Na sesión celebrada polo Xurado Provincial o día 2.6.2021 figura o seguinte acordo:
Monte Baamonde (expediente 1/77), pertencente aos veciños da parroquia de Baamonde, no concello de Begonte, clasificado polo Xurado o 28.11.1977.
– O 20.11.2019 ten entrada unha proposta aprobada pola comunidade de Baamonde, de deslindamento parcial do monte veciñal con propiedades particulares. A proposta, tras serlle requirido, resultou emendada coa documentación presentada o 29.6.2020.
– O 7.8.2020 o Servizo de Montes emite un informe favorable da proposta de deslindamento.
– O 21.8.2020 envíase ao concello de Begonte o anuncio para os efectos da súa publicidade no seu taboleiro.
– O 10.9.2020 publícase no Diario Oficial de Galicia o anuncio polo que se fai pública a proposta de deslindamento e se abre o prazo para alegacións.
Tras analizar as alegacións presentadas, o 12.1.2021 a comunidade de Baamonde presenta unha proposta, que recibe informe favorable do Servizo de Montes o 17.3.2021.
– O 31.3.2021 a comunidade de Baamonde presenta a proposta da liña de deslindamento definitiva e achega a documentación requirida no artigo 54 da Lei 7/2012, de montes de Galicia.
– O 20.5.2021 o Servizo de Montes emite un informe en que se especifican as modificacións que se producen como consecuencia do deslindamento. Segundo a nova cartografía, o monte de Baamonde pasa a ter una superficie de 233,8 hectáreas.
De acordo co disposto no artigo 54.3 da Lei 7/2012, no caso de informe favorable, unha vez ratificado o deslindamento provisional pola asemblea xeral, darase traslado ao xurado provincial dos acordos alcanzados e o xurado provincial de montes veciñais en man común ditará resolución aprobatoria do deslindamento.
Visto o anterior, o Xurado, por unanimidade, acorda aprobar o deslindamento e proceder a realizar as oportunas correccións no expediente, de conformidade co informe elaborado polo Servizo de Montes.
O plano que figura no anexo, ao final deste anuncio, corresponde ao monte veciñal após o deslindamento aprobado.
Contra este acordo, desde o día seguinte ao da súa publicación no Diario Oficial de Galicia, poderá interpoñerse recurso potestativo de reposición ante o Xurado Provincial de Clasificación de Montes Veciñais en Man Común de Lugo no prazo dun mes, ou ben directamente recurso contencioso-administrativo ante o Xulgado do Contencioso-Administrativo de Lugo no prazo de dous meses, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e no artigo 46 da Lei 29/1998, do 13 de xullo, da xurisdición contencioso-administrativa.
Lugo, 17 de xuño de 2021
Mª Olga Iglesias Fontal
Presidenta do Xurado Provincial de Clasificación de
Montes Veciñais en Man Común de Lugo
