A Orde do 9 de decembro de 2020 aproba os diferentes modelos de autoliquidación do imposto sobre transmisións patrimoniais e actos xurídicos documentados na Comunidade Autónoma de Galicia e regula o procedemento e as condicións para o seu pagamento e presentación, así como determinadas obrigacións formais e de subministración de información tributaria.
A aprobación da Lei 4/2021, do 28 de xaneiro, de medidas fiscais e administrativas, e a Lei 11/2020, do 30 de decembro, de orzamentos xerais do Estado, motivou que mediante a Resolución do 25 de xaneiro de 2021 da Axencia Tributaria de Galicia se modifica no anexo II da Orde do 9 de decembro de 2020, o anexo IV e o cadro de conceptos/clave/tipo do Modelo 600.
Posteriormente, a aprobación da Lei 9/2021, do 25 de febreiro, de simplificación administrativa e de apoio á reactivación económica de Galicia deu lugar a que mediante a Resolución do 4 de marzo de 2021 da Axencia Tributaria de Galicia se modificase no anexo II da Orde do 9 de decembro de 2020 o anexo IV, bonificacións e deducións, do modelo 600.
A Lei 11/2021, do 14 de maio, de recuperación da terra agraria, modifica, entre outros aspectos, o texto refundido das disposicións legais da Comunidade Autónoma de Galicia en materia de tributos cedidos polo Estado, aprobado polo Decreto lexislativo 1/2011, do 28 de xullo, no sentido de establecer novas deducións fiscais no imposto de transmisións patrimoniais e actos xurídicos documentados destinados a fomentar actuacións de recuperación e mobilidade das terras de Galicia.
Todo o exposto fai necesario modificar o modelo correspondente á autoliquidación do imposto de transmisións patrimoniais e actos xurídicos documentados aprobado pola Orde do 9 de decembro de 2020 para reflectir nel estes cambios normativos, para o cal é competente a persoa titular da Dirección da Axencia Tributaria de Galicia con base na habilitación normativa prevista na disposición adicional sexta da devandita orde.
En consecuencia,
RESOLVO:
Primeiro. Modificar no anexo II da Orde do 9 de decembro de 2020 o anexo IV, bonificacións e deducións, do modelo 600 que pasa a ser o seguinte:
Segundo. Esta resolución entrará en vigor o día seguinte ao da súa publicación no Diario Oficial de Galicia.
Santiago de Compostela, 14 de maio de 2021
Mª Victoria González Vázquez
Directora da Axencia Tributaria de Galicia