Na sesión celebrada polo Xurado Provincial o día 2 de xuño de 2021 figura o seguinte acordo:
Monte de Trasparga (exp. 2/2017-ampliación), pertencente aos veciños da parroquia de Trasparga, no concello de Guitiriz.
Con data do 8.7.2020 tivo entrada un escrito da comunidade de Trasparga en que manifesta, en síntese, o seguinte:
– Que na solicitude de ampliación do monte de Trasparga incluíron, por erro, as instalacións dun muíño e o seu terreo circundo.
– Que o predio en cuestión se denomina Muíño de Ruxida e está dentro da parcela catastral 27022A11400218, que foi obxecto de clasificación como MVMC.
– Que a comunidade de Trasparga recoñece que o Muíño de Ruxida é propiedade privada de Guitec, S.L.
– Entre outra documentación, presentan certificación do Rexistro da Propiedade de Vilalba sobre a inscrición do antedito predio, no ano 2002, a favor de Guitec, S.L.
– Solicitan a súa exclusión dos terreos clasificados baixo o expediente 2/2017-ampliación.
– Co recurso presentado presentan un certificado do rexistro da propiedade que acredita a historia das inscricións do predio do Muíño de Ruxida, cuxa última inscrición no ano 2002, é a favor de Guitec, S.L. (predio 6906 de Guitiriz. Folio 125 do tomo 340 e folio 8 do tomo 410).
No procedemento de ampliación do MVMC non houbo constancia do titular de dereito inscrito Guitec, S.L., polo que non se lle deu audiencia durante a súa tramitación.
Ao concorrer a circunstancia descrita no artigo 125.1.a) da Lei 39/2015, do 1 de outubro, do procedemento administrativo común das administracións públicas, dun erro de feito resultado dos propios documentos incorporados ao expediente, procede tratalo como un recurso extraordinario de revisión.
O 19.5.2021 o Servizo de Montes elaborou unha memoria e cartografía coa identificación da parcela impugnada respecto do MVMC de Trasparga.
Examinado o recurso, o Xurado, por unanimidade, acorda estimalo, de conformidade cos fundamentos que se recollen na correspondente resolución do recurso e proceder ás oportunas modificacións no expediente, de acordo coa memoria técnica elaborada polo Servizo de Montes.
Contra esta resolución, no prazo de dous meses contados desde o día seguinte ao da súa notificación ou publicación no Diario Oficial de Galicia, poderá interpoñerse recurso contencioso-administrativo perante o Xulgado do Contencioso-Administrativo de Lugo, de conformidade co artigo 46 da Lei 29/1998, do 13 de xullo, da xurisdición contencioso-administrativa.
Lugo, 29 de xuño de 2021
Mª Olga Iglesias Fontal
Presidenta do Xurado Provincial de Clasificación
de Montes Veciñais en Man Común de Lugo