A Xunta de Goberno Local do Concello de Moaña, desenvolvida o 25 de xaneiro de 2021, aprobou definitivamente o Proxecto de equidistribución do SUNC P-11 de Sisalde, que se executará polo sistema de cooperación, adoptando o acordo que a seguir se transcribe:

Primeiro. Aprobar definitivamente o Proxecto de equidistribución do SUNC P-11 de Sisalde, que se executará polo sistema de cooperación. De conformidade cos artigos 107 da Lei 2/2016, do solo de Galicia, e o artigo 274 do Regulamento da Lei do solo de Galicia, esta aprobación definitiva terá os seguintes efectos:

1. O acordo aprobatorio do instrumento de equidistribución producirá os seguintes efectos:

a) Transmisión ao municipio, en pleno dominio e libre de cargas, de todos os terreos de cesión obrigatoria para a súa incorporación ao patrimonio público do solo ou a súa afectación aos usos previstos no planeamento.

b) Subrogación, con plena eficacia real, das antigas polas novas parcelas correspondentes.

c) Afectación real das parcelas adxudicadas ao cumprimento das cargas e pagamento dos custos inherentes ao sistema de actuación correspondente.

2. A aprobación definitiva do instrumento de equidistribución habilita a Administración para proceder á ocupación dos terreos e bens que, pola súa cualificación urbanística, deban ser obxecto de cesión obrigatoria e gratuíta e daqueloutros incluídos no ámbito que resulten necesarios para a execución material das obras de urbanización.

3. Unha vez firme en vía administrativa o acordo de aprobación definitiva do instrumento de equidistribución, procederase á súa inscrición no rexistro da propiedade.

Segundo. Que se proceda a publicar un anuncio no Boletín Oficial da provincia e no Diario Oficial de Galicia.

Terceiro. Que se proceda á notificación individualizada a cargo da Administración actuante a todos os propietarios e interesados no polígono e nos sistemas xerais afectos, considerando os datos catastrais e os que figuren no Rexistro da Propiedade segundo a certificación expedida para tal efecto no seo do procedemento.

Cuarto. De conformidade co establecido nos artigos 107.3 da LSG e 272 do Decreto 143/2016, do 22 de setembro, polo que se aproba o Regulamento da Lei 2/2016, do 10 de febreiro, do solo de Galicia, unha vez firme en vía administrativa o acordo de aprobación definitiva do instrumento de equidistribución, procederase á súa inscrición no Rexistro da Propiedade.

Recursos:

A presente resolución pon fin á vía administrativa e contra ela pode interpoñerse ou ben recurso potestativo de reposición ante o mesmo órgano que a ditou, no prazo dun (1) mes contado desde o día seguinte ao da súa notificación ou publicación, ou ben recurso contencioso-administrativo ante o Xulgado do Contencioso-Administrativo de Pontevedra, no prazo de dous (2) meses contados desde o día seguinte ao da súa notificación ou publicación. Se se opta por interpoñer recurso potestativo de reposición, non poderá interpoñerse recurso contencioso-administrativo ata que aquel sexa resolto expresamente ou se produza a súa desestimación por silencio. Todo iso sen prexuízo de que se interpoña calquera outro recurso que se coide procedente segundo o artigo 40 da Lei 39/2015, do 1 de outubro, do procedemento administrativo común das administracións públicas.

Moaña, 1 de febreiro de 2021

Leticia Santos Paz
Alcaldesa