Con data do 29 de outubro de 2020 publicouse no Diario Oficial de Galicia a Orde do 19 de outubro de 2020 pola que se establecen as bases reguladoras e se convoca o procedemento para a concesión de subvencións destinadas á realización de programas de interese xeral para fins de carácter sociosanitario no ámbito dos trastornos mentais e as adiccións, orientados a minimizar o impacto que a pandemia pola COVID-19 ten na saúde mental da poboación galega.

O financiamento da convocatoria atópase distribuído nas correspondentes aplicacións orzamentarias de acordo co seguinte detalle:

Liñas de actuación:	Importe	Aplicación orzamentaria
Liña I. Proxectos de investimento en melloras nos centros cuxa actividade principal sexa o desenvolvemento de programas asistenciais, psicosociais ou preventivos en materia de trastornos adictivos e trastornos mentais	155.940,66 €	50.01.413A.781.30
Liña II. Programas sociosanitarios de detección e intervención comunitaria de persoas en risco de presentar un trastorno mental , incluídos os trastornos adictivos	165.805,54 €	50.01.413A.481.30
Liña III. Programas para favorecer a empregabilidade e a incorporación sociolaboral de persoas con trastorno mental severo e adiccións	100.000,00 €	50.01.413A.481.30

No artigo 3.2 da citada orde recóllese que, de acordo co previsto no artigo 30.2 do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia, excepcionalmente poderase ampliar a contía máxima dos créditos dispoñibles cando o aumento veña derivado dunha xeración, ampliación ou incorporación de crédito; cando existan remanentes doutras convocatorias financiadas con cargo ao mesmo crédito ou a créditos incluídos no mesmo programa ou en programas do mesmo servizo. O incremento do crédito queda condicionado á declaración de dispoñibilidade como consecuencia das circunstancias sinaladas e, se é o caso, logo da aprobación da modificación orzamentaria que proceda. A ampliación do crédito publicarase nos mesmos medios que a convocatoria sen que implique a apertura de prazo para presentar novas solicitudes nin o inicio de novo cómputo de prazo para resolver.

O 7 de novembro de 2020 publicouse no Boletín Oficial del Estado a Orde DSA/1045/2020, do 29 de outubro, pola que se publica Acordo do Consello de Ministros, do 13 de outubro de 2020, polo que se autorizan os criterios de distribución, e a distribución resultante, aprobados polo Consello Territorial de Servizos Sociais e do Sistema para a Autonomía e Atención á Dependencia, destinados a subvencionar, por parte das comunidades autónomas e cidades con estatuto de autonomía, actividades de interese xeral con cargo á asignación do 0,7 por 100 do imposto sobre a renda das persoas físicas, para o ano 2020, na cal se asignan a esta comunidade autónoma 17.127.112,58 euros para a anualidade 2020, correspondendo á Consellería de Sanidade a porcentaxe para o desenvolvemento de programas dentro do seu ámbito competencial superior ao orzamento orixinalmente previsto.

Por este motivo, e co obxecto de repartir a totalidade dos fondos recadados para este fin entre as entidades de iniciativa social que concorran á convocatoria de axudas, cómpre dar publicidade á ampliación do crédito dispoñible para as liñas previstas na Orde do 19 de outubro por unha contía igual ao incremento de crédito realizado.

Por todo o exposto e no uso das facultades que me foron conferidas,

RESOLVO:

Artigo 1. Ampliación dos créditos

Amplíase o crédito destinado ao financiamento das axudas previstas na Orde do 19 de outubro de 2020 pola que se establecen as bases reguladoras e se convoca o procedemento para a concesión de subvencións destinadas á realización de programas de interese xeral para fins de carácter sociosanitario no ámbito dos trastornos mentais e as adiccións, orientados a minimizar o impacto que a pandemia pola COVID-19 ten na saúde mental da poboación galega en noventa e cinco mil trescentos catorce euros con catro céntimos (95.314,04 €), consignado nas aplicacións orzamentarias 50.01.413A.481.30 e 50.01.413A.781.30, con código de proxecto 201800005, en función das seguintes liñas de actuación subvencionables e os seus importes:

Liñas de actuación	Aplicación	Importe	incremento	Importe tras incremento
Liña I. Proxectos de investimento en melloras nos centros cuxa actividade principal sexa o desenvolvemento de programas asistenciais, psicosociais ou preventivos en materia de trastornos adictivos e trastornos mentais	50.01.413A.781.30	155.940,66 €	47.657,02	203.597,68 €
Liña II. Programas sociosanitarios de detección e intervención comunitaria de persoas en risco de presentar un trastorno mental, incluídos os trastornos adictivos	50.01.413A.481.30	165.805,54 €	23.828,51	189.634,05 €
Liña III. Programas para favorecer a empregabilidade e a incorporación sociolaboral de persoas con trastorno mental severo e adiccións	50.01.413A.481.30	100.000,00 €	23.828,51	123.828,51 €

A publicación desta orde non supón a apertura dun novo prazo de presentación de solicitudes.

Artigo 2. Período de execución e xustificación de gastos

O incremento do crédito require necesariamente a ampliación dos prazos previstos no primeiro parágrafo do artigo 24 da Orde do 19 de outubro de 2020, de xeito que o prazo de xustificación de gastos finalizará o 30 de xuño de 2021 (inclusive), sendo os gastos subvencionables os realizados e efectivamente pagados desde o 1 de marzo de 2020 ata o 31 de maio de 2021.

Disposición derradeira única. Entrada en vigor

Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 17 de decembro de 2020

Julio García Comesaña
Conselleiro de Sanidade