Antecedentes.

1. Con data do 22 de marzo de 2021 publícase no Diario Oficial de Galicia núm. 54 a Resolución da Universidade de Santiago de Compostela do 9 de marzo de 2021, pola que se convocan a concurso público prazas de profesorado contratado doutor correspondentes ás OEP de 2019 e 2020.

2. Con data do 24 de marzo de 2021, a Dirección Xeral de Custos de Persoal do Ministerio de Facenda remite á Universidade de Santiago de Compostela un requirimento para que anule ou revogue a citada resolución, de acordo co establecido no artigo 44.1 da Lei 29/1988, do 13 de xullo, reguladora da xurisdición contencioso-administrativa, como dilixencia preliminar postestativa previa á interposición do recurso contencioso-administrativo.

3. Non foi publicada a lista provisional de admitidos e excluídos desta convocatoria.

Fundamentos xurídicos.

No requirimento da Dirección Xeral de Custos de Persoal sinálase que a Lei 6/2018, do 3 de xullo, de orzamentos xerais do Estado para o ano 2018 (norma que regula tanto a oferta de emprego público de 2018 como de 2019 e 2020), establece no seu artigo 19.Un.3.I), parágrafo 2, que, dentro do límite da taxa de reposición correspondente aos corpos de catedráticos de universidade e de profesores titulares de universidade e aos profesores contratados doutores previstos no parágrafo anterior, cada universidade estará obrigada a destinar, como mínimo, o 15 por cento do total de prazas que ofrece á incorporación, nesa categoría para a que está acreditada, de persoal investigador doutor que completou o Programa Ramón y Cajal e obtivo o certificado I3. No caso de que non se empreguen todas as prazas previstas nesta reserva, estas poderánselles ofertar a outros investigadores de programas de excelencia nacionais ou internacionais que obtivesen o certificado I3.

Segundo sinala a citada dirección xeral, na Resolución da Universidade de Santiago de Compostela do 9 de marzo de 2021, pola que se convocan a concurso público prazas de profesorado contratado doutor (OEP 2019 e 2020), non se establece como requisito, ademais de estar en posesión do certificado I3, o de ter rematado o Programa Ramón y Cajal, como dispón o citado artigo 19.Un.3.i) da Lei de orzamentos aplicable a esta OEP, senón que se require soamente estar en posesión do certificado I3 dentro do marco do citado Programa Ramón y Cajal.

En vista do anterior, e en cumprimento do requirimento formulado, esta reitoría

RESOLVE:

Primeiro. Aceptar o requirimento formulado con data do 24 de marzo de 2021 pola Dirección Xeral de Custos de Personal do Ministerio de Facenda á Universidade de Santiago de Compostela e, en consecuencia, anular a convocatoria aprobada mediante a Resolución do 9 de marzo de 2021 pola que se convocan a concurso público prazas de profesorado contratado doutor (OEP 2019 e 2020).

Segundo. Realizar os trámites necesarios para a devolución das cantidades aboadas en concepto de dereitos de exame ás persoas participantes no proceso selectivo.

A presente resolución será obxecto de publicación no Diario Oficial de Galicia, así como no taboleiro electrónico da USC, e notificada á Dirección Xeral de Custos de Persoal.

Contra esta resolución, que esgota a vía administrativa, os interesados poderán interpor recurso contencioso-administrativo no prazo de dous meses contados a partir do día seguinte ao da súa publicación no Diario Oficial de Galicia.

Santiago de Compostela, 14 de abril de 2021

O reitor da Universidade de Santiago de Compostela
P.D. (Resolución do 30.4.2020; DOG do 11 de maio)
Ernesto González Seoane
Vicerreitor de Profesorado