Con data do 4 de marzo de 2021, a Presidencia de Portos de Galicia, ao abeiro das competencias conferidas polo artigo 12.3.j) da Lei 6/2017, do 12 de decembro, de portos de Galicia, emite resolución pola que acorda incoar expediente de caducidade da concesión administrativa outorgada o 13 de xaneiro de 2004 á empresa Alimentación Projoscar, S.L. con destino á construción dunha planta de engorda de rodaballo no porto de Tragove, Cambados.

A instrución recae en Jesús Javier Fernández Barro, xefe da División Xurídica de Portos de Galicia, con domicilio para os efectos do presente expediente en Área Central, praza de Europa, 5-A, 6º, de Santiago de Compostela; o seu réxime de abstención e recusación é o consignado nos artigos 23 e 24 da Lei 40/2015, do 1 de outubro, de réxime xurídico do sector público.

O acordo de incoación emitido polo instrutor o 4 de marzo de 2021 foi rexeitado no sistema Notifica-gal. Malia iso, intentouse a notificación postal nos últimos domicilios que constan no expediente, onde tampouco foi posible a notificación polo que, de conformidade co disposto nos artigos 44 e 46 da Lei 39/2015, do procedemento administrativo común das administracións públicas, se notifica mediante a publicación no Boletín Oficial del Estado.

Así mesmo, este anuncio publicarase no Diario Oficial de Galicia, ben que a eficacia do acto notificado quedará supeditada á súa publicación no BOE.

O expediente incóase pola concorrencia das causas de caducidade previstas na condición xeral do título da concesión 32ª, nas súas alíneas a) e b), por falla de pagamento das taxas por un período superior a un ano e ausencia de actividade.

Contra o acordo de incoación poderanse formular alegacións perante o instrutor designado no expediente, para o cal se outorga un prazo máximo de 10 días hábiles contado desde o día seguinte ao da publicación do acordo no Boletín Oficial del Estado.

En aplicación do previsto no artigo 90.1.b) da Lei de portos de Galicia, o aboamento das cantidades debidas por taxas antes de ditarse resolución determinará o arquivamento do expediente no que atinxe a ese motivo en concreto.

Para o seu exame, o expediente atópase nas dependencias dos servizos centrais de Portos de Galicia en Área Central, praza de Europa, 5-A, 6º, Santiago de Compostela.

Santiago de Compostela, 17 de marzo de 2021

Jesús Javier Fernández Barro
Instrutor