.470.0 e no ano 2023 un crédito de 1.622.250,00 euros con cargo á aplicación orzamentaria 13.04.312E.470.0.
Así mesmo, este artigo prevé que, de acordo co establecido no artigo 30.2 do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia, excepcionalmente poderase ampliar a contía máxima dos créditos dispoñibles cando o aumento veña derivado dunha xeración, ampliación ou incorporación de crédito; cando existan remanentes doutras convocatorias financiadas con cargo ao mesmo crédito ou a créditos incluídos no mesmo programa ou en programas do mesmo servizo. O incremento do crédito queda condicionado á declaración de dispoñibilidade como consecuencia das circunstancias sinaladas e, se for o caso, logo de aprobación da modificación orzamentaria que proceda. A ampliación do crédito publicarase nos mesmos medios que a convocatoria, sen que implique a apertura de prazo para presentar novas solicitudes nin o inicio de novo cómputo de prazo para resolver.
O elevado número de solicitudes recibidas no marco da Orde do 22 de marzo de 2021 supuxo que o crédito da referida orde resultase insuficiente. A posibilidade do incremento do crédito establecido na orde posibilita dar cobertura a todas as solicitudes presentadas e así estender o programa de casas do maior ao maior número posible de concellos que non contan con recursos de atención diúrna para persoas maiores. Deste xeito, dáse unha maior cobertura a estes recursos, que supoñen unha ferramenta idónea para o novo modelo de coidados, en especial no ámbito rural, xa que prestan un servizo de proximidade, facilitan unha maior creación de emprego, loitan contra o despoboamento nas zonas rurais e configúranse como accións positivas na loita contra a soidade non desexada, sendo recursos cada vez máis demandados pola poboación e que xorden como alternativa idónea ao internamento nun recurso de atención residencial.
Así, con cargo aos fondos do Plan de recuperación, transformación e resiliencia aprobouse unha xeración de crédito por un importe de 927.076,62 euros, co obxecto de incrementar a cobertura do programa de casas do maior.
Por todo o exposto e no uso das facultades que me foron conferidas, unha vez declarada a dispoñibilidade de crédito, vistos a Lei 9/2007, do 13 de xuño, de subvencións de Galicia, e o Decreto 11/2009, do 8 de xaneiro, polo que se aproba o seu regulamento,
RESOLVO:
Artigo único. Incremento do crédito
Increméntase a dotación de fondos inicialmente prevista na Orde do 22 de marzo de 2021 pola que se regulan as bases que rexerán o procedemento de concesión de axudas para a posta en marcha de casas do maior e se procede á súa convocatoria, en réxime de concorrencia competitiva, para os anos 2021, 2022 e 2023 (código de procedemento BS212A) na contía de 927.076,62 euros. O crédito orzamentario total asignado para estas axudas tras a ampliación ascenderá a 6.198.076,83 euros, distribuído en tres anualidades, que se financiarán con cargo ás seguintes aplicacións orzamentarias:
Aplicación orzamentaria |
Importe 2021 |
Importe 2022 |
Importe 2023 |
Importe total |
13.04.312E.770.0 |
1.197.226,62 € |
----- |
------- |
1.197.226,62 € |
13.04.312E.470.0 |
1.081.500,21 € |
1.959,675,00 € |
1.959,675,00 € |
5.000.850,21 € |
Total |
2.278.726,83 € |
1.959,675,00 € |
1.959,675,00 € |
6.198,076,83 € |
A publicación desta orde non supón a apertura dun novo prazo de presentación de solicitudes.
Disposición derradeira única. Entrada en vigor
Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 20 de agosto de 2021
Fabiola García Martínez
Conselleira de Política Social