A Orde do 29 de decembro de 2020 (DOG núm. 15, do 25 de xaneiro de 2021) estableceu, para o ano 2021, a convocatoria de axudas para propietarios de buques e entre a súas finalidades estaban realizar investimentos que:
• Melloren a hixiene, saúde, seguranza e condicións de traballo en buques pesqueiros (procedemento PE120B).
A dita orde establece no seu artigo 4 que o crédito inicial poderá ser ampliado en función das dispoñibilidades orzamentarias sen que iso dea lugar á apertura dun novo prazo de presentación de solicitudes.
Tendo en conta que este ano, polo número e contía deste tipo de axudas, o crédito orzamentario non foi suficiente para atender as solicitudes que cumpren cos requisitos, é polo que procede ampliar o crédito orzamentario para a concesión de axudas para a liña de investimentos que melloren a hixiene, saúde, seguridade e condicións de traballo en buques pesqueiros.
Por todo o anterior, e no uso das facultades que me foron conferidas,
DISPOÑO:
Artigo único
Primeiro. Amplíase o importe da contía máxima das axudas que se van conceder ao abeiro da Orde do 29 de decembro de 2020 en:
• 253.630,71 euros, con cargo á aplicación 15.02.723A.770.6 dos orzamentos xerais da Comunidade Autónoma de Galicia para o ano 2021, polo que o importe total da convocatoria de 2021 para o procedemento 120B ascende a 770.630,71 euros.
Segundo. A publicación desta orde non supón a apertura dun novo prazo de presentación de solicitudes.
Disposición derradeira única
Esta orde producirá efectos a partir do día seguinte ao da súa publicación no Diario Oficial de Galicia.
Santiago de Compostela, 28 de xullo de 2021
Rosa Mª Quintana Carballo
Conselleira do Mar