O Pleno da Corporación, na sesión extraordinaria que tivo lugar o día 12 de marzo de 2021, adoptou o seguinte acordo:
a) Aprobar inicialmente a modificación puntual do título III do Plan xeral de ordenación municipal (regulación de usos), segundo o documento formulado polos servizos técnicos municipais de planeamento en marzo de 2021.
b) En aplicación do procedemento regulado nos artigos 60.6 da Lei 2/2016, do solo de Galicia (LSG), e 144.6 do seu regulamento de desenvolvemento (RLSG), a modificación inicialmente aprobada someterase á información pública durante o prazo de dous meses, mediante anuncios que para o efecto se publicarán no Diario Oficial de Galicia e nun xornal dos de maior difusión na provincia.
Suspensión de licenzas e actos suxeitos a comunicación previa
O acordo de aprobación inicial determina automaticamente, por aplicación do que dispoñen os artigos 47.2 da LSG e 86 do RLSG, a suspensión do procedemento de outorgamento de licenzas de edificación, parcelación e derruba que resulten incompatibles ou contrarias ás novas determinacións da modificación inicialmente aprobada.
A suspensión inclúe tamén os actos suxeitos a comunicación previa cando supoñan a implantación de usos ou actividades non autorizados polo novo planeamento (artigo 86.3.d) do RLSG).
Actos non afectados pola suspensión
Dado o contido e alcance da reforma, a suspensión non afectará:
– As licenzas de parcelación e derruba.
– As obras de nova edificación, reforma e rehabilitación, agás que comporten a implantación de usos ou actividades non autorizados polo novo plan.
– As licenzas de primeira ocupación.
– Os proxectos que cumpran simultaneamente o planeamento vixente e o resultante da modificación inicialmente aprobada.
– Os actos suxeitos a comunicación previa, agás que supoñan a implantación de usos ou actividades non autorizados polo novo plan.
O ámbito territorial da suspensión abrangue todo o termo municipal, coa única excepción do solo rústico, que se rexe pola lexislación do solo de Galicia.
A suspensión terá a duración máxima de dous anos, contados a partir do día seguinte ao do acordo de aprobación inicial, e extinguirase en todo caso coa aprobación definitiva do planeamento.
O que se publica co fin de que, durante o prazo de dous meses, contado a partir do día seguinte ao da publicación deste anuncio, os interesados poidan consultar o expediente e formular as alegacións que xulguen oportunas. Nas alegacións que se presenten deberá constar a referencia PLA/38/2019.
A documentación sometida á exposición pública estará ao dispor dos interesados no Servizo de Planeamento e Xestión Urbanística do Concello de Santiago de Compostela (Pazo de Raxoi, 2º andar), de luns a venres, en horario das 9 ás 14.00 horas, logo de cita que se deberá solicitar no número de teléfono 981 54 24 26, e na páxina web do concello https://transparencia.santiagodecompostela.gal/Modificacion-puntual-do-titulo-III-do-PXOM.-Regulacion-de-usos/gl
Santiago de Compostela, 12 de marzo de 2021
O alcalde
P.D. (DEC/4742/2019, do 17 de xuño)
Mercedes Rosón Ferreiro
Concelleira delegada de Urbanismo, Vivenda e Cidade Histórica
