O 20 de xaneiro de 2021 publicouse no Diario Oficial de Galicia a Resolución do 22 de decembro de 2020 pola que se convocan para o ano 2021, con financiamento plurianual, as subvencións do Programa do bono de alugueiro social (códigos de procedemento VI482A e VI482B).
O punto un do ordinal terceiro da citada resolución establece que as axudas previstas nesta convocatoria se farán efectivas con cargo á aplicación orzamentaria 08.81.451B.480.3 dos orzamentos xerais da Comunidade Autónoma de Galicia, por un importe de 300.000 euros para o ano 2021, 300.000 euros para o ano 2022, 300.000 euros para o ano 2023, 300.000 euros para o ano 2024 e 300.000 euros para o ano 2025.
Así mesmo, no punto tres do mesmo ordinal prevese que a contía establecida nesta convocatoria poderá ser obxecto de ampliación mediante resolución da persoa titular da Dirección Xeral do Instituto Galego da Vivenda e Solo, que terá efecto logo da súa publicación no Diario Oficial de Galicia, de conformidade co establecido no artigo 30 do Regulamento da Lei 9/2007, do 13 de xuño, de subvencións de Galicia, aprobado polo Decreto 11/2009, do 8 de xaneiro.
Tendo en conta que na data de hoxe existen remanentes incorporados de fondos finalistas procedentes do reaxuste do convenio de execución do Plan 2018-2021, asinado no seo da comisión bilateral celebrada o 23 de abril de 2021, ao abeiro do artigo 6.5 do Real decreto 106/2018, do 9 de marzo, e máis remanentes de fondos autonómicos procedentes de convocatorias anteriores do bono de alugueiro social, e que o crédito fixado na convocatoria para as anualidades 2021 e 2022 do Programa de bono de alugueiro social é insuficiente para atender as concesións do bono de alugueiro social e mais as concesións dalgunhas prórrogas de convocatorias anteriores, cómpre ampliar o crédito establecido inicialmente.
De conformidade co ordinal terceiro da Resolución do 22 de decembro de 2020, é competente para ditar esta resolución a persoa titular da Dirección Xeral do Instituto Galego da Vivenda e Solo.
Polo exposto,
RESOLVO:
Único. Ampliar a dotación orzamentaria para a convocatoria de subvencións do Programa do bono de alugueiro social para as anualidades 2021 e 2022.
O incremento da dotación será de 1.486.206,80 euros, polo que a contía máxima das subvencións que se poderán conceder nos exercicios 2021 e 2022 será a seguinte:
|
Anualidade |
Aplicación orzamentaria |
Crédito inicial |
Ampliación de crédito |
Crédito total |
|
2021 |
08.81.451B.480.3 Prox. 2015 00026-FCA |
300.000,00 € |
146.145,00 € |
1.116.175,90 € |
|
08.81.451B.480.6 Prox. 2020 00003-FFE |
0,00 € |
670.030,90 € |
||
|
2022 |
08.81.451B.480.3 Prox. 2015 00026-FCA |
300.000,00 € |
0,00 € |
970.030,90 € |
|
08.81.451B.480.6 Prox. 2020 00003-FFE |
0,00 € |
670.030,90 € |
Esta ampliación non implica a modificación do prazo para presentar solicitudes nin o inicio dun novo cómputo do prazo máximo para resolver.
Esta resolución producirá efectos desde o día seguinte ao da súa publicación no Diario Oficial de Galicia.
Santiago de Compostela, 4 de xuño de 2021
Heriberto García Porto
Director xeral do Instituto Galego da Vivenda e Solo
