A Orde do 18 de novembro de 2020 pola que se regula o procedemento para o recoñecemento a adegas do dereito a préstamos de campaña no ano 2020 garantidos polo Instrumento financeiro de xestión centralizada Feader 2014-2020, no marco do Programa de desenvolvemento rural de Galicia 2014-2020, cofinanciado polo Fondo Europeo Agrícola de Desenvolvemento Rural (Feader) (código de procedemento MR364A), establece no número 8 do seu artigo 6 que o prazo de presentación de solicitudes será dun mes contado a partir do día seguinte ao de publicación desta orde no Diario Oficial de Galicia, e que implica que finalizará o día 21 de decembro de 2020.
Ante a complexidade da posta en marcha deste novo instrumento financeiro, que require a participación coordinada da Consellería do Medio Rural xunto co Ministerio de Agricultura, Pesca e Alimentación, a Sociedade Anónima Estatal de Caución Agraria e as entidades financeiras, considérase necesario ampliar o dito prazo.
En consecuencia, de conformidade co previsto no artigo 30.1.3 do Estatuto de autonomía de Galicia, e en uso das facultades que me confire a Lei 9/2007, do 13 de xuño, de subvencións de Galicia, e en uso das competencias atribuídas pola Lei 1/1983, do 22 de febreiro, de normas reguladoras da Xunta e da súa Presidencia,
DISPOÑO:
Artigo 1. Ampliación do prazo de solicitude da axuda
Amplíase ata o día 30 de decembro de 2020 (incluído) o prazo de presentación das solicitudes.
Disposición derradeira única. Entrada en vigor
Esta orde entrará en vigor o mesmo día da súa publicación no Diario Oficial de Galicia.
Santiago de Compostela, 16 de decembro de 2020
José González Vázquez
Conselleiro do Medio Rural