O Pleno, na sesión ordinaria desenvolvida o 24 de setembro de 2020, e no punto de mocións de urxencia (20.3.), adoptou por dezasete (17) votos a favor que constitúen a unanimidade dos membros presentes, o acordo que, na súa parte dispositiva, se transcribe literalmente:
«20.3). Expediente 874/2018. Asunto: aprobación inicial-modificación puntual do Plan xeral de ordenación municipal do Concello de Tui, con ordenación detallada, en aplicación da disposición transitoria 7ª da Lei 2/16, do 10 de febreiro, do solo de Galicia, para a regulación urbanística dun asentamento empresarial xurdido á marxe do planeamento de Baldráns.
(.../...) En consecuencia, o Pleno da Corporación acorda:
1º. Aprobar inicialmente o proxecto de modificación puntual do Plan xeral de ordenación municipal do Concello de Tui, con ordenación detallada, en aplicación da disposición transitoria 7ª, da Lei 2/2016, do 10 de febreiro, do solo de Galicia, para a regularización urbanística dun asentamento empresarial xurdido á marxe do planeamento nas Veigas, parroquia de Baldráns. Tui (versión inicial do Plan). Para tales efectos, cómpre sinalar que os documentos sometidos a aprobación inicial abarcarán todos os documentos integrantes do expediente tramitado, incluídos un resumo executivo, o estudo ambiental estratéxico e un resumo non técnico do estudo ambiental estratéxico (artigo 60.6 da LSG).
2º. Someter os ditos documentos a información pública por período de 2 meses, con publicación de acordo no DOG, e nun xornal de maior difusión da provincia.
3º. Suspender o outorgamento de licenzas de obras e actividade e de parcelación no ámbito do PXOM-2011, durante o prazo de 2 anos, desde a adopción do acordo de aprobación inicial (para o suposto de que as novas determinacións supoñan a modificación da ordenación urbanística vixente); en todo caso esta suspensión extinguirase coa aprobación definitiva da modificación puntual en proxecto.
4º. Elevar esta documentación ao órgano competente en materia de urbanismo, o cal realizará as consultas previstas no documento de alcance do estudo ambiental estratéxico, dará audiencia aos municipios limítrofes e solicitará os informes sectoriais autonómicos preceptivos, que deberán ser emitidos no prazo de tres meses; transcorrido este, entenderanse emitidos con carácter favorable (artigo 60.7 da LSG)».
O expediente completo pódese consultar no departamento de urbanismo do Concello de Tui, en horario de atención o público (das 9.00 ás 14.00 horas), ou ben no portal de transparencia do Concello de Tui, no enderezo:
https://concellotui.sedelectronica.gal/transparency/7d2503d4-5ab4-4fd3-91d3-8460ae5c60b5/
Tui, 20 de outubro de 2020
Enrique Cabaleiro González
Alcalde