Mediante a Orde do 16 de outubro de 2020 (DOG núm. 213, do 22 de outubro) convocáronse para o ano 2020 as axudas pola crise sanitaria do COVID-19 no sector da flor cortada e planta ornamental.
As persoas produtoras de flor cortada e planta ornamental viron imposibilitada a comercialización da súa produción, no período comprendido entre o 14 de marzo e o 20 de xuño de 2020, como consecuencia das limitacións impostas polo Real decreto 463/2020, do 14 de marzo, polo que se declara o estado de alarma para a xestión da situación de crise sanitaria ocasionada polo COVID-19, e as súas prórrogas.
O citado real decreto non declarou as flores e plantas ornamentais bens de primeira necesidade, polo que a súa comercialización reduciuse practicamente na súa totalidade. O 70 % da produción total anual comercialízase nestes meses, debido á demanda de festas e eventos como Semana Santa, o día da Nai ou o día do Libro, festas todas elas canceladas polo mesmo motivo.
Ao mesmo tempo, tanto a flor cortada como a planta ornamental teñen unha vida útil moi curta, que fai imposible o seu almacenamento para posterior venda, polo que a maioría dos produtores se viron obrigados a destruír a súa produción.
O financiamento das axudas recollidas na presente orde, financiadas ao 100 % pola Administración xeral do Estado, efectuarase con cargo á seguinte aplicación orzamentaria dos orzamentos da Comunidade Autónoma de Galicia, 14.04.713C 470.0 (CP 2020 00098), cun importe para o ano 2020 de corenta mil euros (40.000 €).
O Ministerio de Agricultura, Pesca e Alimentación financiará as subvencións previstas nesta orde con cargo á aplicación orzamentaria 21.05.412 C.451, en función das dispoñibilidades orzamentarias, cunha contía máxima de 10.400.000 euros.
A distribución territorial dos créditos consignados para o efecto nos orzamentos xerais do Estado, a cargo do Ministerio de Agricultura, Pesca e Alimentación, realizarase de acordo co previsto no artigo 86 da Lei 47/2003, do 26 de novembro, xeral orzamentaria. A Conferencia Sectorial de Agricultura e Desenvolvemento Rural fixará a distribución territorial das subvencións de acordo coas dispoñibilidades orzamentarias.
Unha vez rematado o prazo de presentación de solicitudes, o día 5 de novembro, e analizadas todas as solicitudes presentadas, a Consellería do Medio Rural enviou a proposta de previsión de fondos ao Ministerio de Agricultura, Pesca e Alimentación.
O Ministerio, con base nas peticións recibidas por parte de todas as comunidades autónomas e segundo os criterios de repartición establecidos no Real decreto 883/2020, do 6 de outubro, na Conferencia Sectorial de Agricultura e Desenvolvemento Rural celebrada o día 12 de novembro procedeu á territorialización dos fondos ás comunidades autónomas.
Nesta territorialización de fondos, á Comunidade Autónoma de Galicia correspóndelle a cantidade de seiscentos corenta mil douscentos corenta e seis euros con noventa e un céntimos (640.246,91).
Posteriormente, na reunión do Consello de Ministros do día 24 de novembro de 2020 apróbase o Acordo polo que se aproba a distribución territorial definitiva dos créditos orzamentarios correspondentes aos criterios obxectivos e acordos fixados na Conferencia Sectorial de Agricultura e Desenvolvemento Rural celebrada o día 12 de novembro de 2020.
A Orde establece no artigo 16.2 a posibilidade de incrementar a dotación orzamentaria con fondos adicionais. Dado que para poder publicar a dita orde foi necesario dotala cun crédito inicial de 40.000 €, agora procede incrementar a dotación orzamentaria desta convocatoria pola diferencia entre o importe xa asignado inicialmente e o importe territorializado posteriormente.
Polo tanto, procede a ampliar o crédito desta convocatoria, por un importe de seiscentos mil douscentos corenta e seis euros con noventa e un céntimos (600.246,91).
En consecuencia, de conformidade co previsto no artigo 30.1.3 do Estatuto de autonomía de Galicia e no uso das facultades que me confire a Lei 9/2007, do 13 de xuño, de subvencións de Galicia, e no uso das competencias que me confire a Lei 1/1983, do 22 de febreiro, de normas reguladoras da Xunta e da súa Presidencia,
DISPOÑO:
Artigo único
1. A dotación orzamentaria prevista para as axudas da Orde do 16 de outubro de 2020 (DOG núm. 213, do 22 de outubro), increméntase no importe de seiscentos mil douscentos corenta e seis euros con noventa e un céntimos (600.246,91) na aplicación orzamentaria 14.04.713C 470.0 (CP 2020 00098).
2. En todo caso, a concesión das axudas reguladas na dita orde estará limitada ás dispoñibilidades orzamentarias.
3. A ampliación do orzamento previsto no artigo único desta orde non afecta o prazo de presentación de solicitudes establecido na Orde do 16 de outubro de 2020.
Disposición derradeira única. Entrada en vigor
Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 14 de decembro de 2020
José González Vázquez
Conselleiro do Medio Rural